హర్ముజ్ జలసంధిని మూసేసిన ఇరాన్

•  ప్రపంచానికి చమురు సెగ
• ‘నౌకలు వస్తే నిప్పు పెడతాం’ అంటూ భీకర హెచ్చరిక

టెహ్రాన్: పశ్చిమాసియా యుద్ధం ఇప్పుడు ప్రపంచ దేశాల ఇంధన భద్రతను ప్రమాదంలోకి నెట్టింది. అమెరికా-ఇజ్రాయెల్ దాడుల్లో తమ సుప్రీం నేత ఆయతుల్లా అలీ ఖమేనీ మరణించడంతో రగిలిపోతున్న ఇరాన్, కీలకమైన హర్ముజ్ జలసంధిని (Strait of Hormuz) పూర్తిగా మూసివేస్తున్నట్లు సంచలన ప్రకటన చేసింది. నిబంధనలు అతిక్రమించి ఏ నౌక అయినా ఈ మార్గంలో ప్రవేశించడానికి ప్రయత్నిస్తే వాటిని తగులబెడతామని ఇరాన్ రివల్యూషనరీ గార్డ్స్ హెచ్చరించారు. ఈ ప్రకటనతో అంతర్జాతీయ మార్కెట్‌లో ముడిచమురు ధరలు ఒక్కసారిగా భగ్గుమన్నాయి.

ప్రపంచ చమురు రవాణాలో ఐదో వంతు వాటా కలిగిన హర్ముజ్ జలసంధిని ప్రపంచ దేశాల ఇంధన జీవనాడిగా పరిగణిస్తారు. కేవలం కొన్ని కిలోమీటర్ల వెడల్పు ఉండే ఈ మార్గం గుండానే భారత్, చైనా, జపాన్ , దక్షిణ కొరియా వంటి దేశాలకు అత్యధికంగా చమురు, సహజ వాయువు (LNG) సరఫరా అవుతుంది. తాజా హెచ్చరికలతో ఇప్పటికే 150కి పైగా ఆయిల్ ట్యాంకర్లు సముద్రం మధ్యలోనే నిలిచిపోయాయి. రవాణా నిలిచిపోవడంతో ఇన్సూరెన్స్ , షిప్పింగ్ ఖర్చులు భారీగా పెరగనున్నాయి. ఇది పరోక్షంగా నిత్యావసర వస్తువుల ధరల పెరుగుదలకు దారితీసి, ప్రపంచ ఆర్థిక వ్యవస్థను గజగజలాడిస్తోంది. ఇరాన్ తీసుకోబోయే తదుపరి చర్యలపై అగ్రరాజ్యాలు ఆందోళన వ్యక్తం చేస్తున్నాయి.