ఆరేళ్ల నిద్ర వీడిన ప్రపంచంలోనే అతిపెద్ద యాసిడ్ గీజర్

• ఎల్లోస్టోన్ పార్కులో అద్భుతం.. 
• ఎరుపు రంగు నీటితో ఎగసిపడుతున్న ధారలు!

వయోమింగ్ (అమెరికా): అమెరికాలోని ప్రసిద్ధ ఎల్లోస్టోన్ నేషనల్ పార్క్‌లో ఒక అద్భుతమైన సహజ దృశ్యం ఆవిష్కృతమైంది. ప్రపంచంలోనే అతిపెద్ద ఆమ్ల గుణమున్న (Acidic) గీజర్‌గా పేరుగాంచిన 'ఎకినస్ గీజర్' (Echinus Geyser), ఆరేళ్ల సుదీర్ఘ నిద్ర తర్వాత మళ్ళీ క్రియాశీలకంగా మారింది. 2020 నుంచి ఎటువంటి కదలిక లేకుండా ఉన్న ఈ గీజర్, ఫిబ్రవరి 7వ తేదీన మొదటిసారిగా విస్ఫోటనం చెంది అధికారులను ఆశ్చర్యపరిచింది. ఆ తర్వాత ఫిబ్రవరి 9, 12 , 15 తేదీల్లో వరుసగా విస్ఫోటనాలు సంభవించగా, ఫిబ్రవరి 16 నుంచి దీనివేగం మరింత పుంజుకుంది. అమెరికా జియోలాజికల్ సర్వే (USGS) ప్రకారం, ప్రస్తుతం ఈ గీజర్ ప్రతి రెండు నుంచి ఐదు గంటలకోసారి నీటిని ఆకాశంలోకి చిమ్ముతోంది. సుమారు రెండు నుంచి మూడు నిమిషాల పాటు సాగే ఈ విస్ఫోటనాలు 20 నుంచి 30 అడుగుల ఎత్తు వరకు ఎగసిపడుతున్నాయి, ఈ పరిస్థితి గతంలో 2017లో కనిపించిన రీతిని పోలి ఉందని శాస్త్రవేత్తలు విశ్లేషిస్తున్నారు.

ఈ గీజర్ లోని నీరు ఆమ్ల వాయువులు , తటస్థ జలాల కలయిక వల్ల అసిడిక్ స్వభావాన్ని కలిగి ఉంటుంది. ఇక్కడి నీటిలోని ఇనుము, అల్యూమినియం , ఆర్సెనిక్ సమ్మేళనాల కారణంగా నీరు విభిన్నమైన ఎరుపు రంగులో కనిపిస్తూ పర్యాటకులను ఆకట్టుకుంటోంది. సాధారణంగా ఆమ్ల గీజర్లు చుట్టూ ఉన్న శిలలను కరిగించేస్తాయి, కానీ ఎకినస్‌లోని ఆమ్లత రాళ్లను దెబ్బతీసేంత తీవ్రంగా ఉండదు. సుమారు 66 అడుగుల వెడల్పు ఉండే ఈ గీజర్ చుట్టూ 'సముద్రపు అర్చిన్స్' (Sea Urchins) ఆకారంలో ఉండే శిలలు ఉండటం వల్ల దీనికి ఆ పేరు వచ్చింది. 1878లో మినరాలజిస్ట్ ఆల్బర్ట్ చార్లెస్ పీల్ ఈ ప్రాంతాన్ని సందర్శించినప్పుడు ఆ రాళ్ల ఆకారాన్ని గమనించి ఈ పేరును సూచించారు.

అయితే, ఈ విస్ఫోటనాలు వేసవి వరకు కొనసాగే అవకాశం తక్కువని USGS అభిప్రాయపడుతోంది. ఈ గీజర్ సాధారణంగా ఒకటి రెండు నెలల పాటు క్రియాశీలకంగా ఉండి, ఆపై మళ్ళీ నిద్రాణ స్థితిలోకి వెళ్లే స్వభావాన్ని కలిగి ఉంటుంది. ఫిబ్రవరి చివరిరోజుల్లో ఎటువంటి విస్ఫోటనాలు నమోదు కాకపోవడంతో, ఇది ఇప్పటికే మళ్ళీ నిద్రలోకి వెళ్ళి ఉండవచ్చునని శాస్త్రవేత్తలు భావిస్తున్నారు. 20వ శతాబ్దపు చివరి భాగంలో తరచుగా విస్ఫోటనం చెందిన ఈ గీజర్ వద్ద పర్యాటకుల కోసం ప్రత్యేక వీక్షణ ప్లాట్‌ఫారమ్‌లు, బెంచీలు కూడా అందుబాటులో ఉన్నాయి, ఇవి పర్యాటకులు ఈ సహజ అద్భుతాన్ని దగ్గరగా చూసేందుకు వీలు కల్పిస్తాయి.