ముజ్తబా ఖమేనీ శాంతిగా ఉంటారని నేను నమ్మను

• ఇరాన్ కొత్త సుప్రీం లీడర్‌పై ట్రంప్ సంచలన వ్యాఖ్యలు

వాషింగ్టన్ఇ రాన్ నూతన సుప్రీం లీడర్‌గా ముజ్తబా ఖమేనీ నియమితులైన నేపథ్యంలో అమెరికా అధ్యక్షుడు డొనాల్డ్ ట్రంప్  ఘాటుగా స్పందించారు. ఇరాన్ఈ అధికార మార్పిడి పట్ల అసంతృప్తి వ్యక్తం చేసిన ట్రంప్, కొత్త నాయకత్వంలో ఆ దేశం శాంతియుతంగా జీవిస్తుందని తాను ఎంతమాత్రం నమ్మడం లేదని స్పష్టం చేశారు. ఇరాన్ మాజీ సుప్రీం లీడర్ అలీ ఖమేనీ కుమారుడైన ముజ్తబా ఖమేనీని అత్యున్నత పీఠంపై కూర్చోబెట్టడం ద్వారా ఆ దేశం మరింత దూకుడుగా వ్యవహరించే ప్రమాదం ఉందని ఆయన హెచ్చరించారు. పశ్చిమాసియాలో ఉద్రిక్తతలు పతాక స్థాయికి చేరిన ప్రస్తుత తరుణంలో, ఇరాన్ నాయకత్వంలో వచ్చిన ఈ మార్పు ప్రాంతీయ స్థిరత్వానికి గొడ్డలిపెట్టు అని ట్రంప్ అభిప్రాయపడ్డారు. ముజ్తబా ఖమేనీ గతంలో అనుసరించిన కరడుగట్టిన విధానాలను గుర్తుచేస్తూ, ఆయన హయాంలో ఇరాన్ తన వివాదాస్పద అణు కార్యక్రమాన్ని, ఉగ్రవాద సంస్థలకు మద్దతును మరింత వేగవంతం చేసే అవకాశం ఉందని అమెరికా ఆందోళన వ్యక్తం చేస్తున్నది.

ప్రస్తుతం అమెరికా-ఇజ్రాయెల్ కూటమి , ఇరాన్ మధ్య దాడులు, ప్రతిదాడులు కొనసాగుతున్న వేళ ట్రంప్ చేసిన ఈ వ్యాఖ్యలు అంతర్జాతీయ స్థాయిలో చర్చనీయాంశంగా మారాయి. ఇరాన్‌పై గరిష్ట ఒత్తిడి (Maximum Pressure) తీసుకురావడమే తమ లక్ష్యమని, ఆ దేశం తన పంథాను మార్చుకోనంత వరకు కఠిన ఆంక్షలు కొనసాగుతాయని ట్రంప్ పునరుద్ఘాటించారు. ముజ్తబా ఖమేనీ నియామకం ద్వారా ఇరాన్ తన పాత పద్ధతులనే కొనసాగించాలని చూస్తోందని, ఇది ఆ దేశ ప్రజలకు మరియు ప్రపంచ శాంతికి ఏమాత్రం మంచిది కాదని ఆయన వ్యాఖ్యానించారు. అమెరికా ప్రయోజనాలపై ఏ చిన్న ముప్పు వాటిల్లినా ఊరుకునేది లేదని, అవసరమైతే మరిన్ని కఠిన నిర్ణయాలు తీసుకునేందుకు తాము వెనుకాడబోమని ట్రంప్ హెచ్చరించారు. ఈ పరిణామాల నేపథ్యంలో ఇరాన్ కొత్త నాయకత్వం అమెరికా విమర్శలపై ఎలా స్పందిస్తుందనేది ఇప్పుడు ప్రపంచవ్యాప్తంగా ఉత్కంఠ రేకెత్తిస్తోంది.