హార్ముజ్ దిగ్బంధంపై వెనక్కి తగ్గేది లేదు

• ఇరాన్ ప్రతిపాదనను తిరస్కరించిన ట్రంప్
• ‘అణు విముక్త ఒప్పందం’ జరిగే వరకు ఆంక్షలు తప్పవని హెచ్చరిక

వాషింగ్టన్: పశ్చిమ ఆసియాలో యుద్ధ మేఘాలు కమ్ముకున్న వేళ, ఇరాన్ పట్ల అమెరికా తన కఠిన వైఖరిని మరింత పెంచింది. హార్ముజ్ జలసంధి దిగ్బంధాన్ని ఎత్తివేయాలని, చర్చలకు సిద్ధమని ఇరాన్ చేసిన తాజా ప్రతిపాదనను అమెరికా అధ్యక్షుడు డొనాల్డ్ ట్రంప్ నిర్ద్వంద్వంగా తోసిపుచ్చారు. ఇరాన్ తన అణ్వాయుధ ఆకాంక్షలను పూర్తిగా విడనాడి, అమెరికా ఆందోళనలను పరిష్కరించే వరకు నౌకాదళ దిగ్బంధం కొనసాగుతుందని ఆయన స్పష్టం చేశారు. ఈ దిగ్బంధాన్ని ‘జీనియస్’ , ‘వంద శాతం ఫూల్‌ప్రూఫ్’ వ్యూహంగా అభివర్ణించిన ట్రంప్, ఇది ఇరాన్ పైన అత్యుత్తమ ఆర్థిక ఒత్తిడిని కలిగిస్తోందని వ్యాఖ్యానించారు. 

ఈ పరిణామాల నేపథ్యంలో అంతర్జాతీయంగా చమురు సంక్షోభం మరింత ముదిరింది. బ్రెంట్ క్రూడ్ ఆయిల్ ధర బ్యారెల్‌కు 120 డాలర్లు దాటి రికార్డుస్థాయికి చేరుకుంది. ఇరాన్ కరెన్సీ ‘రియాల్’ మునుపెన్నడూ లేని విధంగా కనిష్టస్థాయికి పడిపోయింది. ఇరాన్ పార్లమెంట్ స్పీకర్ ఈ దిగ్బంధాన్ని తమ దేశాన్ని లోపలి నుంచి బలహీనపరిచే ‘కొత్త కుట్ర’గా అభివర్ణించారు. ఇరాన్ తనను తాను ‘కుప్పకూలే స్థితి’లో ఉందని అంగీకరించిందని ట్రంప్ పేర్కొనగా, ఇరాన్ ఆ వ్యాఖ్యలను ‘ప్రచార ఆర్భాటం’గా కొట్టిపారేసింది.  

మరోవైపు, ఇజ్రాయెల్-లెబనాన్ సరిహద్దులో కాల్పుల విరమణ ఉన్నప్పటికీ ఉద్రిక్తతలు కొనసాగుతూనే ఉన్నాయి. దక్షిణ లెబనాన్‌లో ఇజ్రాయెల్ దాడుల వల్ల ప్రాణనష్టం సంభవిస్తోంది. రష్యా మధ్యవర్తిత్వం వహించేందుకు మొగ్గు చూపుతుండగా, ఇరాన్ విదేశాంగ మంత్రి అబ్బాస్ అరగ్చీ మాస్కోలో పర్యటించి మద్దతు కోరుతున్నారు. కాగా, యూఏఈ ‘ఒపెక్’ నుంచి వైదొలగడం ప్రపంచ చమురు మార్కెట్‌లో పెను మార్పులకు సంకేతంగా మారింది. అటు బ్రిటన్ రాజు కింగ్ చార్లెస్ సైతం ఇరాన్ అణ్వాయుధాలను కలిగి ఉండకూడదనే అమెరికా వైఖరితో ఏకీభవించినట్లు ట్రంప్ వెల్లడించారు.