భారత్-కెనడా బంధంలో నవశకం

•  50 బిలియన్ డాలర్ల వాణిజ్య లక్ష్యం.. 
• మా సంబంధాలు 'లైట్ ఇయర్' దూరం ప్రయాణించాయన్న ప్రధాని మోడీ!

న్యూఢిల్లీ: భారత్ - కెనడాల మధ్య దౌత్య సంబంధాలు గతంలో ఎన్నడూ లేనంతగా బలోపేతమయ్యాయని, రెండు దేశాల బంధం ఒక 'లైట్ ఇయర్' (కాంతి సంవత్సరం) మేర భారీ పురోగతి సాధించిందని ప్రధాని నరేంద్ర మోడీ హర్షం వ్యక్తం చేశారు. సోమవారం న్యూఢిల్లీలో కెనడా ప్రధాని మార్క్ కార్నీతో జరిగిన భేటీ అనంతరం మోడీ కీలక ప్రకటన చేశారు. ఇరు దేశాల మధ్య ద్వైపాక్షిక వాణిజ్యాన్ని రాబోయే కొద్ది ఏళ్లలో 50 బిలియన్ డాలర్లకు (సుమారు రూ. 4.15 లక్షల కోట్లు) చేర్చడమే లక్ష్యంగా ఒక భారీ ప్రణాళికను ఆయన ఆవిష్కరించారు. గతంలో ఉన్న దౌత్యపరమైన సవాళ్లను అధిగమించి, పరస్పర విశ్వాసంతో కొత్త అధ్యాయాన్ని ప్రారంభించామని ఇరువురు నేతలు స్పష్టం చేశారు.

ఈ చరిత్రాత్మక భేటీలో వాణిజ్యంతో పాటు టెక్నాలజీ, క్లీన్ ఎనర్జీ , కీలక ఖనిజాల సరఫరాపై ప్రధానంగా ఒప్పందాలు కుదిరాయి. కెనడాలోని అపారమైన సహజ వనరులు, భారత్‌లోని నైపుణ్యం కలిగిన మానవ వనరులు కలిస్తే ప్రపంచ ఆర్థికవ్యవస్థకు కొత్త ఊపు వస్తుందని ప్రధాని అభిప్రాయపడ్డారు. ముఖ్యంగా సెమీకండక్టర్ల తయారీ , గ్రీన్ హైడ్రోజన్ రంగాల్లో ఉమ్మడి పెట్టుబడులు పెట్టడానికి ఇరు దేశాలు అంగీకరించాయి. కెనడా ప్రధాని మార్క్ కార్నీ మాట్లాడుతూ.. భారత్ వంటి వేగంగా ఎదుగుతున్న ఆర్థికవ్యవస్థతో భాగస్వామ్యం కెనడాకు అత్యంత ఆవశ్యకమని పేర్కొన్నారు. ఈ పర్యటన ద్వారా రెండు దేశాల మధ్య నెలకొన్న గ్యాప్ పూర్తిగా తొలగిపోయిందని, ఇది కేవలం వ్యాపారానికే పరిమితం కాకుండా భద్రతా పరమైన అంశాల్లో కూడా సహకారాన్ని పెంచుతుందని విశ్లేషకులు భావిస్తున్నారు.