ఇరాన్ లో విషాదం: 1,300 మంది మృతి

•  లక్ష మందికి పైగా నిరాశ్రయులు
• ముదురుతున్న యుద్ధం, చెల్లాచెదురవుతున్న కుటుంబాలు

టెహ్రాన్/వాషింగ్టన్: పశ్చిమాసియాలో వారం రోజులుగా కొనసాగుతున్న భీకర యుద్ధం ఇరాన్ ప్రజల జీవితాలను అతలాకుతలం చేస్తున్నది. అమెరికా , ఇజ్రాయెల్ జరిపిన వరుస వైమానిక దాడుల వల్ల ఇరాన్‌లో ఇప్పటివరకు 1,300 మందికి పైగా ప్రాణాలు కోల్పోయారని, సుమారు ఒక లక్ష మందికి పైగా ప్రజలు తమ ఇళ్లను వదిలి సురక్షిత ప్రాంతాలకు వలస వెళ్లారని అంతర్జాతీయ మానవహక్కుల సంస్థల నివేదికలు వెల్లడిస్తున్నాయి. ఫిబ్రవరి 28న ప్రారంభమైన ఈ ఘర్షణలు రోజురోజుకూ తీవ్రరూపం దాల్చుతుండటంతో మృతుల సంఖ్య ఆందోళనకరంగా పెరుగుతున్నది. మరణించిన వారిలో ఎక్కువమంది పౌరులే ఉన్నారని, ముఖ్యంగా రద్దీగా ఉండే నగరాల్లో జరిగిన దాడుల వల్ల సామాన్యులు బలవుతున్నారని స్వచ్ఛంద సంస్థలు ఆవేదన వ్యక్తం చేస్తున్నాయి. బాంబు దాడుల ధాటికి అనేక భవనాలు శిథిలావస్థకు చేరుకోగా, వేలాదిమంది గాయపడి ఆసుపత్రులలో చికిత్స పొందుతున్నారు.

యుద్ధం కారణంగా ఇరాన్ లోని ప్రధాన నగరాలైన టెహ్రాన్, ఇస్ఫహాన్ , షిరాజ్ వంటి ప్రాంతాల నుంచి లక్షలాదిమంది ప్రజలు గ్రామీణ ప్రాంతాలకు లేదా సరిహద్దులకు తరలిపోతున్నారు. ఆహారం, తాగునీరు, మందుల కొరత తీవ్రంగా ఉండటంతో శరణార్థుల శిబిరాల్లో పరిస్థితులు దయనీయంగా మారాయి. విద్యుత్ , కమ్యూనికేషన్ వ్యవస్థలు దెబ్బతినడంతో సహాయక చర్యలకు తీవ్ర అంతరాయం కలుగుతున్నది. అంతర్జాతీయ రెడ్ క్రాస్ వంటి సంస్థలు బాధితులకు సాయం అందించేందుకు ప్రయత్నిస్తున్నప్పటికీ, నిరంతరాయంగా జరుగుతున్న బాంబు దాడుల వల్ల క్షేత్రస్థాయిలోకి వెళ్లడం సవాలుగా మారింది. యుద్ధం మరికొన్ని వారాల పాటు కొనసాగితే సంక్షోభం మరింత ముదిరి, మరణాల సంఖ్య ఊహించనిస్థాయికి చేరుకోవచ్చని ఐక్యరాజ్యసమితి హెచ్చరిస్తున్నది. ఇటు ఇరాన్ లోపల అస్థిరత నెలకొనగా, అటు సరిహద్దు దేశాలు కూడా శరణార్థుల రాకతో ఒత్తిడికి లోనవుతున్నాయి.