మిస్ యూనివర్స్‌తో డేటింగ్.. చేతిలో మాత్రం పైసా లేదు

• సుస్మితా సేన్‌తో ప్రేమాయణంపై విక్రమ్ భట్ సంచలన వ్యాఖ్యలు
• ఒకప్పుడు విషం కొనడానికి కూడా డబ్బుల్లేవంటూ ఆవేదన

బాలీవుడ్ ప్రముఖ దర్శకుడు విక్రమ్ భట్ తన కెరీర్ ప్రారంభంలో ఎదుర్కొన్న తీవ్ర ఆర్థిక ఇబ్బందులను, నటి సుస్మితా సేన్‌తో ఉన్న పాత బంధాన్ని గుర్తుచేసుకుంటూ సంచలన వ్యాఖ్యలు చేశారు. బాలీవుడ్‌లోని అగ్ర నటులతో సినిమాలు చేస్తున్నప్పటికీ, వ్యక్తిగతంగా తాను ఎంతటి దారిద్య్రాన్ని అనుభవించాడో ఆయన బహిరంగంగా పంచుకున్నారు. సిద్ధార్థ్ కన్నన్‌కు ఇచ్చిన తాజా ఇంటర్వ్యూలో విక్రమ్ భట్ మాట్లాడుతూ.. "నేను అప్పట్లో ఇండస్ట్రీలో నిలదొక్కుకోవడానికి ప్రయత్నిస్తున్న సాధారణ దర్శకుడిని. నా పరిస్థితి ఎంత ఘోరంగా ఉండేదంటే.. కనీసం ‘విషం కొనుక్కుని చావడానికి కూడా నా దగ్గర పైసల్లేవు’. ఒకవైపు అమీర్ ఖాన్‌తో ‘గులామ్’ లాంటి భారీ సినిమాకు దర్శకత్వం వహిస్తూ, మరోవైపు మిస్ యూనివర్స్ (సుస్మితా సేన్) తో డేటింగ్ చేస్తున్నాను.. కానీ నా జేబులో మాత్రం ఒక్క రూపాయి కూడా ఉండేది కాదు. కనీసం ఒక మ్యూజిక్ సీడీ కొనేందుకు కూడా నా దగ్గర డబ్బుల్లేక ఒక ఫకీరులా జీవితాన్ని గడిపాను" అని నాటి రోజులను గుర్తుచేసుకున్నారు.

1996లో వచ్చిన సైకలాజికల్ థ్రిల్లర్ ‘దస్తక్’ సినిమా ద్వారా సుస్మితా సేన్ బాలీవుడ్‌లోకి అడుగుపెట్టారు. ఈ చిత్రానికి మహేష్ భట్ దర్శకుడు కాగా, విక్రమ్ భట్ అసిస్టెంట్ డైరెక్టర్‌గా పనిచేశారు. ఆ సమయంలోనే వీరిద్దరి మధ్య పరిచయం ఏర్పడి, అది ప్రేమగా మారింది. విక్రమ్ భట్ చేసిన ఈ వ్యాఖ్యలు.. గతంలో ప్రముఖ వ్యాపారవేత్త లలిత్ మోదీ చేసిన వ్యాఖ్యలను ప్రతిబింబిస్తున్నాయి. సుస్మితా సేన్‌ను కొందరు 'గోల్డ్ డిగ్గర్' (డబ్బు కోసం ఆశపడేది) అని విమర్శించినప్పుడు లలిత్ మోదీ ఆమెకు మద్దతుగా నిలిచారు. తామిద్దరం కలిసి బయటకు వెళ్లినప్పుడు చాలాసార్లు సుస్మితా సేనే బిల్లులు కట్టేదని, ఆమె ఎంతో స్వావలంబన గల మహిళ అని లలిత్ మోదీ స్పష్టం చేశారు. విక్రమ్ భట్ అనుభవం కూడా అలాగే ఉండటం గమనార్హం. సుస్మితతో బంధం ముగిసిన తర్వాత విక్రమ్ భట్ 2002 నుండి 2007 వరకు నటి అమీషా పటేల్‌తో కూడా డేటింగ్ చేశారు. తన జీవితంలోకి వచ్చిన ప్రతి ఒక్కరూ తనకు ఏదో ఒక మంచి పాఠాన్ని నేర్పించారని, తన వ్యక్తిగత బంధాలు ఎక్కువ కాలం నిలవకపోయినా, తను తీసిన సినిమాలు మాత్రం ప్రేక్షకుల హృదయాల్లో ఎప్పటికీ నిలిచిపోతాయని ఆయన పేర్కొన్నారు.

సినిమా ముచ్చట్లు పక్కన పెడితే, విక్రమ్ భట్ , ఆయన భార్య శ్వేతాంబరి సోని (ఆర్ట్ క్యూరేటర్) ఇటీవల ఒక వివాదంలో చిక్కుకున్నారు. ఒక సినిమా ప్రాజెక్టుకు సంబంధించి దాదాపు రూ. 30 కోట్ల ఆర్థిక మోసానికి, నమ్మకద్రోహానికి పాల్పడ్డారనే ఆరోపణలతో గతేడాది డిసెంబర్‌లో రాజస్థాన్ పోలీసులు వీరిని అరెస్ట్ చేశారు. జనవరిలో రాజస్థాన్ హైకోర్టు వీరికి బెయిల్ ఇచ్చేందుకు నిరాకరించినప్పటికీ, ఆ తర్వాత వీరు దేశ అత్యున్నత న్యాయస్థానాన్ని (సుప్రీం కోర్టు) ఆశ్రయించారు. ఫిబ్రవరిలో సుప్రీం కోర్టు జోక్యం చేసుకుని వీరికి బెయిల్ మంజూరు చేయడంతో ఈ జంటకు పెద్ద ఊరట లభించింది. ఆ న్యాయపోరాటం ముగిసిన కొన్ని నెలలకే విక్రమ్ భట్ తన పాత ప్రేమాయణంపై ఇలాంటి సంచలన వ్యాఖ్యలు చేయడం బాలీవుడ్‌లో హాట్ టాపిక్‌గా మారింది.