కేరళంను తాకిన నైరుతి రుతుపవనాలు

•  కేరళంను తాకిన నైరుతి రుతుపవనాలు
• ఐఎండీ అధికారిక ప్రకటన

న్యూఢిల్లీ/తిరువనంతపురం: తీవ్రమైన ఎండలు, ఉక్కపోతతో అల్లాడుతున్న దేశ ప్రజలకు ఉపశమనం కలిగిస్తూ నైరుతి రుతుపవనాలు కేరళంను తాకాయి. ఈ ఏడాది రుతుపవనాల రాక అధికారికంగా ప్రారంభమైందని భారత వాతావరణ శాఖ (ఐఎండీ) గురువారం వెల్లడించింది. దీనితో దేశంలో నాలుగు నెలల పాటు సాగే వర్షపాత కాలం ప్రారంభమైంది. సాధారణంగా జూన్ 1వ తేదీనే రుతుపవనాలు కేరళంను తాకాల్సి ఉన్నప్పటికీ, ఈసారి మూడు రోజులు ఆలస్యంగా జూన్ 4న ఇవి ప్రవేశించాయి. ప్రస్తుతానికి ఈ రుతుపవనాలు లక్షద్వీప్, కేరళం, మాహే ప్రాంతాలను పూర్తిగా చుట్టేసి, ఆగ్నేయ, నైరుతి అరేబియా సముద్రంలోని మిగిలిన ప్రాంతాలకు విస్తరించాయి.

మరో 2-3 రోజుల్లో తెలుగు రాష్ట్రాల్లోకి..

రాబోయే రెండు మూడు రోజుల్లో రుతుపవనాలు మరింత ముందుకు సాగడానికి వాతావరణం అనుకూలంగా ఉందని ఐఎండీ తెలిపింది. ఇవి మధ్య అరేబియా సముద్రంలోని మరికొన్ని ప్రాంతాలకు, గోవా మొత్తానికి, మహారాష్ట్ర, ఆంధ్రప్రదేశ్, కర్ణాటకలోని కొన్ని ప్రాంతాలకు, తమిళనాడులోని మిగిలిన ప్రాంతాలకు, ఈశాన్య రాష్ట్రాలకు విస్తరించే అవకాశం ఉంది. ఈ ఏడాది దేశవ్యాప్తంగా దీర్ఘకాలిక సగటు వర్షపాతంలో 90 శాతం మేర వర్షాలు కురిసే అవకాశం ఉందని వాతావరణ శాఖ అంచనా వేసింది. గడిచిన రెండు రోజులుగా ఆగ్నేయ అరేబియా సముద్రంలో మేఘాలు దట్టంగా అలుముకున్నాయని, పశ్చిమ గాలులు బలపడ్డాయని పేర్కొంది.

భారీ వర్షాల హెచ్చరిక

గడిచిన రెండు రోజులుగా కేరళంలో విస్తారంగా వర్షాలు కురుస్తున్నాయి. రాబోయే 6 నుంచి 7 రోజుల పాటు కేరళంలో అక్కడక్కడా భారీ నుండి అతి భారీ వర్షాలు (7-20 సెం.మీ) కురిసే అవకాశం ఉందని, అలాగే తమిళనాడు, కర్ణాటక రాష్ట్రాల్లో కూడా భారీ వర్షాలు పడవచ్చని ఐఎండీ హెచ్చరించింది. మరోవైపు, దేశ రాజధాని ఢిల్లీలో గురువారం కనీస ఉష్ణోగ్రత 29.7 డిగ్రీల సెల్సియస్‌గా నమోదైంది. అక్కడ రాబోయే రోజుల్లో వర్షాలు , ఉరుములతో కూడిన ఈదురు గాలులు వీచే అవకాశం ఉందంటూ వాతావరణ శాఖ 'ఎల్లో అలర్ట్' జారీ చేసింది.