బెదిరింపులకు లొంగే ప్రసక్తే లేదు

 

• అమెరికా, ఇజ్రాయెల్ సైనిక చర్యలపై ఇరాన్ అధ్యక్షుడు ఆగ్రహం
• ధీటుగా బదులిస్తామని హెచ్చరిక!

టెహ్రాన్: పశ్చిమాసియాలో ముదురుతున్న ఉద్రిక్తతల నేపథ్యంలో ఇరాన్ అధ్యక్షుడు అమెరికా , ఇజ్రాయెల్ కూటమిపై తీవ్రస్థాయిలో ధ్వజమెత్తారు. ఇరాన్ సార్వభౌమత్వాన్ని దెబ్బతీసేలా సాగుతున్న సైనిక చర్యలను ఆయన తీవ్రంగా ఖండించారు. అంతర్జాతీయ వేదికగా సాగుతున్న ఈ బెదిరింపులకు తాము అంత సులభంగా లొంగిపోయే ప్రసక్తే లేదని ఆయన స్పష్టం చేశారు. సోమవారం రాత్రి దేశాన్ని ఉద్దేశించి చేసిన ప్రసంగంలో, అమెరికా , ఇజ్రాయెల్ జరుపుతున్న వైమానిక దాడులు అక్రమమైనవని, అవి అంతర్జాతీయ చట్టాలను తుంగలో తొక్కడమేనని ఆయన మండిపడ్డారు. ఇరాన్ తన ఆత్మగౌరవాన్ని కాపాడుకోవడానికి ఏ స్థాయికైనా వెళ్తుందని, శత్రువుల ప్రతి అడుగును నిశితంగా గమనిస్తున్నామని ఆయన హెచ్చరించారు.

తమ దేశంపై జరుగుతున్న దాడులను కేవలం రక్షణ చర్యలుగా చూడటం లేదని, ఇవి ఇరాన్ ఆర్థిక వ్యవస్థను , ప్రజల స్థిరత్వాన్ని దెబ్బతీసే కుట్రలని అధ్యక్షుడు ఆరోపించారు. ఒకవైపు శాంతి మంత్రాన్ని పఠిస్తూనే, మరోవైపు మారణాయుధాలతో దాడులు చేయడం అమెరికా ద్వంద్వ నీతికి నిదర్శనమని ఆయన విమర్శించారు. ఇరాన్ సైన్యం , విప్లవ దళాలు (IRGC) ఏ క్షణమైనా ఎదురుదాడికి సిద్ధంగా ఉన్నాయని, తమ వద్ద ఉన్న అత్యాధునిక రక్షణ వ్యవస్థలు శత్రువుల క్షిపణులను తిప్పికొట్టగలవని ధీమా వ్యక్తం చేశారు. గతంలోనూ ఇలాంటి ఒత్తిళ్లను ఎదుర్కొన్న అనుభవం తమకు ఉందని, ప్రస్తుత సంక్షోభం నుండి ఇరాన్ మరింత బలంగా బయటపడుతుందని ఆయన ఆశాభావం వ్యక్తం చేశారు.

ప్రపంచ దేశాలు అమెరికా , ఏకపక్ష వైఖరిని ప్రశ్నించాలని, పశ్చిమాసియాలో శాంతిని నెలకొల్పేందుకు చొరవ చూపాలని ఇరాన్ అధ్యక్షుడు కోరారు. యుద్ధం వల్ల ఎవరికీ లాభం లేదని, అయితే తమపై యుద్ధాన్ని రుద్దాలని చూస్తే మాత్రం వెనక్కి తగ్గేది లేదని ఆయన స్పష్టం చేశారు. ఇరాన్ ప్రజలు దేశ రక్షణలో ఐక్యంగా ఉన్నారని, విదేశీశక్తుల బెదిరింపులు తమను మరింత ఏకం చేస్తాయని ఆయన పేర్కొన్నారు. ఇరాన్  అణ్వాయుధ కార్యక్రమం, ఇతర అంతర్గత వ్యవహారాల విషయంలో రాజీ పడే ప్రసక్తే లేదని, తమ దేశ భవిష్యత్తును తామే నిర్ణయించుకుంటామని ఆయన తన ప్రసంగాన్ని ముగించారు.