వంటగ్యాస్ కొరతపై ప్రియాంకా గాంధీ ఆందోళన

 

•  'ప్రధాని మాటలు నిజమైతే బాగుండు.. కానీ క్షేత్రస్థాయిలో పరిస్థితి వేరు' అంటూ విమర్శలు!

న్యూఢిల్లీ: దేశవ్యాప్తంగా నెలకొన్న ఎల్‌పీజీ (LPG) సిలిండర్ల కొరత అంశంపై కాంగ్రెస్ అగ్రనేత ప్రియాంకా గాంధీ వాద్రా కేంద్ర ప్రభుత్వంపై విమర్శనాత్మక వ్యాఖ్యలు చేశారు. గురువారం ఆమె మీడియాతో మాట్లాడుతూ, దేశంలో వంటగ్యాస్ సరఫరా సాధారణంగానే ఉందన్న ప్రధాని నరేంద్ర మోడీ భరోసాపై తన సందేహాలను వ్యక్తం చేశారు. "ప్రధాని చెప్పినట్లు గ్యాస్ సరఫరాలో ఇబ్బందులు లేవన్న మాట నిజమైతే అంతకంటే సంతోషం మరొకటి ఉండదు, కానీ ప్రస్తుతం దేశంలో కనిపిస్తున్న పరిస్థితులు చూస్తుంటే అది సాధ్యమయ్యేలా కనిపించడం లేదు" అని ఆమె వ్యాఖ్యానించారు. క్షేత్రస్థాయిలో సామాన్య ప్రజలు సిలిండర్ల కోసం గంటల తరబడి నిరీక్షించాల్సి వస్తోందని, నిత్యావసర వస్తువుల ధరలు ఆకాశాన్ని తాకుతున్న తరుణంలో ఈ గ్యాస్ కొరత ప్రజలపై మరింత భారాన్ని మోపుతోందని ఆమె ఆవేదన వ్యక్తం చేశారు.

పశ్చిమాసియాలో జరుగుతున్న యుద్ధం వల్ల అంతర్జాతీయ సప్లై చైన్‌ దెబ్బతిన్న మాట వాస్తవమే అయినప్పటికీ, ప్రభుత్వం ముందుస్తు జాగ్రత్తలు తీసుకోవడంలో విఫలమైందని ప్రియాంక ఆరోపించారు. ప్రభుత్వం కేవలం గణాంకాలు, ప్రకటనలకే పరిమితం కాకుండా, గృహిణులు , సామాన్య పౌరులు ఎదుర్కొంటున్న వాస్తవ సమస్యలను గుర్తించాలని ఆమె డిమాండ్ చేశారు. ధరల పెరుగుదల , కొరత వల్ల మధ్యతరగతి కుటుంబాల బడ్జెట్ తలకిందులవుతోందని, దీనికి ప్రభుత్వం తక్షణమే శాశ్వత పరిష్కారం చూపాలని కోరారు. ముఖ్యంగా పండుగలు, శుభకార్యాల సమయంలో ఈ విధమైన ఇబ్బందులు ఎదురుకావడం ప్రభుత్వ వైఫల్యమేనని ఆమె ధ్వజమెత్తారు.

కాంగ్రెస్ పార్టీ మొదటి నుంచి ప్రజల పక్షాన పోరాడుతోందని, పార్లమెంట్‌లో కూడా తాము ఈ గ్యాస్ కొరత అంశాన్ని లేవనెత్తుతామని ప్రియాంకా గాంధీ స్పష్టం చేశారు. కేవలం మాటలతో కాకుండా, చేతల్లో గ్యాస్ సిలిండర్లను ప్రతి ఇంటికి సకాలంలో అందేలా చూడటమే ప్రభుత్వ బాధ్యతని ఆమె గుర్తు చేశారు. అంతర్జాతీయ సంక్షోభాలను సాకుగా చూపి సామాన్యుడిని ఇబ్బందులకు గురిచేయడం సరికాదని, సరఫరాను క్రమబద్ధీకరించే వరకు తమ పోరాటం ఆగదని ఆమె హెచ్చరించారు. ఈ ప్రకటనతో అటు పార్లమెంట్ లోపల, ఇటు బయట వంటగ్యాస్ రాజకీయం మరింత వేడెక్కింది.