‘వారణాసి’ షూటింగ్‌ 80 శాతం పూర్తి

• కీలక అప్‌డేట్‌ ఇచ్చిన స్టార్ డైరెక్టర్ రాజమౌళి

హైదరాబాద్‌: సూపర్‌స్టార్‌ మహేశ్‌బాబు హీరోగా దర్శకధీరుడు ఎస్‌.ఎస్‌. రాజమౌళి తెరకెక్కిస్తున్న ప్రతిష్ఠాత్మక యాక్షన్‌ అడ్వెంచర్‌ చిత్రం **‘వారణాసి’**పై దర్శకుడు కీలక అప్‌డేట్‌ ఇచ్చారు. ప్రియాంక చోప్రా కథానాయికగా, పృథ్వీరాజ్‌ సుకుమారన్‌ ప్రతినాయకుడిగా నటిస్తున్న ఈ చిత్రం టైమ్‌ ట్రావెల్‌ నేపథ్యంలో భారీ బడ్జెట్‌తో రూపొందుతోంది. తాజాగా ఓ అంతర్జాతీయ పత్రికకు ఇచ్చిన ఇంటర్వ్యూలో సినిమా షూటింగ్‌ పురోగతి, కథా నేపథ్యంపై ఆసక్తికర విషయాలు వెల్లడించారు.

రాజమౌళి తెలిపిన వివరాల ప్రకారం ఇప్పటికే ‘వారణాసి’ చిత్రీకరణలో 80 శాతం పూర్తయ్యింది. ప్రధాన యాక్షన్‌ సన్నివేశాలు, కీలక ఎపిసోడ్‌ల చిత్రీకరణ ముగిసిందని, ప్రస్తుతం మిగిలిన చిన్న చిన్న సన్నివేశాలను చిత్రీకరిస్తున్నామని చెప్పారు. ఈ సినిమా కథ అభివృద్ధి ప్రక్రియను 2022లో ప్రారంభించామని, పూర్తి స్థాయిలో రూపుదిద్దుకోవడానికి దాదాపు నాలుగున్నరేళ్లు పట్టిందని వెల్లడించారు.

సినిమా కథ గురించి పూర్తిగా చెప్పలేనని పేర్కొన్న రాజమౌళి, తాను ‘ఇండియానా జోన్స్‌’ చిత్రాల అభిమానినని తెలిపారు. ప్రేక్షకులు కథ నేపథ్యాన్ని అర్థం చేసుకునేలా ప్రత్యేకంగా గ్లింప్స్‌ను విడుదల చేశామని చెప్పారు. ఆ గ్లింప్స్‌ను పరిశీలిస్తే కథ వారణాసిలో ప్రారంభమై అంటార్కిటికా, ఆఫ్రికా మీదుగా రామాయణ కాలానికి ప్రయాణించి మళ్లీ వారణాసికే చేరుకుంటుందని వివరించారు.

సినిమాలోని విజువల్‌ గ్రాండియర్‌ కారణంగానే దీన్ని ఐమ్యాక్స్‌ ఫార్మాట్‌లో తెరకెక్కిస్తున్నామని రాజమౌళి తెలిపారు. 300 అడుగులకు పైగా ఉన్న మంచు కొండలు, రామాయణ కాలంలోని విస్తారమైన వానర సేన వంటి భారీ దృశ్యాలను అత్యంత అద్భుతంగా చూపించేందుకు ఐమ్యాక్స్‌ సాంకేతికతను ఎంచుకున్నట్లు చెప్పారు.

హాలీవుడ్‌ దర్శకుడు క్రిస్టఫర్‌ నోలన్‌ తనకు ఎంతో ఇష్టమని, ఆయన సినిమాల ప్రభావం తనపై ఉందని రాజమౌళి పేర్కొన్నారు. హాలీవుడ్‌ చిత్రాలతో తన సినిమాలను పోల్చినా తనకు ఎలాంటి అభ్యంతరం లేదని స్పష్టం చేశారు.

ఇదిలా ఉంటే, ఒకవైపు చిత్రీకరణ కొనసాగుతుండగానే మరోవైపు పోస్ట్‌ ప్రొడక్షన్‌ పనులు కూడా వేగంగా సాగుతున్నాయి. పలు అంతర్జాతీయ వీఎఫ్‌ఎక్స్‌ సంస్థలు ఈ చిత్రానికి పని చేస్తున్నాయి. దుర్గా ఆర్ట్స్‌ పతాకంపై కేఎల్‌. నారాయణ, ఎస్‌.ఎస్‌. కార్తికేయ నిర్మిస్తున్న ఈ చిత్రానికి ఎంఎం కీరవాణి సంగీతం అందిస్తున్నారు. వచ్చే ఏడాది ఏప్రిల్‌ 7న ‘వారణాసి’ని ప్రపంచవ్యాప్తంగా విడుదల చేయాలని చిత్రబృందం లక్ష్యంగా పెట్టుకుంది.