బెంగాల్ ఎన్నికల సమరం

• మమతా బెనర్జీపై నేరుగా తలపడనున్న సువేందు
• నందిగ్రామ్, భవానీపూర్ రెండింటి నుంచీ పోటీ

పశ్చిమ బెంగాల్ అసెంబ్లీ ఎన్నికల వేళ రాజకీయ వాతావరణం ఒక్కసారిగా వేడెక్కింది. హోరాహోరీ పోరుకు సిద్ధమవుతున్న బీజేపీ, సోమవారం తన తొలి విడత అభ్యర్థుల జాబితాను విడుదల చేసింది. మొత్తం 144 స్థానాలతో కూడిన ఈ జాబితాలో అత్యంత కీలకమైన అంశం ఏమిటంటే.. ప్రతిపక్ష నేత సువేందు అధికారిని ఏకకాలంలో రెండు నియోజకవర్గాల నుంచి బరిలోకి దింపడం. ఆయన తన సొంత గడ్డ అయిన నందిగ్రామ్‌తో పాటు, ముఖ్యమంత్రి మమతా బెనర్జీ ప్రాతినిధ్యం వహిస్తున్న భవానీపూర్ నుంచి కూడా పోటీ చేయనున్నారు. మమతా బెనర్జీని ఆమె కంచుకోటలోనే ఢీకొట్టడం ద్వారా బీజేపీ ఈ ఎన్నికలను 'మమత వర్సెస్ సువేందు' పోరాటంగా మార్చేసింది. 2021 ఎన్నికల్లో నందిగ్రామ్‌లో మమతను ఓడించిన సువేందు, ఈసారి ఆమె ఇలాకాలోనూ జెండా ఎగురవేస్తానని ధీమా వ్యక్తం చేశారు.

బీజేపీ తన తొలి జాబితాలో సిట్టింగ్ ఎమ్మెల్యేలకు పెద్దపీట వేస్తూనే, సామాజిక సమీకరణలకు ప్రాధాన్యం ఇచ్చింది. మాజీ రాష్ట్ర అధ్యక్షుడు దిలీప్ ఘోష్ (ఖరగ్‌పూర్ సదర్), అగ్నిమిత్ర పాల్ (అసన్సోల్ సౌత్), చందనా బౌరి (సాల్తోరా) వంటి 41 మంది సిట్టింగ్ ఎమ్మెల్యేలకు మళ్లీ అవకాశం కల్పించింది. మాజీ క్రికెటర్ అశోక్ దిండా (మొయినా), నటుడు రుద్రనీల్ ఘోష్ (శిబ్‌పూర్) వంటి ప్రముఖులు కూడా బరిలో ఉన్నారు. అయితే, ఏడుగురు సిట్టింగ్ ఎమ్మెల్యేలకు ఈసారి మొండిచేయి ఎదురైంది. అభ్యర్థుల ఎంపికలో వృత్తిపరమైన వైవిధ్యానికి ప్రాధాన్యమిస్తూ.. 57 మంది ఉపాధ్యాయులు, న్యాయవాదులు, వైద్యులు , మాజీ సైనికోద్యోగులను ఎంపిక చేశారు. వయస్సు పరంగా కూడా 36 మంది 40 ఏళ్లలోపు యువకులకు, 11 మంది మహిళలకు చోటు కల్పించడం విశేషం. 'వందేమాతరం' రచయిత బంకిం చంద్ర ఛటర్జీ కుటుంబానికి చెందిన సౌమిత్ర ఛటర్జీని నైహతి నుంచి పోటీకి నిలబెట్టడం గమనార్హం.

మరోవైపు, ఓటర్ల జాబితా సవరణ (సర్‌) ప్రక్రియలో పెద్ద ఎత్తున పేర్ల తొలగింపు జరగడంపై రాజకీయ దుమారం రేగుతోంది. ముఖ్యంగా భవానీపూర్ నియోజకవర్గంలో సుమారు 47,000 మంది ఓటర్ల పేర్లు తొలగించడంపై టీఎంసీ తీవ్ర అభ్యంతరం వ్యక్తం చేస్తోంది. 2011లో కేవలం 4 శాతం ఓట్లతో మొదలైన బీజేపీ, 2021 నాటికి 38 శాతానికి చేరుకుని ప్రధాన ప్రతిపక్షంగా అవతరించింది. ఇప్పుడు అన్నీ తానై నడిపిస్తున్న సువేందు అధికారిని రెండుచోట్ల పోటీకి నిలబెట్టడం ద్వారా, మమతా బెనర్జీని ఆమె నియోజకవర్గానికే పరిమితం చేయాలనేది బీజేపీ వ్యూహంగా కనిపిస్తోంది. ఏప్రిల్ 23, 29 తేదీల్లో రెండు విడతలుగా జరగనున్న ఈ పోలింగ్ ఫలితాలు మే 4న వెలువడనున్నాయి.