నెతన్యాహుపై హత్య వార్తలు వదంతులే

•  AI వీడియోతో మొదలైన కుట్ర సిద్ధాంతం.. 
• స్పష్టం చేసిన ఇజ్రాయెల్ ప్రధాని కార్యాలయం!

దుబాయ్‌, మార్చి 15 :   ఇజ్రాయెల్ ప్రధానమంత్రి బెన్యామిన్ నెతన్యాహు హత్యకు గురయ్యారంటూ సోషల్ మీడియాలో వైరల్ అవుతున్న వార్తలను ఆయన కార్యాలయం తీవ్రంగా ఖండించింది. నెతన్యాహు క్షేమంగా ఉన్నారని, సోషల్ మీడియా వేదికగా జరుగుతున్న ప్రచారం అంతా పచ్చి అబద్ధమని (Fake News) ఇజ్రాయెల్ ప్రభుత్వం అధికారికంగా ప్రకటించింది. ఒక విదేశీ వార్తా సంస్థ అడిగిన ప్రశ్నకు సమాధానమిస్తూ, ప్రధాని ఆరోగ్యంగా ఉన్నారని, విధుల్లో నిమగ్నమై ఉన్నారని స్పష్టం చేసింది.  కొన్నిరోజులుగా పశ్చిమాసియాలో యుద్ధం తీవ్రరూపం దాల్చిన నేపథ్యంలో, నెతన్యాహు కనిపించడం లేదంటూ మొదలైన చర్చ చివరకు ఆయన హత్య వార్తల వరకు దారితీసింది.

ఈ వివాదానికి ప్రధాన కారణం ఇజ్రాయెల్ ప్రధాని కార్యాలయం విడుదల చేసిన ఒక వీడియో. అమెరికా, ఇజ్రాయెల్ , ఇరాన్ మధ్య జరుగుతున్న యుద్ధ పరిస్థితులపై నెతన్యాహు ప్రసంగిస్తున్న ఈ వీడియోను 'ఆర్టిఫిషియల్ ఇంటెలిజెన్స్' (AI) ఉపయోగించి సృష్టించినట్లు నెటిజన్లు ఆరోపించారు. ముఖ్యంగా వీడియోలో 0:35 నిమిషాల వద్ద నెతన్యాహు చేతి వేళ్లు అసాధారణంగా ఆరు ఉన్నట్లు కనిపిస్తున్నాయని, ఇది ఏఐ సాంకేతికతలో వచ్చే లోపమని (AI Glitch) కొందరు కుట్ర సిద్ధాంతాలను తెరపైకి తెచ్చారు. అమెరికన్ పొలిటికల్ కామెంటేటర్ క్యాండేస్ ఓవెన్స్ వంటి వారు కూడా "బిబీ ఎక్కడ ఉన్నాడు? ప్రధాని కార్యాలయం ఫేక్ వీడియోలు ఎందుకు విడుదల చేస్తోంది?" అంటూ సోషల్ మీడియాలో ప్రశ్నలు లేవనెత్తడంతో ఈ వార్త దావానలంలా వ్యాపించింది.

అయితే, ఈ ఆరోపణలను సోషల్ మీడియా ప్లాట్‌ఫారమ్ 'X' (గతంలో ట్విట్టర్) కు చెందిన ఏఐ చాట్‌బాట్ 'గ్రోక్' ఫ్యాక్ట్-చెక్ చేసి కొట్టిపారేసింది. నెతన్యాహుకు ఆరు వేళ్లు లేవని, వీడియోలోని నీడలు , కెమెరా యాంగిల్స్ వల్ల అలా భ్రమ కలిగిందని వివరించింది. ప్రభుత్వ అధికారిక రికార్డుల ప్రకారం ఆయనకు ఐదు వేళ్లే ఉన్నాయని, వీడియోలో కనిపిస్తున్నది కేవలం వెలుతురు ప్రభావమేనని స్పష్టం చేసింది. ఫిబ్రవరి 28న ఇరాన్ మాజీ సుప్రీం లీడర్ ఖమేనీ మరణించిన తర్వాత ఈ ప్రాంతంలో యుద్ధ ఉద్రిక్తతలు పెరగడంతో, మానసిక యుద్ధంలో భాగంగానే ఇలాంటి తప్పుడు వార్తలు సృష్టిస్తున్నట్లు విశ్లేషకులు భావిస్తున్నారు.