ఆదాయపు పన్ను చట్టం 2025కు ముహూర్తం ఖరారు

• ఏప్రిల్ 1 నుంచి కొత్త నిబంధనలు అమలు

న్యూఢిల్లీ: కేంద్ర ఆర్థిక మంత్రి నిర్మలా సీతారామన్ లోక్‌సభలో వరుసగా 9వ సారి బడ్జెట్‌ను ప్రవేశపెడుతూ పన్నుల వ్యవస్థలో కీలక మార్పులను ప్రకటించారు. కొత్తగా రూపొందించిన ఆదాయపు పన్ను చట్టం 2025 (Income Tax Act 2025) వచ్చే ఆర్థిక సంవత్సరం ప్రారంభం నుంచి, అంటే ఏప్రిల్ 1, 2026 నుంచి అమల్లోకి వస్తుందని ఆమె స్పష్టం చేశారు. పన్ను చెల్లింపుదారులకు ప్రక్రియను మరింత సరళతరం చేస్తూ ఈ కొత్త చట్టాన్ని తీసుకువచ్చారు.

కనెక్టివిటీ అండ్‌ టూరిజం: హై-స్పీడ్ రైలు కారిడార్లు

పర్యావరణ హితమైన రవాణా వ్యవస్థను ప్రోత్సహిస్తూ, దేశంలోని ప్రధాన నగరాల మధ్య ఆర్థిక వృద్ధిని వేగవంతం చేసేందుకు ఏడు కొత్త హై-స్పీడ్ రైలు కారిడార్లను (High-Speed Rail Corridors) ప్రభుత్వం అభివృద్ధి చేయనున్నది.

ముంబై నుండి పూణే

పూణే నుండి హైదరాబాద్

హైదరాబాద్ నుండి బెంగళూరు

హైదరాబాద్ నుండి చెన్నై

చెన్నై నుండి బెంగళూరు

ఢిల్లీ నుండి వారణాసి

వారణాసి నుండి సిలిగురి

జల రవాణా -  పర్యాటక రంగం

రాబోయే ఐదేళ్లలో 20 కొత్త జాతీయ జలమార్గాలను (National Waterways) అందుబాటులోకి తీసుకురావాలని ప్రభుత్వం లక్ష్యంగా పెట్టుకుంది. అలాగే, దేశంలోని మారుమూల ప్రాంతాలకు రవాణా సౌకర్యాలను మెరుగుపరిచేందుకు మరియు పర్యాటక రంగాన్ని ప్రోత్సహించేందుకు 'సీ ప్లేన్ల' (Seaplanes) తయారీని దేశీయంగా ప్రోత్సహించనున్నట్లు మంత్రి ప్రకటించారు. ఇందుకోసం ప్రత్యేక ప్రోత్సాహకాలను (Incentives) అందించాలని ప్రతిపాదించారు.

భారత ఆర్థిక ప్రగతికి ఆరు సూత్రాల వ్యూహం

 

• లోకసభలో కేంద్ర బడ్జెట్ 2026-27ను ప్రవేశపెట్టిన ఆర్థిక మంత్రి నిర్మలా సీతారామన్

న్యూఢిల్లీ: దేశ ఆర్థిక వృద్ధిని మరింత వేగవంతం చేస్తూ, దానిని సుస్థిరంగా కొనసాగించే లక్ష్యంతో కేంద్ర ఆర్థిక మంత్రి నిర్మలా సీతారామన్ 2026-27 ఆర్థిక సంవత్సరానికి సంబంధించిన కేంద్ర బడ్జెట్‌ను లోకసభలో ప్రవేశపెట్టారు. ఈ సందర్భంగా ఆమె ప్రసంగిస్తూ భారత ఆర్థిక వ్యవస్థను పటిష్టం చేసేందుకు ఆరు కీలక రంగాలపై ప్రత్యేక దృష్టి సారించనున్నట్లు ప్రకటించారు. 

• వ్యూహాత్మక, అత్యాధునికమైన ఏడు రంగాలలో ఉత్పాదకతను భారీగా పెంచడం
• పాత పారిశ్రామిక రంగాలకు పునరుత్తేజం కలిగించడం
• ఎంఎస్ఎంఈలను గ్లోబల్ ఛాంపియన్లుగా తీర్చిదిద్దడం 
• వీటితో పాటు మౌలిక సదుపాయాల కల్పనకు భారీ ఊతాన్నివ్వడం
• దేశ దీర్ఘకాలిక భద్రత , స్థిరత్వాన్ని నిర్ధారించడం
• నగరాలను ఆర్థిక మండలాలుగా అభివృద్ధి చేయడం

వీటిపై ప్రభుత్వం ప్రత్యేక కార్యాచరణను రూపొందించింది.

ఆత్మనిర్భర్ భారత్ నినాదం దేశీయ ఉత్పాదక సామర్థ్యాన్ని పెంచడమే కాకుండా, ఇంధన భద్రతను మెరుగుపరిచి విదేశీ దిగుమతులపై ఆధారపడటాన్ని గణనీయంగా తగ్గించిందని మంత్రి వివరించారు. ప్రభుత్వం చేపట్టిన సంస్కరణల వల్ల ఉపాధి కల్పన పెరగడమే కాకుండా, వ్యవసాయ ఉత్పాదకత, సామాన్యుల కొనుగోలు శక్తి కూడా మెరుగుపడిందని ఆమె పేర్కొన్నారు. ఈ సంస్కరణల ఫలితంగానే దేశం ప్రస్తుతం సుమారు 7 శాతం వృద్ధి రేటును నమోదు చేస్తూ, పేదరిక నిర్మూలనలో, ప్రజల జీవన ప్రమాణాలను పెంచడంలో గణనీయమైన పురోగతిని సాధిస్తున్నదని ధీమా వ్యక్తం చేశారు. ప్రభుత్వ ప్రతి చర్య, పథకం నేరుగా పౌరులకు ప్రయోజనం చేకూర్చేలా తమ ప్రభుత్వం కట్టుబడి ఉందని ఆర్థికమంత్రి స్పష్టం చేశారు.

భారత్‌కు వెనెజువెలా చమురు

• డొనాల్డ్ ట్రంప్ సంచలన ప్రకటన

వాషింగ్టన్: భారత్ ఇకపై వెనెజువెలా నుంచి భారీస్థాయిలో చమురు దిగుమతి చేసుకోబోతున్నదని అమెరికా అధ్యక్షుడు డొనాల్డ్ ట్రంప్ ప్రకటించారు. విమానం 'ఎయిర్‌ఫోర్స్ వన్'లో ప్రయాణిస్తుండగా విలేకరులతో మాట్లాడిన ఆయన, వెనెజువెలాతో కుదిరిన చమురు ఒప్పందంలో భారత్ కూడా భాగస్వామి కాబోతున్నదని వెల్లడించారు. ఇరాన్ నుంచి చమురు దిగుమతులను తగ్గించి, వెనెజువెలా వైపు మొగ్గు చూపేలా ఒక అవగాహన ఒప్పందం కుదిరిందని, దీనివల్ల అంతర్జాతీయ చమురు మార్కెట్లో పెను మార్పులు రాబోతున్నాయని ఆయన పేర్కొన్నారు.

అమెరికా గుప్పిట్లోనే వెనెజువెలా చమురు 

వెనెజువెలాలో ఇటీవల చోటుచేసుకున్న రాజకీయ మార్పులపై ట్రంప్ బాహాటంగానే స్పందించారు. ఆ దేశం ఇప్పుడు తమ నియంత్రణలోనే ఉందని, అక్కడ తాము కోరుకున్నట్లుగానే తాత్కాలిక అధ్యక్షురాలు డెల్సీ రోడ్రిగ్జ్ పరిపాలన సాగిస్తున్నారని తెలిపారు. వెనెజువెలాలోని అపారమైన చమురు నిల్వలు పూర్తిగా అమెరికా పర్యవేక్షణలోకి వచ్చే వరకు ఆమెనే తాత్కాలిక నాయకురాలిగా కొనసాగిస్తామని స్పష్టం చేశారు. కేవలం భారత్ మాత్రమే కాకుండా, చైనా కూడా వెనెజువెలా చమురు కోసం తమతో చర్చలు జరిపే అవకాశం ఉందని, ఆ ప్రతిపాదనను తాము ఆహ్వానిస్తామని ట్రంప్ పేర్కొన్నారు.

భారత్ మౌనం - దౌత్యపరమైన వ్యూహం? 

ట్రంప్ ఇంతటి భారీ ప్రకటన చేసినప్పటికీ, భారత ప్రభుత్వం నుండి అధికారికంగా ఎటువంటి స్పందన రాలేదు. అయితే, ఇటీవల భారత ప్రధాని నరేంద్ర మోడీ, వెనెజువెలా తాత్కాలిక అధ్యక్షురాలు డెల్సీ రోడ్రిగ్జ్‌తో ఫోన్‌లో మాట్లాడటం ఈ వార్తలకు బలం చేకూరుస్తున్నది. వారిద్దరి మధ్య ఇంధనం, వాణిజ్యం, పెట్టుబడుల గురించి చర్చలు జరిగినట్లు సమాచారం. రష్యాపై ఆంక్షల నేపథ్యంలో, ప్రత్యామ్నాయ ఇంధన వనరుల కోసం చూస్తున్న భారత్‌కు వెనెజువెలా చమురు ఒక గొప్ప అవకాశంగా మారే అవకాశం ఉందని విశ్లేషకులు భావిస్తున్నారు.

అగ్రరాజ్యంతో యుద్ధం మాకు ఇష్టం లేదు

•  ఇరాన్ అధ్యక్షుడు సంచలన ప్రకటన

టెహ్రాన్: పశ్చిమాసియాలో ముదురుతున్న యుద్ధ మేఘాల మధ్య ఇరాన్ అధ్యక్షుడు మసౌద్ పెజెష్కియాన్ శాంతి మంత్రాన్ని పఠించారు. అమెరికాతో యుద్ధం చేయడం తమకు ఏమాత్రం ఇష్టం లేదని ఆయన స్పష్టం చేశారు. ఈజిప్టు అధ్యక్షుడు అబ్డెల్ ఫత్తాహ్ ఎల్‌సిసితో ఫోన్‌లో మాట్లాడిన సందర్భంగా పెజెష్కియాన్ ఈ కీలక వ్యాఖ్యలు చేశారు. ఇరాన్ లేదా అమెరికా.. ఎవరికైనా సరే సంఘర్షణల వల్ల ఎలాంటి ప్రయోజనం ఉండదని, శాంతితోనే సమస్యలు పరిష్కారమవుతాయని ఆయన అభిప్రాయపడ్డారు.

పశ్చిమ దేశాలపై తీవ్ర విమర్శలు

అమెరికా అధ్యక్షుడు డొనాల్డ్ ట్రంప్, ఇజ్రాయెల్ ప్రధాని నెతన్యాహు , ఐరోపా దేశాల నాయకులు ఇరాన్ అంతర్గత విషయాల్లో జోక్యం చేసుకుంటున్నారని పెజెష్కియాన్ మండిపడ్డారు. టెహ్రాన్‌లోని ఆర్థిక ఇబ్బందులను అడ్డం పెట్టుకుని ప్రజలను రెచ్చగొడుతున్నారని, దేశాన్ని ముక్కలు చేయడానికి కుట్రలు పన్నుతున్నారని ఆరోపించారు. స్థానిక మీడియాలో విడుదలైన వీడియోలో ఆయన మాట్లాడుతూ, ఇరాన్‌లో జరుగుతున్న ఆందోళనలు కేవలం సామాజిక నిరసనలు కావని, అవి విదేశీ ప్రేరేపితమైనవని ధ్వజమెత్తారు.

చర్చలపై ట్రంప్ స్పందన

ఇదిలా ఉండగా, ఇరాన్ తమతో చర్చలకు సిద్ధమైందని అమెరికా అధ్యక్షుడు డొనాల్డ్ ట్రంప్ ధృవీకరించారు. ఇరు దేశాల మధ్య ఒప్పందం జరుగుతుందో లేదో వేచి చూడాలని ఆయన వ్యాఖ్యానించారు. అయితే, శాంతి గురించి మాట్లాడుతూనే ట్రంప్ పరోక్ష హెచ్చరికలు కూడా జారీ చేశారు. ఇప్పటికే అమెరికా యుద్ధనౌకలు ఇరాన్ దిశగా కదులుతున్నాయని గుర్తు చేస్తూ, భద్రతా కారణాల దృష్ట్యా తమ తదుపరి కార్యాచరణను ఇప్పుడే వెల్లడించలేమని స్పష్టం చేశారు. ఈ పరిణామాలు గమనిస్తుంటే, ఇరు దేశాల మధ్య దౌత్యపరమైన చర్చలు మొదలైనప్పటికీ, క్షేత్రస్థాయిలో మాత్రం యుద్ధ వాతావరణం ఇంకా చల్లారలేదని సమాచారం.

నేడు సిట్ విచారణ

• హైదరాబాద్‌కు చేరుకున్న మాజీ సీఎం
• నందినగర్‌లో భారీ భద్రత

హైదరాబాద్: సంచలనం సృష్టించిన ఫోన్ ట్యాపింగ్ కేసులో భాగంగా భారత్ రాష్ట్ర సమితి (బీఆర్ఎస్) అధినేత, మాజీ ముఖ్యమంత్రి కె. చంద్రశేఖర్ రావును సిట్ (SIT) అధికారులు నేడు విచారించనున్నారు. ఈ విచారణ నిమిత్తం కేసీఆర్ గజ్వేల్‌లోని తన ఎర్రవల్లి ఫామ్‌హౌస్ నుండి హైదరాబాద్‌లోని నందినగర్ నివాసానికి చేరుకున్నారు.

ఎర్రవల్లి నివాసం వద్ద ఉత్కంఠ

కేసీఆర్ హైదరాబాద్‌కు బయలుదేరే ముందు ఎర్రవల్లి వద్ద ఉద్రిక్త వాతావరణం నెలకొంది. పెద్ద ఎత్తున తరలివచ్చిన పార్టీ కార్యకర్తలు, నేతలు ప్రభుత్వానికి వ్యతిరేకంగా నినాదాలు చేశారు. కేసీఆర్‌కు తగిలిన దిష్టి పోవాలని, అపవాదుల నుంచి ఆయన బయటపడాలని ఆకాంక్షిస్తూ కార్యకర్తలు గుమ్మడికాయలతో దిష్టి తీశారు. అనంతరం భారీ కాన్వాయ్‌తో ఆయన నందినగర్ బయలుదేరారు.

నందినగర్‌లో కట్టుదిట్టమైన భద్రత 

మధ్యాహ్నం 3 గంటలకు సిట్ అధికారులు కేసీఆర్ నివాసంలోనే ఆయనను ప్రశ్నించనున్నారు. ఈ నేపథ్యంలో హైదరాబాద్‌లోని నందినగర్ పరిసర ప్రాంతాలను పోలీసులు తమ ఆధీనంలోకి తీసుకున్నారు. ఎక్కడికక్కడ బారికేడ్లు ఏర్పాటు చేసి, ఇతర వ్యక్తులు రాకుండా ఆంక్షలు విధించారు. కేసీఆర్ నివాసంలోకి కేవలం కుటుంబసభ్యులకు, విచారణ అధికారులకు మాత్రమే అనుమతి ఉంది. పార్టీ శ్రేణులు, అనుచరులు లోపలికి రాకుండా కఠిన నియమాలు అమలు చేస్తున్నారు.  విచారణకు ముందే మాజీ మంత్రి కేటీఆర్ నందినగర్ నివాసానికి చేరుకుని ఏర్పాట్లను పర్యవేక్షిస్తున్నారు. కేసీఆర్‌ను అధికారులు ఎలాంటి ప్రశ్నలు వేయబోతున్నారు, ఈ విచారణ ఎంతసేపు సాగుతుందనే అంశంపై ఇప్పుడు రాష్ట్ర రాజకీయాల్లో ఆసక్తి నెలకొంది.

మతువా సమాజం భయపడాల్సిన అవసరం లేదు

• నజీరాబాద్ అగ్నిప్రమాదంపై నిష్పక్షపాత విచారణకు డిమాండ్
• పశ్చిమ బెంగాల్‌లో అమిత్ షా గర్జన

బారక్‌పూర్: పశ్చిమ బెంగాల్‌లోని మతువా , నమఃశూద్ర వర్గాలను రాష్ట్ర ప్రభుత్వం భయభ్రాంతులకు గురిచేస్తున్నదని కేంద్ర హోం మంత్రి అమిత్ షా తీవ్రంగా ఆరోపించారు. ఉత్తర 24 పరగణాల జిల్లా బారక్‌పూర్‌లోని ఆనంద్‌పురి మైదానంలో జరిగిన బీజేపీ కార్యకర్తల సదస్సులో ఆయన ప్రసంగించారు. రాష్ట్ర ప్రభుత్వం ఎంత వ్యతిరేకించినా ఎస్ఐఆర్ (SIR) ప్రక్రియ రాష్ట్రంలో కొనసాగి తీరుతుందని, మతువా, నమఃశూద్ర వర్గాల వారు దేనికీ భయపడాల్సిన అవసరం లేదని ఆయన హామీ ఇచ్చారు. సరిహద్దు ప్రాంతాల్లో ఫెన్సింగ్ (కంచె) ఏర్పాటు చేయడంలో రాష్ట్ర ప్రభుత్వం ఏమాత్రం సహకరించడం లేదని, దీనివల్ల భద్రతా పరమైన సమస్యలు తలెత్తుతున్నాయని ఆయన మండిపడ్డారు.

మరోవైపు దక్షిణ 24 పరగణాల జిల్లా నరేంద్రపూర్‌లోని నజీరాబాద్‌లో జరిగిన గోదాము అగ్నిప్రమాదంపై అమిత్ షా స్పందిస్తూ.. 27 మంది ప్రాణాలు కోల్పోయిన ఈ ఘటనపై నిష్పక్షపాత విచారణ జరగాలని డిమాండ్ చేశారు. ఈ దుర్ఘటన అధికార పార్టీ అవినీతికి పరాకాష్ట అని, మృతుల విషయంలో కూడా ముఖ్యమంత్రి ఓటు బ్యాంకు రాజకీయాలు చేయడం సిగ్గుచేటని ఆయన విమర్శించారు. అధికార పార్టీకి అత్యంత సన్నిహితులు ఈ ఘటనలో ప్రమేయం కలిగి ఉన్నారని, అందుకే సదరు మోమో కంపెనీ యజమానిని ఇప్పటివరకు అరెస్టు చేయలేదని ఆయన ఆరోపించారు. బెంగాల్‌లో శాంతిభద్రతలు పూర్తిగా క్షీణించాయని, ప్రజలు మార్పు కోరుకుంటున్నారని ఆయన ఈ సందర్భంగా పేర్కొన్నారు.

ఐరాస వేదికపై భారత్ గళం

• సామాజిక అభివృద్ధి సదస్సులో భారత ప్రతినిధి బృందానికి సావిత్రి ఠాకూర్ నాయకత్వం

న్యూఢిల్లీ: న్యూయార్క్‌లోని ఐక్యరాజ్యసమితి ప్రధాన కార్యాలయంలో జరగనున్న సామాజిక అభివృద్ధి కమిషన్ 64వ సెషన్‌కు భారత ప్రతినిధి బృంద నాయకురాలిగా కేంద్ర మహిళా శిశు అభివృద్ధి శాఖ సహాయ మంత్రి సావిత్రి ఠాకూర్ వ్యవహరించనున్నారు. వచ్చే నెల 2వ తేదీ నుంచి ప్రారంభం కానున్న ఈ వార్షిక సదస్సులో సామాజిక చేరిక, సమానత్వం, సంక్షేమ ఆధారిత విధానాలపై అంతర్జాతీయ సహకారాన్ని పెంపొందించడమే ప్రధాన లక్ష్యంగా చర్చలు సాగనున్నాయి. ప్రపంచ దేశాలన్నీ తమ ప్రగతిని సమీక్షించుకోవడానికి, అనుభవాలను పంచుకోవడానికి , ఉత్తమ పద్ధతులను ఇచ్చిపుచ్చుకోవడానికి ఈ సదస్సు ఒక ప్రపంచ వేదికగా నిలవనుంది.

ఈ ప్రతిష్టాత్మక సదస్సులో భారత్ పాల్గొనడం అనేది సామాజికాభివృద్ధికి సంబంధించిన బహుళపక్ష ప్రయత్నాలలో దేశం చూపుతున్న నిరంతర చురుకుదనాన్ని ప్రతిబింబిస్తుందని కేంద్ర మహిళా శిశు అభివృద్ధి శాఖ తెలిపింది. ప్రపంచ సామాజిక విధాన ప్రాధాన్యాలపై నిర్మాణాత్మక చర్చలు జరపడానికి భారత్ కట్టుబడి ఉందని ఈ పర్యటన చాటిచెబుతున్నది. ఈ పర్యటన సందర్భంగా మంత్రి సావిత్రి ఠాకూర్ ఐరాసకు చెందిన వివిధ విభాగాల ప్రతినిధులతో , ఇతర సభ్య దేశాల ప్రతినిధులతో సమావేశమై సామాజికాభివృద్ధికి సంబంధించిన కీలక అంశాలపై చర్చలు జరపనున్నారు. ఇది అంతర్జాతీయస్థాయిలో భారతదేశపు సామాజిక సంక్షేమ పథకాలు, విధానాలను వివరించడానికి ఒక గొప్ప అవకాశంగా నిలవనుంది.

భారత్ - అరబ్ దేశాల మధ్య సరికొత్త బంధం

•  ఢిల్లీలో అరబ్ విదేశాంగ మంత్రులతో ప్రధాని మోడీ భేటీ

న్యూఢిల్లీ:న్యూఢిల్లీలో జరిగిన రెండవ భారత్-అరబ్ విదేశాంగ మంత్రుల సమావేశం సందర్భంగా అరబ్ దేశాల విదేశాంగ మంత్రులు, అరబ్ లీగ్ సెక్రటరీ జనరల్, వివిధ దేశాల ప్రతినిధి బృందాలతో ప్రధాని నరేంద్ర మోడీ ప్రత్యేకంగా సమావేశమయ్యారు. ఈ సందర్భంగా భారత్ మరియు అరబ్ ప్రపంచం మధ్య శతాబ్దాలుగా కొనసాగుతున్న చరిత్రాత్మక సంబంధాలను ప్రధాని గుర్తుచేశారు. ఉమ్మడి సంస్కృతి, ప్రజల మధ్య ఉన్న లోతైన అనుబంధమే ఇరుదేశాల మధ్య మైత్రిని మరింత బలోపేతం చేస్తున్నాయని ఆయన కొనియాడారు.

భారత్ - అరబ్ దేశాల భాగస్వామ్యంపై తన దార్శనికతను వివరిస్తూ.. రాబోయే కాలంలో వాణిజ్యం, పెట్టుబడులు, ఇంధనం, సాంకేతికత , ఆరోగ్య రంగాలలో సహకారాన్ని మరింత విస్తృతం చేయాలని ప్రధాని పిలుపునిచ్చారు. ఇరు దేశాల ప్రజల పరస్పర ప్రయోజనాల కోసం ప్రాధాన్యం కలిగిన రంగాల్లో కలిసి పనిచేసేందుకు భారత్ ఎల్లప్పుడూ కట్టుబడి ఉంటుందని ఆయన పునరుద్ఘాటించారు. ఈ భాగస్వామ్యం కేవలం ఆర్థిక సంబంధాలకే పరిమితం కాకుండా, ప్రపంచ శాంతికి కూడా దోహదపడుతుందని ఆయన అభిప్రాయపడ్డారు.

అదే సమయంలో పాలస్తీనా ప్రజలకు భారత్ ఎప్పుడూ అండగా ఉంటుందని ప్రధాని మోడీ మరోసారి స్పష్టం చేశారు. గాజా శాంతి ప్రణాళికతో సహా ప్రాంతీయ శాంతి,  స్థిరత్వం కోసం జరుగుతున్న ప్రయత్నాలను ఆయన స్వాగతించారు. మధ్యప్రాచ్యంలో శాంతి నెలకొల్పడానికి అరబ్ లీగ్ పోషిస్తున్న క్రియాశీలక పాత్రను ప్రధాని ఈ సందర్భంగా ప్రత్యేకంగా ప్రశంసించారు.

భారత్ - ఈయూ వాణిజ్య ఒప్పందంతో ఎగుమతులకు రెక్కలు

• ఐదేళ్లలో రెట్టింపు లక్ష్యం 
• కేంద్ర మంత్రి పీయూష్ గోయల్ ధీమా 

న్యూఢిల్లీ: కేంద్ర వాణిజ్య, పరిశ్రమల శాఖ మంత్రి పీయూష్ గోయల్ భారత్ - యూరోపియన్ యూనియన్ (ఈయూ) మధ్య కుదిరిన స్వేచ్ఛా వాణిజ్య ఒప్పందంపై కీలక వ్యాఖ్యలు చేశారు. ఈ ఒప్పందం వల్ల రాబోయే ఐదేళ్లలో ఐరోపా దేశాలకు భారత్ చేసే ఎగుమతులు రెట్టింపు అవుతాయని ఆయన ఆశాభావం వ్యక్తం చేశారు. దేశంలోని వ్యాపారవేత్తలు, సూక్ష్మ, చిన్న, మధ్య తరహా పరిశ్రమలు (ఎంఎస్‌ఎంఈ), స్టార్టప్‌లు . పారిశ్రామికవేత్తలు అంతర్జాతీయ మార్కెట్లలో తమ ముద్ర వేయడంపై దృష్టి సారించాలని ఆయన కోరారు. ఈ చరిత్రాత్మక ఒప్పందం వల్ల దేశానికి చేకూరే వివిధ ప్రయోజనాలను ఆయన సోషల్‌ మీడియా వేదికగా పంచుకున్నారు.

ఈ వాణిజ్య ఒప్పందం భారతదేశానికి అపారమైన అవకాశాలను కల్పిస్తుందని, అదే సమయంలో దేశంలోని సున్నితమైన రంగాలకు పూర్తి రక్షణ కల్పిస్తుందని పీయూష్ గోయల్ స్పష్టం చేశారు. ప్రధాని నరేంద్ర మోడీ మార్గదర్శకత్వం, ఆయనపై ఉన్న నమ్మకం వల్లే ఈ ఒప్పందం వేగంగా ముగిసిందని ఆయన పేర్కొన్నారు. ముఖ్యంగా ఉపాధి కల్పన ఎక్కువగా ఉండే కార్మిక ఆధారిత రంగాలకు ఈ ఒప్పందం ఒక గేమ్-ఛేంజర్‌గా మారుతుందని, ఇది దేశ ఆర్థికవృద్ధిని సరికొత్త స్థాయికి తీసుకెళ్తుందని ఆయన వివరించారు.

దేశ ప్రయోజనాలకే మొదటి ప్రాధాన్యం

మోడీ ప్రభుత్వం ఏ దేశంతో వాణిజ్య ఒప్పందం చేసుకున్నా దేశ ప్రయోజనాలకే మొదటి ప్రాధాన్యం ఇస్తుందని గోయల్ పునరుద్ఘాటించారు. యూరోపియన్ యూనియన్‌తో కుదిరిన ఈ ఒప్పందం కేవలం వస్తువుల క్రయవిక్రయాలకే పరిమితం కాకుండా, దేశంలో తయారీరంగాన్ని  గణనీయంగా బలోపేతం చేస్తుందని ఆయన విశ్లేషించారు. అంతర్జాతీయ ప్రమాణాలకు అనుగుణంగా మన ఉత్పత్తులను తీర్చిదిద్దడం ద్వారా ప్రపంచ మార్కెట్‌లో భారత్ అగ్రగామిగా ఎదుగుతుందని ఆయన ఆశాభావం వ్యక్తం చేశారు.

భారత్ - కొమొరోస్ మధ్య ద్వైపాక్షిక చర్చలు

 

• కీలక రంగాల్లో సహకారంపై జైశంకర్ కీలక భేటీ

భారత విదేశాంగ మంత్రి డాక్టర్ ఎస్. జైశంకర్ శుక్రవారం న్యూఢిల్లీలో కొమొరోస్ విదేశాంగ మంత్రి ఎంబా మోహమ్మద్‌తో సమావేశమై పలు కీలక అంశాలపై చర్చలు జరిపారు. ఈ భేటీలో ప్రధానంగా ఆరోగ్యం, క్రీడలు, మౌలిక సదుపాయాల కల్పన, సామర్థ్య పెంపుదల వంటి రంగాల్లో ఇరు దేశాల మధ్య సహకారాన్ని మరింత బలోపేతం చేసుకోవడంపై దృష్టి సారించారు. భారత్ - కొమొరోస్ దేశాల మధ్య సంబంధాలను కొత్త పుంతలు తొక్కించేందుకు రెండువైపులా తరచుగా ఉన్నతస్థాయి చర్చలు జరపడం ఎంతో ఆవశ్యకమని ఇరువురు నేతలు ఈ సందర్భంగా ఏకాభిప్రాయానికి వచ్చారు. ఈ సమావేశం ద్వారా ఇరుదేశాల మధ్య స్నేహపూర్వక బంధం మరింత పటిష్టమవడమే కాకుండా, వ్యూహాత్మక రంగాల్లో భాగస్వామ్యం పెరగడానికి మార్గం సుగమమైంది.

భారత్ - పాలస్తీనా కీలక భేటీ

• గాజా శాంతి ప్రణాళికపై జైశంకర్ చర్చలు

భారత విదేశాంగ మంత్రి డాక్టర్ ఎస్. జైశంకర్ శుక్రవారం న్యూఢిల్లీలో పాలస్తీనా విదేశాంగ మంత్రి వర్సెన్ అఘబేకియన్ షాహిన్‌తో సమావేశమయ్యారు. ఈ సందర్భంగా ఇరు దేశాల మధ్య ఉన్న ద్వైపాక్షిక సంబంధాలు, అభివృద్ధి, సహకార అంశాలపై ఇద్దరు నేతలు సమగ్రంగా సమీక్షించారు. భారత్-పాలస్తీనా భాగస్వామ్యాన్ని మరింత ముందుకు తీసుకెళ్లేందుకు అవసరమైన కొత్త చొరవలకు సంబంధించి ఇరువురు ఏకాభిప్రాయానికి వచ్చారు. ఈ భేటీలో ప్రధానంగా గాజా శాంతి ప్రణాళికపై ఇరు దేశాల విదేశాంగ మంత్రులు తమ అభిప్రాయాలను పంచుకోవడంతో పాటు, పశ్చిమ ఆసియాలో మారుతున్న ప్రాంతీయ పరిస్థితులపై లోతుగా చర్చించారు. పాలస్తీనాతో ఉన్న చరిత్రాత్మక సంబంధాలను కొనసాగిస్తూనే, అక్కడ శాంతి స్థాపనకు భారత్ తన మద్దతును ఈ సమావేశం ద్వారా మరోసారి స్పష్టం చేసింది.

బీజేపీ ప్రభుత్వంపై పోరాటంలో మేమంతా ఒక్కటే

• కొచ్చి మహా పంచాయతీ వివాదంపై శశి థరూర్ స్పష్టత

కొచ్చి మహా పంచాయతీ వేదికగా తలెత్తిన వివాదాలను కాంగ్రెస్ నాయకత్వంతో స్నేహపూర్వకంగా పరిష్కరించుకున్నామని, ప్రస్తుతం పార్టీలో ఎలాంటి విభేదాలు లేవని ఎంపీ శశి థరూర్ స్పష్టం చేశారు. తిరువనంతపురంలో ఆయన మీడియాతో మాట్లాడుతూ.. పార్టీ నాయకత్వంతో జరిగిన చర్చల అనంతరం అందరం ఒకే తాటిపై ఉన్నామని, తమ మధ్య ఉన్న చిన్నపాటి అపార్థాలు తొలగిపోయాయని వెల్లడించారు. ఈ విషయంలో కేరళ ప్రదేశ్ కాంగ్రెస్ కమిటీ (KPCC) తో తనకు ఎటువంటి ఇబ్బందులు లేవని, అందరి లక్ష్యం ఇప్పుడు రాబోయే సవాళ్లను ఎదుర్కోవడమేనని ఆయన పేర్కొన్నారు. కొచ్చిలో జరిగిన కిసాన్ మహా పంచాయతీకి హాజరైన నేపథ్యంలో కొన్ని నిబంధనల ఉల్లంఘన జరిగిందనే ఆరోపణలు వచ్చినప్పటికీ, చర్చల ద్వారా ఆ సమస్యను సామరస్యంగా ముగించామని థరూర్ వివరించారు. విభేదాలను పక్కన పెట్టి దేశం ఎదుర్కొంటున్న ప్రధాన సమస్యలపై దృష్టి సారించాల్సిన సమయం ఆసన్నమైందని, ముఖ్యంగా అధికార బీజేపీ అనుసరిస్తున్న విధానాలపై ఐక్యంగా పోరాడడమే తమ ముందున్న తక్షణ కర్తవ్యమని ఆయన ఉద్ఘాటించారు.

అసోం అభివృద్ధికి అమిత్ షా భారీ ఊతం

 

•  రూ. 1,700 కోట్లకు పైగా విలువైన ప్రాజెక్టులకు శ్రీకారం

కేంద్ర హోంమంత్రి అమిత్ షా శుక్రవారం అసోంలోని దిబ్రూఘర్‌లో రెండో శాసనసభ సముదాయంతో సహా మొత్తం 1,715 కోట్ల రూపాయల విలువైన అభివృద్ధి ప్రాజెక్టులను ప్రారంభించారు. ఈ సందర్భంగా దిబ్రూఘర్‌లో జరిగిన బహిరంగ సభలో ఆయన మాట్లాడుతూ, భారత్-యూరోపియన్ యూనియన్ స్వేచ్ఛా వాణిజ్య ఒప్పందం వల్ల అసోం టీ ఎగుమతులు ఐరోపా దేశాలకు గణనీయంగా పెరుగుతాయని ఆశాభావం వ్యక్తం చేశారు. అసోంను వరద రహిత రాష్ట్రంగా మార్చేందుకు కేంద్రం అనేక చర్యలు తీసుకుందని చెబుతూ, అభివృద్ధి, శాంతి, భద్రత, పారిశ్రామిక వృద్ధి కోసం రాబోయే అసెంబ్లీ ఎన్నికల్లో బీజేపీని ఆదరించాలని ప్రజలను కోరారు. గత కాంగ్రెస్ ప్రభుత్వాలు ఓటు బ్యాంకు రాజకీయాల కోసం చొరబాట్లను ప్రోత్సహిస్తూ రాష్ట్రాన్ని నిర్లక్ష్యం చేశాయని, కానీ ప్రధాని నరేంద్ర మోడీ నాయకత్వంలో అసోం ఇప్పుడు హింస నుంచి శాంతి, అభివృద్ధి పథంలోకి మళ్లిందని ఆయన పేర్కొన్నారు.

ముఖ్యంగా ఎగువ అసోం ప్రజలకు ఇది చరిత్రాత్మక రోజని అభివర్ణిస్తూ, దిబ్రూఘర్‌లో నిర్మించనున్న రెండో శాసనసభ సముదాయం పరిపాలనా మౌలిక సదుపాయాలను మరింత బలోపేతం చేస్తుందని అమిత్ షా తెలిపారు. ముఖ్యమంత్రి హిమంత బిస్వా శర్మ, కేంద్ర మంత్రి శర్బానంద సోనోవాల్ సమక్షంలో ఆయన రూ. 284 కోట్ల రూపాయల వ్యయంతో నిర్మించనున్న అసెంబ్లీ భవనం, ఎమ్మెల్యే హాస్టల్‌కు శంకుస్థాపన చేశారు. రాష్ట్రానికి దిబ్రూఘర్‌ను రెండో పరిపాలనా కేంద్రంగా తీర్చిదిద్దే లక్ష్యంతో మూడు అంతస్తుల అసెంబ్లీ భవనం, తొమ్మిది అంతస్తుల ఎమ్మెల్యే హాస్టల్, 800 సీట్ల సామర్థ్యం గల ఆడిటోరియం వంటి నిర్మాణాలను ఇక్కడ చేపట్టనున్నారు.

క్రీడలు, పర్యావరణ రంగాలకు సంబంధించి కూడా హోంమంత్రి పలు కీలక నిర్ణయాలు తీసుకున్నారు. రూ. 238 కోట్ల రూపాయల వ్యయంతో నిర్మించిన ఆధునిక బహుళళ క్రమశిక్షణ క్రీడా సముదాయం మొదటి దశను ప్రారంభించడంతో పాటు, రూ. 209 కోట్ల అంచనాతో రెండో దశకు శంకుస్థాపన చేశారు. అలాగే వన్యప్రాణుల చికిత్స, పరిశోధన కోసం రూ. 292 కోట్ల రూపాయలతో వైల్డ్‌లైఫ్ హెల్త్ అండ్ రీసెర్చ్ సెంటర్‌ను ఏర్పాటు చేస్తున్నారు. నగరాల్లో వరద ముప్పును తగ్గించి, బ్రహ్మపుత్ర నదీ పరివాహక ప్రాంతంలో నీటి నిల్వ సామర్థ్యాన్ని పెంచేందుకు జాతీయ విపత్తు ఉపశమన నిధి కింద రూ. 692 కోట్ల రూపాయలతో చిత్తడి నేలల పునరుద్ధరణ ప్రాజెక్టును కూడా ఆయన ప్రారంభించారు. దిబ్రూఘర్ పర్యటన అనంతరం ఆయన ధేమాజీ జిల్లాలోని మిసింగ్ కమ్యూనిటీ సాంస్కృతిక ఉత్సవంలో పాల్గొని, ఆపై గౌహతిలో పార్టీ సభ్యులతో భేటీ అయి సాయంత్రం పశ్చిమ బెంగాల్‌కు బయలుదేరి వెళ్లనున్నారు.

భారత ప్రగతి ప్రస్థానంలో సరికొత్త మైలురాళ్లు

• పెరిగిన ఉపాధి , తగ్గిన పేదరికం
• ఆర్థిక సర్వేలో వెల్లడి

న్యూఢిల్లీ: దేశ ఆర్థిక ముఖచిత్రాన్ని ఆవిష్కరించే 'ఆర్థిక సర్వే 2025-26' భారత మానవాభివృద్ధిలో సాధించిన అద్భుత విజయాలను చాటిచెప్పింది. గురువారం పార్లమెంటులో కేంద్ర ఆర్థిక మంత్రి నిర్మలా సీతారామన్ ప్రవేశపెట్టిన ఈ నివేదిక కొన్నేళ్లుగా కార్మిక మార్కెట్ లో వచ్చిన సానుకూల మార్పులను, పేదరిక నిర్మూలనలో భారత్ సాధించిన ప్రగతిని ప్రత్యేకంగా ప్రస్తావించింది. దేశంలో నిరుద్యోగ రేటు గణనీయంగా తగ్గడమే కాకుండా, మహిళా కార్మిక భాగస్వామ్యం ఊహించని రీతిలో పెరగడం భారత సామాజిక మార్పునకు నిదర్శనమని సర్వే కొనియాడారు. ముఖ్యంగా నైపుణ్యాభివృద్ధి కార్యక్రమాల వల్ల యువతకు ఉపాధి అవకాశాలు మెరుగుపడటం దేశ ఆర్థిక వ్యవస్థకు కొత్త ఊపిరి పోస్తున్నదని నివేదిక స్పష్టం చేసింది.

మానవాభివృద్ధి సూచీలో భారత్ సాధించిన వృద్ధిని వివరిస్తూ.. ఆరోగ్యం, విద్యా రంగాల్లో ప్రభుత్వం చేసిన భారీ పెట్టుబడులు ఇప్పుడు ఫలితాలను ఇస్తున్నాయని సర్వే పేర్కొంది. పేదరిక నిర్మూలన దిశగా చేపట్టిన సంక్షేమ పథకాలు క్షేత్రస్థాయిలో ప్రజల జీవన ప్రమాణాలను మెరుగుపరిచాయని, ఇది దేశ సమ్మిళిత వృద్ధికి బాటలు వేసిందని ఆర్థిక నిపుణులు అభిప్రాయపడ్డారు. పట్టణ , గ్రామీణ ప్రాంతాల మధ్య వ్యత్యాసాలు తగ్గుతూ వస్తున్నాయని, ప్రధానంగా మౌలిక సదుపాయాల కల్పన వల్ల ఉపాధి కల్పనలో స్థిరత్వం ఏర్పడిందని సర్వే వెల్లడించింది. రాబోయే దశాబ్దంలో భారత్ మరింత బలమైన శ్రామిక శక్తితో ప్రపంచ ఆర్థిక వ్యవస్థలో కీలక పాత్ర పోషించబోతున్నదని ఈ గణాంకాలు సూచిస్తున్నాయి.

కేవలం సంఖ్యల పరంగానే కాకుండా, జీవన నాణ్యతలోనూ భారత్ ముందడుగు వేస్తున్నదని ఈ సర్వే స్పష్టం చేసింది. డిజిటల్ విప్లవం ద్వారా అందుతున్న సేవలు పేద ప్రజలకు ఆర్థిక స్వతంత్రతను కల్పించాయని, ఇది దేశ సార్వత్రిక అభివృద్ధికి దోహదపడుతున్నదని పేర్కొంది. ఈ సానుకూల ధోరణిని కొనసాగించడం ద్వారా 2047 నాటికి 'వికసిత భారత్' కల సాకారం కావడం ఖాయమని సర్వే ఆశాభావం వ్యక్తం చేసింది.

రాష్ట్రాల ఆర్థిక స్థితిగతులపై ‘ఆర్థిక సర్వే’ ఆందోళన

• తగ్గుతున్న ఆదాయ మిగులు
• సమాఖ్య ఆర్థిక వ్యవస్థకు పొంచి ఉన్న ముప్పు

న్యూఢిల్లీ: దేశ ఆర్థికవ్యవస్థ వృద్ధి పథంలో దూసుకుపోతున్నా, రాష్ట్రాల ఆర్థిక పరిస్థితి మాత్రం ఆందోళనకరంగా మారుతున్నదని తాజా 'ఆర్థిక సర్వే 2025-26' హెచ్చరించింది. గురువారం పార్లమెంటులో ప్రవేశపెట్టిన ఈ నివేదిక ప్రకారం.. కొన్నేళ్లుగా రాష్ట్రాల ఆర్థిక క్రమశిక్షణ తప్పుతున్నదని స్పష్టమవుతున్నది. ముఖ్యంగా ఆదాయ మిగులు  కలిగిన రాష్ట్రాల సంఖ్య గణనీయంగా పడిపోవడం గమనార్హం. 2018-19 ఆర్థిక సంవత్సరంలో దేశంలోని 19 రాష్ట్రాలు ఆదాయ మిగులును కలిగి ఉండగా, 2024-25 నాటికి ఆ సంఖ్య కేవలం 11కు పరిమితమైందని సర్వే గణాంకాలతో సహా వివరించింది. ఇది రాష్ట్రాల ఆర్థిక ఆరోగ్యం క్షీణిస్తున్నదనడానికి నిదర్శనమని నిపుణులు అభిప్రాయపడుతున్నారు.

రాష్ట్రాల వ్యయం విపరీతంగా పెరగడం, ఉచిత పథకాలపై పెడుతున్న ఖర్చు, పన్నేతర ఆదాయ వనరులను పెంచుకోవడంలో విఫలం కావడం వంటి అంశాలు ఈ పరిస్థితికి దారితీశాయని సర్వే విశ్లేషించింది. ఆదాయం కంటే ఖర్చు ఎక్కువగా ఉండటం వల్ల రాష్ట్రాలు అప్పుల ఊబిలో కూరుకుపోతున్నాయని, ఇది దీర్ఘకాలంలో దేశం  మొత్తం ఆర్థిక స్థిరత్వంపై ప్రభావం చూపుతుందని కేంద్రం ఆందోళన వ్యక్తం చేసింది. అభివృద్ధి పనుల కోసం కేటాయించాల్సిన మూలధన వ్యయం తగ్గి, కేవలం జీతాలు, పెన్షన్లు, వడ్డీల చెల్లింపులకే అధిక నిధులు ఖర్చవుతుండటం ఆందోళనకరమైన పరిణామం.

సమాఖ్య వ్యవస్థలో కేంద్రం, రాష్ట్రాలు కలిసి ఆర్థిక ప్రగతిని సాధించాల్సిన అవసరం ఉందని, రాష్ట్రాలు తమ ఆర్థిక లోటును నియంత్రించుకోవడానికి కఠినమైన చర్యలు తీసుకోవాలని సర్వే సూచించింది. కేవలం కేంద్రం నుంచి వచ్చే గ్రాంట్లు, పన్నుల వాటాపైనే ఆధారపడకుండా, స్వయం సమృద్ధి దిశగా అడుగులు వేయాలని కేంద్రం రాష్ట్రాలకు హితవు పలికింది. రాబోయే బడ్జెట్‌లో రాష్ట్రాలకు ఇచ్చే రుణ పరిమితులు, ప్రోత్సాహకాల విషయంలో ఈ సర్వే అంచనాలు కీలక పాత్ర పోషించనున్నాయి.

చెత్త రహిత నగరంగా వజ్రాల నగరి

• సరికొత్త రికార్డు దిశగా సూరత్ అడుగులు

సూరత్: ప్రపంచవ్యాప్తంగా వజ్రాల వ్యాపారానికి ప్రసిద్ధి చెందిన గుజరాత్‌లోని సూరత్ నగరం ఇప్పుడు పర్యావరణ పరిరక్షణలోనూ సరికొత్త చరిత్ర సృష్టించేందుకు సిద్ధమైంది. దేశంలోనే అత్యంత పరిశుభ్రమైన నగరాల్లో ఒకటిగా ఇప్పటికే పేరు తెచ్చుకున్న సూరత్, ఇప్పుడు పూర్తిస్థాయిలో 'జీరో వేస్ట్ సిటీ' (చెత్త రహిత నగరం) గా మారే లక్ష్యంతో ముందుకు సాగుతున్నది. దీనికోసం సూరత్ మున్సిపల్ కార్పొరేషన్ (SMC) అత్యాధునిక వ్యర్థాల నిర్వహణ వ్యవస్థను అమలు చేస్తున్నది. నగరంలో ప్రతిరోజూ ఉత్పత్తి అయ్యే వేల టన్నుల చెత్తను శాస్త్రీయ పద్ధతిలో శుద్ధి చేసి, దాని నుంచి ఇంధనం, ఎరువులు, విద్యుత్తును తయారుచేయడం ద్వారా ఒక్క పిసరంత వ్యర్థం కూడా బయటకు పోకుండా ప్రణాళికలు సిద్ధం చేశారు.

నగరంలోని ప్రతి ఇంటి నుంచి సేకరించే చెత్తను తడి, పొడి, ఎలక్ట్రానిక్ వ్యర్థాలుగా విభజించే ప్రక్రియను వంద శాతం విజయవంతం చేయడంలో అధికారులు సఫలమయ్యారు. వ్యర్థాల నుంచి సంపదను సృష్టించే 'వేస్ట్ టు ఎనర్జీ' ప్లాంట్లు ఇక్కడ కీలకంగా మారాయి. పారిశ్రామిక వ్యర్థాలను పునర్వినియోగం చేయడంలోనూ సూరత్ దేశంలోని ఇతర నగరాలకు ఆదర్శంగా నిలుస్తున్నది. ప్రజల్లో అవగాహన కల్పించడం, సాంకేతికతను జోడించడం ద్వారా రాబోయే కొద్దికాలంలోనే దేశంలోనే మొదటి పూర్తిస్థాయి జీరో వేస్ట్ మెట్రో నగరంగా సూరత్ అవతరించనుంది. ఈ ప్రయోగాత్మక మార్పు కేవలం నగరం రూపురేఖలనే కాకుండా, పౌరుల జీవన ప్రమాణాలను కూడా మెరుగుపరుస్తుందని నిపుణులు అభిప్రాయపడుతున్నారు.

రాష్ట్రపతి ప్రసంగంపై 18 గంటల సుదీర్ఘ చర్చ

• ఫిబ్రవరి 4న పార్లమెంట్‌లో ప్రధాని మోదీ కీలక ప్రసంగం

న్యూఢిల్లీ: పార్లమెంట్ బడ్జెట్ సమావేశాలు అత్యంత ఉత్కంఠభరితంగా కొనసాగుతున్నాయి. రాష్ట్రపతి ద్రౌపది ముర్ము ఉభయ సభలను ఉద్దేశించి చేసిన ప్రసంగానికి ధన్యవాదాలు తెలిపే తీర్మానంపై  లోక్‌సభలో సుమారు 18 గంటల పాటు సుదీర్ఘ చర్చ జరగనుంది. ఈ చర్చ ముగిసిన అనంతరం, ఫిబ్రవరి 4వ తేదీన ప్రధాని నరేంద్ర మోడీ లోక్‌సభలో ప్రతిపక్షాలు లేవనెత్తిన ప్రశ్నలకు సమాధానమిస్తూ ప్రసంగించనున్నారు. బీఏసీ  సమావేశంలో ఈ మేరకు నిర్ణయం తీసుకున్నారు.

ఈ చర్చలో అధికార, ప్రతిపక్ష పార్టీలకు చెందిన సభ్యులు దేశ ఆర్థిక స్థితిగతులు, ప్రభుత్వం అమలుచేస్తున్న సంక్షేమ పథకాలు, అంతర్జాతీయ సంబంధాలపై తమ అభిప్రాయాలను పంచుకోనున్నారు. ముఖ్యంగా 'ఆపరేషన్ సిందూర్' వంటి అంశాలు, నేడు విడుదలైన ఆర్థిక సర్వే అంశాలు ఈ చర్చలో ప్రధానంగా వినిపించే అవకాశం ఉంది. ప్రతిపక్షాలు నిరుద్యోగం, ద్రవ్యోల్బణం వంటి అంశాలపై ప్రభుత్వాన్ని నిలదీయడానికి సిద్ధమవుతుండగా, అధికార పక్షం 'వికసిత్‌ భారత్' లక్ష్యాలను వివరిస్తూ దీటుగా సమాధానం చెప్పేందుకు సమాయత్తమవుతున్నది.

రాష్ట్రపతి ప్రసంగంపై చర్చకు లోక్‌సభలో 18 గంటల సమయం కేటాయించగా, రాజ్యసభలో కూడా తగిన సమయాన్ని కేటాయించారు. ఫిబ్రవరి 1న ప్రవేశపెట్టబోయే కేంద్ర బడ్జెట్‌కు ముందు ఈ చర్చ జరగడం ప్రాధాన్యం సంతరించుకుంది. ప్రధాని మోడీ తన ప్రసంగంలో దేశ భవిష్యత్తు ప్రణాళికలను, ప్రభుత్వం సాధించిన విజయాలను మరోసారి దేశ ప్రజల ముందుకు ఉంచనున్నారు.

నిజమైన న్యాయం ఎవరికీ అన్యాయం చేయదు

• యూజీసీ కొత్త నిబంధనలపై సుప్రీంకోర్టు స్టేను స్వాగతించిన అఖిలేష్ యాదవ్

లక్నో: ఉన్నత విద్యాసంస్థల్లో కుల వివక్షను అరికట్టేందుకు యూజీసీ (UGC) ప్రవేశపెట్టిన కొత్త నిబంధనలపై సుప్రీంకోర్టు స్టే విధించడాన్ని సమాజ్‌వాదీ పార్టీ (SP) అధినేత అఖిలేష్ యాదవ్ హర్షించారు. గురువారం ఎక్స్‌ వేదికగా ఆయన స్పందిస్తూ.. "నిజమైన న్యాయం అంటే ఎవరికీ అన్యాయం చేయకపోవడమే, గౌరవనీయ న్యాయస్థానం సరిగ్గా ఇదే విషయాన్ని నిర్ధారించింది" అని పేర్కొన్నారు. చట్టం, భాష మరియు దాని వెనుక ఉన్న ఉద్దేశ్యం (Intent) రెండూ చాలా స్పష్టంగా ఉండాలని, లేనిపక్షంలో అవి అన్యాయానికి, సామాజిక విభజనకు దారితీస్తాయని ఆయన ఆందోళన వ్యక్తం చేశారు.

యూజీసీ రూపొందించిన ఈ నిబంధనలు అస్పష్టంగా ఉన్నాయని, దుర్వినియోగానికి అవకాశం కల్పిస్తున్నాయని సుప్రీంకోర్టు చేసిన వ్యాఖ్యలను అఖిలేష్ బలపరిచారు. "ఎవరూ అణచివేతకు గురికాకూడదు, ఎవరికీ అన్యాయం జరగకూడదు. ఎవరిపై దౌర్జన్యం లేదా అన్యాయమైన ప్రవర్తన ఉండకూడదు" అని ఆయన ఆకాంక్షించారు. ఈ అంశం కేవలం నిబంధనలకు సంబంధించినది మాత్రమే కాదని, ఆ నిర్ణయం వెనుక ఉన్న ఉద్దేశం కూడా పారదర్శకంగా ఉండాలని ఆయన డిమాండ్ చేశారు.

విద్యాసంస్థల్లో కుల వివక్షను నిర్వచించే క్రమంలో యూజీసీ అనుసరించిన విధానం సమాజంలో ఉద్రిక్తతలకు దారితీస్తున్నదని పేర్కొంటూ, న్యాయస్థానం జోక్యం చేసుకోవడం వల్ల విద్యార్థుల మధ్య విభజన ఆగిందని ఆయన అభిప్రాయపడ్డారు. ప్రభుత్వం ఏదైనా చట్టాన్ని తీసుకువచ్చేటప్పుడు అందరి ప్రయోజనాలను దృష్టిలో ఉంచుకోవాలని, ఎవరికీ హాని కలగకుండా చూడటమే అసలైన రాజ్యాంగ స్ఫూర్తి అని అఖిలేష్ యాదవ్ స్పష్టం చేశారు. ఈ సందర్భంగా సుప్రీంకోర్టు తీసుకున్న నిర్ణయం ప్రజాస్వామ్యాన్ని, సామాజిక సమతుల్యతను కాపాడే దిశగా ఒక గొప్ప అడుగని ఆయన కొనియాడారు.

యూజీసీ కొత్త నిబంధనలపై సుప్రీంకోర్టు స్టే అత్యంత సమంజసం

 యూజీసీ కొత్త నిబంధనలపై సుప్రీంకోర్టు స్టే అత్యంత సమంజసం

బీఎస్పీ అధినేత్రి మాయావతి హర్షం

లక్నో: ఉన్నత విద్యాసంస్థల్లో కుల వివక్షకు సంబంధించిన యూజీసీ కొత్త నిబంధనలపై సుప్రీంకోర్టు స్టే విధించడాన్ని బహుజన్ సమాజ్ పార్టీ (BSP) అధినేత్రి మాయావతి మనస్ఫూర్తిగా స్వాగతించారు. న్యాయస్థానం తీసుకున్న ఈ నిర్ణయం అత్యంత సమంజసమైనదని, రాజ్యాంగ స్ఫూర్తిని కాపాడే విధంగా ఉందని ఆమె అభిప్రాయపడ్డారు. గురువారం సోషల్ మీడియా వేదికగా స్పందించిన మాయావతి, యూజీసీ తీసుకువచ్చిన ఈ కొత్త మార్పులు విద్యార్థుల మధ్య ఐక్యతను దెబ్బతీసేలా, ఒక వర్గానికి అన్యాయం చేసేలా ఉన్నాయని విమర్శించారు. విద్యాసంస్థలు జ్ఞానాన్ని పంచే కేంద్రాలుగా ఉండాలి తప్ప, కులాల ప్రాతిపదికన విభజనను ప్రోత్సహించే వేదికలు కాకూడదని ఆమె స్పష్టం చేశారు.

కేంద్ర ప్రభుత్వం, యూజీసీ కలిసి విద్యా రంగంలో అనవసరమైన గందరగోళాన్ని సృష్టిస్తున్నాయని, ముఖ్యంగా వివక్షను అరికట్టే పేరుతో తీసుకువచ్చిన ఈ అస్పష్టమైన నిబంధనలు విమర్శలకు తావిస్తున్నాయని మాయావతి పేర్కొన్నారు. సుప్రీంకోర్టు జోక్యంతో ఇప్పుడు విద్యార్థులందరికీ సమాన న్యాయం చేకూరుతుందని ఆమె ధీమా వ్యక్తం చేశారు. గతంలో ఉన్న 2012 నిబంధనలే కుల వివక్షను అరికట్టడానికి సరిపోతాయని, వాటిని పటిష్టంగా అమలు చేయకుండా కొత్త నిబంధనల పేరుతో విభజన తీసుకురావడం సరికాదని ఆమె అభిప్రాయపడ్డారు. న్యాయస్థానం ఈ విషయంలో లోతైన విచారణ జరిపి శాశ్వత పరిష్కారం చూపాలని ఆమె ఆకాంక్షించారు.

ప్రపంచంలోనే అత్యధికంగా విదేశీ నగదును అందుకుంటున్న దేశంగా భారత్

135.4 బిలియన్ డాలర్లకు చేరిన ఆదాయం

న్యూఢిల్లీ: కేంద్ర ఆర్థిక, కార్పొరేట్ వ్యవహారాల మంత్రి నిర్మలా సీతారామన్ గురువారం పార్లమెంటులో 'ఆర్థిక సర్వే 2025-26'ను ప్రవేశపెట్టారు. ఈ సర్వే ప్రకారం, భారత్  బాహ్య రంగం (External Sector) అత్యంత పటిష్టంగా ఉంది. పటిష్టమైన ఎగుమతులు, సేవల రంగంలో నిలకడ, విస్తరిస్తున్న వాణిజ్య నెట్‌వర్క్‌ల కారణంగా ప్రపంచ ఆర్థిక వ్యవస్థతో భారత్ అనుసంధానం మరింత లోతుగా మారిందని సర్వే పేర్కొంది.

ముఖ్యమైన వివరాలు

1. విదేశీ నగదు బదిలీల్లో రికార్డు: ప్రపంచంలోనే అత్యధికంగా విదేశీ నగదును అందుకుంటున్న దేశంగా భారత్ తన అగ్రస్థానాన్ని నిలబెట్టుకుంది. 2024-25 ఆర్థిక సంవత్సరంలో (FY25) ఈ ఆదాయం 135.4 బిలియన్ డాలర్లకు చేరుకుంది. అభివృద్ధి చెందిన దేశాల నుండి వస్తున్న నిధుల వాటా పెరగడం విశేషం. ఇది భారతీయ నైపుణ్యం కలిగిన కార్మికులు, నిపుణులు ప్రపంచవ్యాప్తంగా అందిస్తున్న సహకారాన్ని ప్రతిబింబిస్తోంది.

2. కరెంట్ అకౌంట్ లోటు  తగ్గింపు: వస్తువుల వాణిజ్య లోటు ఉన్నప్పటికీ, సేవల రంగం, ప్రైవేట్ బదిలీల (విదేశీ నగదు) ద్వారా వస్తున్న ఆదాయం వల్ల దేశ ఆర్థిక పరిస్థితి సమతుల్యంగా ఉంది. 2025-26 ఆర్థిక సంవత్సరం ప్రథమార్థంలో (H1 FY26), కరెంట్ అకౌంట్ లోటు జీడీపీలో 0.8 శాతానికి (15 బిలియన్ డాలర్లు) తగ్గింది. గత ఏడాది ఇదే సమయంలో ఇది 1.3 శాతంగా (25.3 బిలియన్ డాలర్లు) ఉండేది. న్యూజిలాండ్, బ్రెజిల్, ఆస్ట్రేలియా వంటి దేశాలతో పోలిస్తే భారత్ మెరుగైన స్థితిలో ఉంది.

3. విదేశీ ప్రత్యక్ష పెట్టుబడులు: ప్రపంచ ఆర్థిక పరిస్థితులు కఠినంగా ఉన్నప్పటికీ, భారత్ స్థిరంగా పెట్టుబడులను ఆకర్షిస్తున్నది. 2024-25లో జీడీపీలో 18.5 శాతం పెట్టుబడులు వచ్చాయి. దక్షిణాసియాలో అత్యధిక ఎఫ్‌డీఐలను అందుకున్న దేశంగా భారత్ నిలిచింది. 2020-24 మధ్య కాలంలో గ్రీన్ ఫీల్డ్ డిజిటల్ పెట్టుబడుల కోసం భారత్ ప్రధాన గమ్యస్థానంగా మారి 114 బిలియన్ డాలర్లను ఆకర్షించింది. 2025 ఏప్రిల్-నవంబర్ మధ్య ఎఫ్‌డీఐ ప్రవాహం 64.7 బిలియన్ డాలర్లకు పెరిగింది.

4. విదేశీ మారక నిల్వలు: 2026 జనవరి 16 నాటికి భారత్ వద్ద ఉన్న విదేశీ మారక నిల్వలు 701.4 బిలియన్ డాలర్లకు చేరుకున్నాయి. ఇది సుమారు 11 నెలల దిగుమతులకు, దేశం  మొత్తం విదేశీ అప్పులో 94 శాతానికి సమానం. ఇది దేశానికి పటిష్టమైన ద్రవ్య లభ్యతను కల్పిస్తున్నది.

5. రూపాయి విలువ, విదేశీ అప్పు: 2025 ఏప్రిల్ 1 నుంచి 2026 జనవరి 15 మధ్య అమెరికన్ డాలర్‌తో పోలిస్తే రూపాయి విలువ సుమారు 5.4 శాతం తగ్గింది. 2025 సెప్టెంబర్ నాటికి భారత్  విదేశీ అప్పు 746 బిలియన్ డాలర్లుగా ఉంది. ఇది జీడీపీలో కేవలం 19.2 శాతం మాత్రమే. ప్రపంచ మొత్తం విదేశీ అప్పులో భారత్ వాటా కేవలం 0.69 శాతం మాత్రమే ఉండటం గమనార్హం.

భారత ఎగుమతుల పోటీతత్వాన్ని పెంచడానికి తయారీ ఖర్చులను తగ్గించాల్సిన అవసరం ఉందని ఆర్థిక సర్వే నొక్కి చెప్పింది. పటిష్టమైన పారిశ్రామిక విధానం, ఉత్పాదకత పెంపు, సేవల రంగం అభివృద్ధి ద్వారా దేశ ఆర్థిక వ్యవస్థ మరింత బలోపేతం అవుతుందని సర్వే విశ్లేషించింది.

యూజీసీ 2026 నిబంధనలపై సుప్రీంకోర్టు బ్రేక్

• సమాజాన్ని విడదీసేలా ఉన్నాయంటూ ఘాటు వ్యాఖ్యలు
• పాత రూల్స్ ఫాలో అవ్వాలని ఆదేశం
• తదుపరి విచారణ మార్చి 19కి వాయిదా

న్యూఢిల్లీ: దేశంలోని ఉన్నత విద్యాసంస్థల్లో కుల వివక్షను అరికట్టేందుకు యూనివర్సిటీ గ్రాంట్స్ కమిషన్ (UGC) ప్రవేశపెట్టిన 'ప్రమోషన్ ఆఫ్ ఈక్విటీ రెగ్యులేషన్స్-2026'పై సుప్రీంకోర్టు గురువారం మధ్యంతర స్టే విధించింది. ఈ కొత్త నిబంధనలు అస్పష్టంగా ఉన్నాయని, ఇవి దుర్వినియోగమయ్యే అవకాశం ఉండటమే కాకుండా సమాజాన్ని కులాల వారీగా విడదీసే ప్రమాదం ఉందని అత్యున్నత న్యాయస్థానం ఆందోళన వ్యక్తం చేసింది. భారత ప్రధాన న్యాయమూర్తి (సీజేఐ) జస్టిస్ సూర్యకాంత్, జస్టిస్ జాయ్‌మాల్యా బాగ్చీలతో కూడిన ధర్మాసనం ఈ కీలక ఉత్తర్వులు జారీ చేస్తూ, తదుపరి ఆదేశాలు వచ్చే వరకు 2012 నాటి పాత నిబంధనలే అమల్లో ఉంటాయని స్పష్టం చేసింది.

తిరోగమన వివక్ష'కు దారితీస్తుంది

కొత్త నిబంధనలలోని సెక్షన్ 3(1)(సీ) ప్రకారం.. కుల వివక్ష అంటే కేవలం ఎస్సీ, ఎస్టీ, ఓబీసీ వర్గాలకు వ్యతిరేకమైనదిగా మాత్రమే నిర్వచించడంపై కోర్టు అభ్యంతరం వ్యక్తం చేసింది. ఇది ఒక రకమైన 'తిరోగమన వివక్ష'కు దారితీస్తుందని, జనరల్ కేటగిరీ విద్యార్థులను రక్షణ లేకుండా చేస్తుందని దాఖలైన పిటిషన్లను కోర్టు పరిగణనలోకి తీసుకుంది. "మనం కులరహిత సమాజం దిశగా వెళ్తున్నామా లేక వెనక్కి ప్రయాణిస్తున్నామా?" అని సీజేఐ ఈ సందర్భంగా ప్రశ్నించారు. విద్యాసంస్థల్లో ప్రత్యేక హాస్టళ్లు వంటి ప్రతిపాదనలు ఉండటంపై కూడా కోర్టు విస్మయం వ్యక్తం చేస్తూ, ఇలాంటి చర్యలు విద్యార్థుల మధ్య విభజనను పెంచుతాయని హెచ్చరించింది.

నిబంధనలపై న్యాయ నిపుణులతో సమీక్ష చేయాలి

ఈ వివాదాస్పద నిబంధనలపై న్యాయ నిపుణులతో కూడిన కమిటీ ద్వారా సమీక్ష చేయాలని కేంద్ర ప్రభుత్వానికి, యూజీసీకి సుప్రీంకోర్టు సూచించింది. దేశవ్యాప్తంగా జనరల్ కేటగిరీ విద్యార్థులు ఈ కొత్త రూల్స్‌కు వ్యతిరేకంగా భారీ ఎత్తున ఆందోళనలు చేస్తున్న తరుణంలో కోర్టు ఈ నిర్ణయం తీసుకోవడం ప్రాధాన్యం సంతరించుకుంది. ఈ కేసులో తదుపరి విచారణను మార్చి 19కి వాయిదా వేసిన ధర్మాసనం, అప్పటి వరకు ఎవరూ ఎటువంటి వివక్షకు గురికాకుండా చూడటం విద్యాసంస్థల బాధ్యత అని పేర్కొంది.

కాంగ్రెస్‌లో ‘కోల్డ్ వార్’కు చెక్?

• ఖర్గే, రాహుల్‌తో శశి థరూర్ కీలక భేటీ
• విభేదాల ఊహాగానాలకు తెర

న్యూఢిల్లీ:  కొంతకాలంగా కాంగ్రెస్ అధిష్ఠానానికి, సీనియర్ నేత శశి థరూర్‌కు మధ్య విభేదాలు ఉన్నాయంటూ వస్తున్న వార్తల నేపథ్యంలో ఒక కీలక పరిణామం చోటుచేసుకుంది. గురువారం నాడు తిరువనంతపురం ఎంపీ శశి థరూర్.. ఏఐసీసీ అధ్యక్షుడు మల్లికార్జున్ ఖర్గే మరియు లోక్‌సభ ప్రతిపక్ష నేత రాహుల్ గాంధీతో సమావేశమయ్యారు. సుమారు 30 నిమిషాల పాటు సాగిన ఈ భేటీ రాజకీయ వర్గాల్లో ఆసక్తిని రేకెత్తించింది. ముఖ్యంగా ప్రధాని మోడీని ప్రశంసించారనే కారణంతో థరూర్‌పై పార్టీ గుర్రుగా ఉందని, ఆయన త్వరలోనే బీజేపీలోకి వెళ్తారనే ఊహాగానాలు బలంగా వినిపిస్తున్న తరుణంలో ఈ భేటీ ప్రాధాన్యం సంతరించుకుంది.

ఇటీవల కొచ్చిలో జరిగిన పార్టీ సమావేశంలో రాహుల్ గాంధీ 12 మంది సీనియర్ నేతల పేర్లను ప్రస్తావించినా, వేదికపైనే ఉన్న థరూర్ పేరును విస్మరించడం చర్చనీయాంశమైంది. ఈ ‘అవమానం’ వల్లే ఆయన గత వారం జరిగిన కేరళ అసెంబ్లీ ఎన్నికల వ్యూహరచన సమావేశానికి హాజరుకాలేదని ప్రచారం జరిగింది. అయితే, తాజాగా జరిగిన ఈ ముఖాముఖి భేటీతో ఆ విభేదాలన్నీ సమసిపోయినట్లేనని పార్టీ వర్గాలు భావిస్తున్నాయి. కేరళ అసెంబ్లీ ఎన్నికలు సమీపిస్తున్న తరుణంలో, థరూర్ వంటి ప్రజాకర్షణ కలిగిన నేతను దూరం చేసుకోకూడదని అధిష్ఠానం భావిస్తున్నది. ఈ సమావేశంలో పార్టీ ఐక్యత, భవిష్యత్తు కార్యాచరణపై చర్చించినట్లు తెలుస్తున్నది.

రిఫార్మ్, పెర్ఫార్మ్, ట్రాన్స్‌ఫార్మ్ ప్రభుత్వానికి గుర్తింపు

• ‘రిఫార్మ్ ఎక్స్‌ప్రెస్‌’ ఎక్కిన భారత్ - ప్రధాని మోడీ ధీమా

న్యూఢిల్లీ: దేశం ఇప్పుడు దశాబ్దాలుగా పెండింగ్‌లో ఉన్న సమస్యలను అధిగమించి, శాశ్వత పరిష్కారాల దిశగా దృఢంగా అడుగులు వేస్తోందని ప్రధాని నరేంద్ర మోడీ ఆకాంక్షించారు. పార్లమెంట్ బడ్జెట్ సమావేశాల రెండో రోజున మీడియాను ఉద్దేశించి ప్రసంగించిన ఆయన, తమ ప్రభుత్వం 'రిఫార్మ్ (సంస్కరణ), పెర్ఫార్మ్ (పనితీరు), ట్రాన్స్‌ఫార్మ్ (పరివర్తన)' అనే సూత్రాలకు నిదర్శనంగా నిలిచిందని, దేశం నేడు 'రిఫార్మ్ ఎక్స్‌ప్రెస్' ఎక్కి వేగంగా దూసుకుపోతున్నదని అభివర్ణించారు. సంక్షేమ పథకాలు సమాజంలోని చివరి వ్యక్తికి కూడా అందేలా తమ ప్రభుత్వం ప్రత్యేక దృష్టి సారించిందని, 2047 నాటికి 'వికసిత భారత్' లక్ష్యాన్ని చేరుకోవడానికి రాబోయే 25 ఏళ్లు అత్యంత కీలకమని ఆయన స్పష్టం చేశారు. నిన్న ఉభయ సభలను ఉద్దేశించి రాష్ట్రపతి చేసిన ప్రసంగం 140 కోట్ల మంది ప్రజల నమ్మకానికి ప్రతిరూపమని మోడీ పేర్కొన్నారు.

భారత్ - ఈయూ స్వేచ్ఛా వాణిజ్య ఒప్పందం (FTA) ఖరారు కావడంపై ప్రధాని హర్షం వ్యక్తం చేస్తూ, ఇది ఆత్మవిశ్వాసం, ఉత్పాదకత కలిగిన నవ భారత నిర్మాణంలో ఒక మైలురాయి అని కొనియాడారు. ఈ ఒప్పందంతో అంతర్జాతీయంగా ఒక కొత్త మార్కెట్ అందుబాటులోకి వచ్చిందని, భారతీయ తయారీదారులు ఈ అవకాశాన్ని అందిపుచ్చుకోవాలని ఆయన పిలుపునిచ్చారు. ప్రస్తుతం ప్రపంచం మొత్తం భారత్ వైపు ఎంతో ఆశగా చూస్తున్నదని, మన ప్రజాస్వామ్యం, జనాభా శక్తి  ప్రపంచానికి కొత్త ఆశలను ఇస్తున్నాయని ప్రధాని తెలిపారు. నేడు భారత్ ప్రపంచ ఆకర్షణకు కేంద్రబిందువుగా మారిందని ఆయన గర్వంగా ప్రకటించారు.

పార్లమెంట్ సమావేశాల ప్రాధాన్యతను గుర్తు చేస్తూ, ఇది గందరగోళానికి సమయం కాదని, సమస్యల పరిష్కారానికి కృషి చేయాల్సిన సమయమని ప్రధాని ప్రజాప్రతినిధులకు సూచించారు. దేశాభివృద్ధి కోసం ప్రతి ఒక్కరూ నిర్మాణాత్మకంగా వ్యవహరించాలని ఆయన కోరారు. ప్రజాస్వామ్య దేవాలయమైన పార్లమెంట్ వేదికగా, భారత దేశ సామర్థ్యాన్ని, ప్రజాస్వామ్యం పట్ల మనకున్న అంకితభావాన్ని ప్రపంచ సమాజానికి చాటిచెప్పే గొప్ప అవకాశం పార్లమెంటేరియన్లకు ఉందని ప్రధాని మోడీ ఈ సందర్భంగా గుర్తు చేశారు.

ప్రధాని ప్రసంగం నిండా కపటత్వమే

•  మోడీపై జైరాం రమేష్ ఘాటు విమర్శలు

న్యూఢిల్లీ: పార్లమెంట్ బడ్జెట్ సమావేశాల సందర్భంగా ప్రధాని నరేంద్ర మోడీ చేసిన ప్రసంగంపై కాంగ్రెస్ సీనియర్ నేత జైరాం రమేష్ తీవ్రస్థాయిలో మండిపడ్డారు. ప్రధాని మాటల్లో వాస్తవాల కంటే కపటత్వమే ఎక్కువగా కనిపిస్తున్నదని ఆయన ఎద్దేవా చేశారు. దేశం ఎదుర్కొంటున్న అతిపెద్ద సవాళ్లైన నిరుద్యోగం, పెరుగుతున్న ధరలు, ఆర్థిక అసమానతల గురించి ప్రధాని తన ప్రసంగంలో ఎక్కడా ప్రస్తావించలేదని ఆరోపించారు. కేవలం ఆడంబరమైన మాటలతో ప్రజలను తప్పుదోవ పట్టించే ప్రయత్నం చేస్తున్నారని విమర్శించారు. ముఖ్యంగా 'వికసిత భారత్' గురించి మాట్లాడే ప్రధాని, ప్రస్తుత సమాజంలో సామాన్యులు అనుభవిస్తున్న ఇబ్బందులను ఎందుకు విస్మరిస్తున్నారని ఆయన ప్రశ్నించారు.

ప్రభుత్వం అనుసరిస్తున్న విధానాల వల్ల దేశంలో పేదలు మరింత పేదలుగా, ధనికులు మరింత ధనవంతులుగా మారుతున్నారని జైరాం రమేష్ విశ్లేషించారు. ఒకవైపు దేశ ఆర్థిక వ్యవస్థ బాగుందని చెబుతూనే, మరోవైపు నిత్యావసర వస్తువుల ధరలు ఆకాశాన్ని అంటుతున్నా ప్రభుత్వం నియంత్రించలేకపోతోందని ధ్వజమెత్తారు. పార్లమెంట్‌లో ప్రతిపక్షాల గొంతును నొక్కే ప్రయత్నం జరుగుతున్నదని, చర్చలకు అవకాశం ఇవ్వకుండా ఏకపక్షంగా నిర్ణయాలు తీసుకోవడం ప్రజాస్వామ్యానికి విఘాతమని ఆయన ఆవేదన వ్యక్తం చేశారు. కేవలం ప్రకటనలకే పరిమితం కాకుండా, క్షేత్రస్థాయిలో ప్రజలు ఎదుర్కొంటున్న సమస్యలకు పరిష్కారం చూపేలా బడ్జెట్ ఉండాలని ఆయన డిమాండ్ చేశారు. ప్రధాని మోడీ ప్రసంగం కేవలం రాజకీయ ప్రయోజనాల కోసం చేసినదిగానే ఉందని, అందులో దేశ హితం లేదని ఆయన విమర్శించారు.

భారత్ - ఈయూ ఒప్పందంపై ట్రంప్ సర్కార్ ఆగ్రహం

• ఉక్రెయిన్ ప్రయోజనాల కంటే వ్యాపారమే ముఖ్యమంటూ ఐరోపాపై ధ్వజం

వాషింగ్టన్: భారత్, యూరోపియన్ యూనియన్ (EU) మధ్య కుదిరిన చారిత్రక స్వేచ్ఛా వాణిజ్య ఒప్పందంపై అమెరికాలోని ట్రంప్ యంత్రాంగం తీవ్రస్థాయిలో మండిపడింది. ఐరోపా దేశాలు ఉక్రెయిన్ ప్రజల ప్రయోజనాల కంటే తమ వ్యాపార ప్రయోజనాలకే పెద్దపీట వేశాయని అమెరికా ట్రెజరీ సెక్రటరీ స్కాట్ బెస్సెంట్ విమర్శించారు. మంగళవారం ఢిల్లీలో భారత్ - ఈయూ దేశాలు ఈ ఒప్పందాన్ని "అన్ని ఒప్పందాలకు తల్లి" (Mother of all deals) గా అభివర్ణిస్తూ సంతకాలు చేసిన నేపథ్యంలో వాషింగ్టన్ నుంచి ఈ ఘాటు ప్రతిచర్య వచ్చింది. ఐరోపా దేశాలు ఒకవైపు ఉక్రెయిన్‌కు మద్దతు ఇస్తున్నామని చెబుతూనే, మరోవైపు రష్యా చమురును శుద్ధి చేసి అమ్ముతున్న భారత్‌తో భారీ వాణిజ్య ఒప్పందం చేసుకోవడం వారి ద్వంద్వ నీతికి నిదర్శనమని బెస్సెంట్ ఎద్దేవా చేశారు.

అమెరికా వాణిజ్య ప్రతినిధి జామిసన్ గ్రీర్ స్పందిస్తూ.. ఈ ఒప్పందంలో భారత్ స్పష్టమైన విజేతగా నిలిచిందని, ఐరోపా మార్కెట్లలో భారత ఎగుమతులకు భారీగా వెసులుబాటు లభిస్తుందని పేర్కొన్నారు. ట్రంప్ ప్రభుత్వం అమెరికా దేశీయ ఉత్పత్తిని ప్రోత్సహించడానికి ఇతర దేశాల దిగుమతులపై పన్నులు పెంచడంతో, ఐరోపా దేశాలు తమ వస్తువులను అమ్ముకోవడానికి ప్రత్యామ్నాయంగా భారత్ వైపు మళ్లాయని ఆయన విశ్లేషించారు. ఉక్రెయిన్ యుద్ధం విషయంలో భారత్ రష్యా నుంచి చమురు కొనుగోలు చేస్తున్నదని తెలిసినా ఐరోపా మౌనంగా ఉండి ఈ ఒప్పందం చేసుకుందని, ఇది ఉక్రెయిన్ ప్రజల త్యాగాలను అవమానించడమేనని ట్రంప్ బృందం ఆరోపించింది. ఐరోపా దేశాలు తమ సొంత భద్రత కంటే వాణిజ్య లాభాలకే ప్రాధాన్యం ఇస్తున్నాయని అమెరికా ఉన్నతాధికారులు విమర్శించారు.

ఈ వాణిజ్య ఒప్పందం వల్ల ఐరోపా దేశాలు గ్లోబలైజేషన్‌ను (ప్రపంచీకరణ) మరింతగా ప్రోత్సహిస్తున్నాయని, అదే సమయంలో అమెరికా మాత్రం తన దేశీయ ప్రయోజనాల రక్షణకే మొగ్గు చూపుతున్నదని గ్రీర్ స్పష్టం చేశారు. ఐరోపా దేశాల ఈ చర్య ఉక్రెయిన్ యుద్ధాన్ని ముగించాలన్న అంతర్జాతీయ ప్రయత్నాలను బలహీనపరుస్తుందని అమెరికా ఆందోళన వ్యక్తం చేసింది. రష్యా చమురును భారత్ కొనుగోలు చేస్తున్నందుకు అమెరికా గతంలోనే భారత్‌పై 25 శాతం సుంకాలను విధించిన సంగతిని గుర్తు చేస్తూ, ఐరోపా మాత్రం అలాంటి కఠిన చర్యలు తీసుకోకుండా భారత్‌తో చేతులు కలపడం తమకు నిరాశ కలిగించిందని బెస్సెంట్ పేర్కొన్నారు.

‘ఆపరేషన్ సిందూర్’తో భారత సత్తా ప్రపంచానికి చాటిచెప్పాం

• ప్రధాని మోడీ ప్రశంసలు

న్యూఢిల్లీ: పాక్ ప్రాయోజిత ఉగ్రవాదానికి వ్యతిరేకంగా భారత్ చేపట్టిన ‘ఆపరేషన్ సిందూర్’ సాయుధ దళాల తిరుగులేని పరాక్రమానికి, దేశ సైనిక శక్తికి నిదర్శనమని ప్రధాని నరేంద్ర మోడీ కొనియాడారు. బుధవారం ఢిల్లీలో జరిగిన నేషనల్ క్యాడెట్ కార్ప్స్ (NCC) వార్షిక ర్యాలీలో ఆయన ప్రసంగిస్తూ ఈ కీలక వ్యాఖ్యలు చేశారు. 2025 ఏప్రిల్‌లో పహల్గామ్ ఉగ్రదాడికి ప్రతీకారంగా మే 7న భారత్ ఈ ఆపరేషన్‌ను చేపట్టింది. కేవలం 88 గంటల్లోనే శత్రువును మోకాళ్లపైకి తెచ్చి, సుమారు 100 మందికి పైగా ఉగ్రవాదులను హతమార్చడంతో పాటు వారి స్థావరాలను ధ్వంసం చేయడంలో మన సైన్యం అద్భుత విజయాన్ని సాధించిందని ప్రధాని గుర్తు చేశారు.

ఆధునిక యుద్ధ తంత్రం కేవలం సరిహద్దులకే పరిమితం కాలేదని, నేడు యుద్ధాలు 'కోడ్ మరియు క్లౌడ్' (సైబర్, ఇన్ఫర్మేషన్ వార్‌ఫేర్) ద్వారా కూడా జరుగుతున్నాయని ప్రధాని పేర్కొన్నారు. ఆపరేషన్ సిందూర్ సమయంలో కేవలం త్రివిధ దళాలే కాకుండా, సుమారు 75,000 మంది ఎన్‌సీసీ క్యాడెట్లు కూడా రక్తదాన శిబిరాలు, ప్రథమ చికిత్స వంటి సేవా కార్యక్రమాల ద్వారా తమ వంతు బాధ్యతను నిర్వర్తించడాన్ని ఆయన ప్రత్యేకంగా అభినందించారు. స్వదేశీ సాంకేతికతతో తయారైన బ్రహ్మోస్, ఆకాశ్ క్షిపణులు, ఎస్-400 రక్షణ వ్యవస్థలు ఈ ఆపరేషన్ సమయంలో భారత పౌరులకు రక్షణ కవచంలా నిలిచాయని, ఇది 'ఆత్మనిర్భర్ భారత్' సాధించిన ఘనత అని ఆయన స్పష్టం చేశారు.

సాంకేతికతలో వెనుకబడిన దేశాలు ఆర్థికంగానే కాకుండా భద్రతాపరంగానూ బలహీనపడతాయని, అందుకే మన యువత ఏఐ (AI), డ్రోన్లు , ఇతర నూతన ఆవిష్కరణలపై దృష్టి సారించాలని మోడీ పిలుపునిచ్చారు. 77వ గణతంత్ర దినోత్సవ పరేడ్‌లో ఆపరేషన్ సిందూర్ థీమ్‌తో ప్రదర్శించిన శకటం భారత శౌర్యానికి ప్రతీకగా నిలిచిందని ఆయన పేర్కొన్నారు. ఉగ్రవాదంపై భారత్ అనుసరిస్తున్న 'జీరో టాలరెన్స్' విధానం ప్రపంచ దేశాలకు ఒక స్పష్టమైన సందేశాన్ని పంపిందని, భారత్ తన సార్వభౌమత్వాన్ని కాపాడుకోవడానికి ఎంతటి కఠిన నిర్ణయాలకైనా వెనుకాడబోదని ప్రధాని పునరుద్ఘాటించారు.

నేడే పార్లమెంట్‌లో ఆర్థిక సర్వే

• దేశ ఆర్థిక గమనాన్ని ఆవిష్కరించనున్న నిర్మలా సీతారామన్

న్యూఢిల్లీ: కేంద్ర బడ్జెట్ 2026-27 ప్రవేశపెట్టడానికి ముందు అత్యంత కీలకమైన అడుగు పడబోతున్నది. కేంద్ర ఆర్థిక మంత్రి నిర్మలా సీతారామన్ గురువారం (జనవరి 29, గురువారం) లోక్‌సభలో ఆర్థిక సర్వే 2025-26ను ప్రవేశపెట్టనున్నారు. గత ఆర్థిక సంవత్సరంలో దేశం సాధించిన ప్రగతి, ఎదుర్కొన్న సవాళ్లు మరియు భవిష్యత్తు అంచనాలను ఈ సర్వే వివరిస్తుంది. ప్రధాన ఆర్థిక సలహాదారు (CEA) డాక్టర్ వి. అనంత నాగేశ్వరన్ నేతృత్వంలోని బృందం రూపొందించిన ఈ నివేదిక, ఫిబ్రవరి 1న ప్రవేశపెట్టబోయే పూర్తిస్థాయి బడ్జెట్‌కు  దిశానిర్దేశంలా పనిచేస్తుంది.

ఈ సర్వేలో దేశ స్థూల దేశీయోత్పత్తి (GDP) వృద్ధి రేటు, ద్రవ్యోల్బణం పరిస్థితి, వ్యవసాయ, పారిశ్రామిక రంగాల పనితీరుపై లోతైన విశ్లేషణ ఉండనుంది. ముఖ్యంగా అంతర్జాతీయంగా నెలకొన్న భౌగోళిక రాజకీయ ఉద్రిక్తతలు, వాణిజ్య ఆంక్షల మధ్య భారత ఆర్థిక వ్యవస్థ ఎంతవరకు నిలకడగా ఉందనే అంశంపై సర్వత్రా ఆసక్తి నెలకొంది. ఈ ఉదయం 11 గంటలకు మంత్రి పార్లమెంట్‌లో సర్వేను ప్రవేశపెట్టిన అనంతరం, ప్రధాన ఆర్థిక సలహాదారు మీడియా సమావేశం నిర్వహించి కీలక గణాంకాలను వివరించనున్నారు. ఈసారి సర్వేలో కృత్రిమ మేధ (AI) వల్ల ఉద్యోగ రంగంలో వచ్చే మార్పులు, తయారీరంగం బలోపేతం వంటి అంశాలకు ప్రాధాన్యం లభించే అవకాశం ఉంది.

బుధవారం (జనవరి 28) రాష్ట్రపతి ద్రౌపది ముర్ము ప్రసంగంతో ప్రారంభమైన బడ్జెట్ సమావేశాలు, నేటి ఆర్థిక సర్వేతో కీలక దశకు చేరుకున్నాయి. ఫిబ్రవరి 1వ తేదీన ఆదివారం అయినప్పటికీ, నిర్మలా సీతారామన్ వరుసగా 9వ సారి బడ్జెట్‌ను ప్రవేశపెట్టి సరికొత్త చరిత్ర సృష్టించబోతున్నారు. దేశ ఆర్థిక స్థితిగతులపై స్పష్టమైన చిత్రాన్ని ఇచ్చే ఈ సర్వే ఆధారంగానే, రాబోయే బడ్జెట్‌లో సామాన్యులకు లభించే ఊరట లేదా కొత్త పథకాలపై ఒక అంచనాకు వచ్చే అవకాశం ఉంది.

నేడు అజిత్ పవార్ అంతిమయాత్ర

• ముగిసిన రాజకీయ ధ్రువతార ప్రస్థానం
• ప్రత్యేక రథంలో పార్థివ దేహం తరలింపు!

ముంబై: మహారాష్ట్ర రాజకీయాల్లో కీలక నేత, ఉప ముఖ్యమంత్రి అజిత్ పవార్ కన్నుమూయడంతో ఆ రాష్ట్రంలో విషాద ఛాయలు అలముకున్నాయి. ఆయనకు తుది వీడ్కోలు పలికేందుకు ప్రభుత్వం, కుటుంబసభ్యులు భారీ ఎత్తున ఏర్పాట్లు చేశారు. అజిత్ పవార్ భౌతిక కాయాన్ని ప్రజల సందర్శనార్థం ఉంచిన అనంతరం గురువారం ప్రత్యేకంగా అలంకరించిన రథంలో ఆయన అంతిమయాత్ర  సాగనుంది. తమ ప్రియతమ నేతను చివరిసారిగా చూసుకునేందుకు మహారాష్ట్ర నలుమూలల నుంచి అభిమానులు, పార్టీ కార్యకర్తలు భారీ సంఖ్యలో ముంబైకి చేరుకుంటున్నారు.

ముంబైలోని ప్రధాన వీధుల గుండా సాగే ఈ అంతిమయాత్రలో అధికార యంత్రాంగం, రాజకీయ ప్రముఖులు పాల్గొననున్నారు. అజిత్ పవార్ రాజకీయ ప్రస్థానాన్ని స్మరిస్తూ అభిమానులు కన్నీటి పర్యంతమవుతున్నారు. శాంతిభద్రతల దృష్ట్యా పోలీసులు కట్టుదిట్టమైన భద్రతా ఏర్పాట్లు చేయడమే కాకుండా, అంతిమయాత్ర సాగే మార్గాల్లో ట్రాఫిక్ ఆంక్షలు విధించారు. అధికారిక లాంఛనాలతో నిర్వహించే ఈ అంత్యక్రియలకు కేంద్ర, రాష్ట్రస్థాయి నేతలు హాజరై నివాళులు అర్పించనున్నారు. మహారాష్ట్ర అభివృద్ధిలో ఆయన పోషించిన పాత్రను గుర్తు చేసుకుంటూ రాష్ట్ర ప్రభుత్వం ఇప్పటికే సంతాప దినాలను ప్రకటించింది. ఒక శక్తివంతమైన రాజకీయ శకం అజిత్ పవార్ మరణంతో ముగిసిందని రాజకీయ విశ్లేషకులు అభిప్రాయపడుతున్నారు.

తెలంగాణలో మోగిన పురపోరు నగారా

 ఫిబ్రవరి 11న పోలింగ్‌

హైదరాబాద్‌: తెలంగాణలోని ఏడు నగరపాలక సంస్థలు, 116 పురపాలక సంఘాలకు ఎన్నికల షెడ్యూలు విడుదలైంది. అన్ని జిల్లాల కలెక్టర్లు, ఎస్పీలు, పోలీసు కమిషనర్లతో రాష్ట్ర ఎన్నికల కమిషనర్‌ రాణికుముదిని సమావేశం నిర్వహించారు. అనంతరం ఎస్‌ఈసీ రాణికుముదిని ఎన్నికల షెడ్యూల్‌ విడుదల చేశారు. దీంతో రాష్ట్ర వ్యాప్తంగా ఎన్నికల కోడ్‌ అమల్లోకి వచ్చింది. 

మున్సిపల్‌ ఎన్నికల ముఖ్య తేదీలు...

జనవరి 28 నుంచి నామినేషన్ల ప్రక్రియ ప్రారంభం

జనవరి 30తో ముగియనున్న నామినేషన్ల స్వీకరణ గడవు

జనవరి 31న అభ్యర్థుల నామినేషన్ల పరిశీలన

ఫిబ్రవరి 3.. నామినేషన్ల ఉపసంహరణకు తుది గడువు

ఫిబ్రవరి 11న పోలింగ్‌ 

రీపోలింగ్‌ ఎక్కడైనా ఉంటే ఫిబ్రవరి 12న నిర్వహిస్తారు

ఫిబ్రవరి 13న ఓట్ల లెక్కింపు

ఫిబ్రవరి 16న మున్సిపల్ ఛైర్మన్‌, వైస్‌ ఛైర్మన్‌ ఎన్నిక

ఫిబ్రవరి 16న కార్పొరేషన్‌ మేయర్‌, డిప్యూటీ మేయర్‌ ఎన్నిక

మున్సిపల్‌ ఎన్నికల్లో ఓటు హక్కు వినియోగించుకోనున్న 53 లక్షల మందికి పైగా ఓటర్లు 

ఆ సంతోషం కేవలం '10 నిమిషాలే'

• రూ. 12 కోట్ల రోల్స్ రాయిస్ కార్ కొన్న బాద్‌షా
• వైరల్ అవుతున్న క్రేజీ కామెంట్స్

ప్రముఖ బాలీవుడ్ ర్యాపర్, సింగర్ బాద్‌షా తన లగ్జరీ జీవనశైలికి సంబంధించి ఆసక్తికరమైన విషయాన్ని వెల్లడించారు. ఇటీవల ఒక ఇంటర్వ్యూలో పాల్గొన్న ఆయన, తాను దాదాపు 12 కోట్ల రూపాయలు ఖర్చు చేసి అత్యంత విలాసవంతమైన 'రోల్స్ రాయిస్ కల్లినన్' కారును కేవలం క్షణికావేశంలో  కొనుగోలు చేసినట్లు తెలిపారు. అయితే, అంత భారీ మొత్తం వెచ్చించి ఆ కారును ఇంటికి తెచ్చుకున్న తర్వాత కలిగిన ఆనందం కేవలం పది నిమిషాల కంటే ఎక్కువ సేపు ఉండలేదని ఆయన నిజాయితీగా ఒప్పుకున్నారు. కారు కొన్న వెంటనే ఆ ఎక్సైట్‌మెంట్ ఆవిరైపోయిందని, ఆ తర్వాత అది తన గ్యారేజీలో ఉన్న ఇతర వస్తువుల లాగే సాధారణంగా అనిపించిందని బాద్‌షా పేర్కొన్నారు. ఖరీదైన వస్తువులు కొన్నప్పుడు కలిగే సంతోషం తాత్కాలికమేనని, అది మనిషిలో శాశ్వత తృప్తిని నింపలేదని ఆయన వ్యాఖ్యానించారు. ప్రస్తుతం సోషల్ మీడియాలో వైరల్ అవుతున్న ఈ వ్యాఖ్యలు విలాసవంతమైన వస్తువుల పట్ల ఉన్న వ్యామోహంపై సరికొత్త చర్చకు దారితీశాయి.

లిరిసిస్ట్ వైరముత్తుపై దాడి

•  తిరుప్పూర్ ఈవెంట్‌లో కలకలం
• ఘటన తర్వాత ఆయన తొలి స్పందన ఇదే!

ప్రముఖ తమిళ సినీ గేయ రచయిత వైరముత్తుకు తిరుప్పూర్‌లో చేదు అనుభవం ఎదురైంది. గత బుధవారం (జనవరి 21) జిల్లా కలెక్టరేట్ కార్యాలయం వెలుపల జరిగిన ఒక సాంస్కృతిక కార్యక్రమంలో పాల్గొనేందుకు ఆయన వచ్చినప్పుడు, ఒక మహిళ ఆయనపైకి చెప్పు విసిరింది. 'కొంగు కళ, సాహిత్య, సంస్కృతి మండలి' ప్రారంభోత్సవానికి అతిథిగా విచ్చేసిన వైరముత్తుకు అధికారులు,  న్యాయవాదులు స్వాగతం పలుకుతున్న సమయంలో ఈ ఘటన చోటుచేసుకుంది. అయితే, ఆ చెప్పు ఆయనకు తగలకుండా పక్కనే ఉన్న గుంపులో పడటంతో పెను ప్రమాదం తప్పింది. ఈ హఠాత్ పరిణామంతో అక్కడ ఉన్నవారంతా ఒక్కసారిగా షాక్‌కు గురయ్యారు. వెంటనే అప్రమత్తమైన పోలీసులు సదరు మహిళను అదుపులోకి తీసుకున్నారు.

పోలీసుల విచారణలో ఆ మహిళను 45 ఏళ్ల జయగా గుర్తించారు. ఆమె కొంతకాలంగా తన వ్యక్తిగత సమస్యలపై కలెక్టరేట్ వద్ద నిరసన తెలుపుతోందని, ఆమెకు మతిస్థిమితం సరిగా లేదని అధికారులు వెల్లడించారు. గతంలో కూడా ఆమె కలెక్టరేట్, కోర్టు ప్రాంగణాల్లో ఇలాంటి ఆందోళనలకు దిగినట్లు పోలీసులు గుర్తించారు. తన ఫిర్యాదులపై అధికారులు స్పందించడం లేదనే కోపంతోనే ఆమె ఈ చర్యకు పాల్పడినట్లు ప్రాథమిక సమాచారం. ప్రస్తుతం ఈ ఘటనకు సంబంధించిన వీడియో సోషల్ మీడియాలో విపరీతంగా వైరల్ అవుతోంది.

ఈ ఘటన జరిగిన కొద్దిసేపటికే వైరముత్తు సోషల్ మీడియా వేదికగా స్పందించారు. అయితే, ఆయన తనపై జరిగిన చెప్పు దాడి గురించి ఎక్కడా ప్రస్తావించకుండా, తిరుప్పూర్‌లో తాను పాల్గొన్న మరో కార్యక్రమం గురించి రాసుకొచ్చారు. "తిరుప్పూర్‌లో జరిగిన 'వళ్లువర్ బోధనలు - వైరముత్తు ప్రసంగం' కార్యక్రమానికి వేలాది మంది విద్యార్థులు హాజరయ్యారు. వారి కరతాళ ధ్వనుల మధ్య నేను నన్ను నేను మర్చిపోయాను" అంటూ తన పర్యటనలోని సానుకూల అంశాలను పంచుకున్నారు. వైరముత్తుపై గతంలో సింగర్ చిన్మయి లైంగిక వేధింపుల ఆరోపణలు చేసిన నేపథ్యంలో, ఈ చెప్పు దాడి ఘటన కోలీవుడ్‌లో మరోసారి హాట్ టాపిక్‌గా మారింది.

మెగాస్టార్ వ్యాఖ్యలపై చిన్మయి సీరియస్

 

'నేను కోరుకున్నాను కాబట్టే వైరాముత్తు నాపై లైంగిక దాడికి యత్నించారా?' అంటూ ఘాటు స్పందన

ప్రముఖ గాయని చిన్మయి శ్రీపాద మెగాస్టార్ చిరంజీవి చేసిన 'కాస్టింగ్ కౌచ్' వ్యాఖ్యలపై తీవ్రస్థాయిలో విరుచుకుపడ్డారు. ఇటీవల ఒక ఇంటర్వ్యూలో చిరంజీవి మాట్లాడుతూ.. పరిశ్రమలో వేధింపుల గురించి ప్రస్తావిస్తూ, "అమ్మాయిలు ఆస్కారం ఇస్తేనే అటువంటివి జరుగుతాయి" అనే అర్థం వచ్చేలా మాట్లాడిన వీడియో వైరల్ కావడంతో చిన్మయి సోషల్ మీడియా వేదికగా స్పందించారు. తాను గతంలో ఎదుర్కొన్న వేధింపులను గుర్తుచేస్తూ, వైరాముత్తు తనపై లైంగిక దాడికి ప్రయత్నించింది తాను అతనికి ఆస్కారం ఇవ్వడం వల్ల జరిగిందా అని ఆమె ఘాటుగా ప్రశ్నించారు. వేధింపులకు గురైన బాధితులను నిందించడం (Victim Blaming) సరికాదని, ఇలాంటి అగ్ర నటులు బాధ్యతాయుతంగా మాట్లాడాలని ఆమె హితవు పలికారు. సినిమా రంగంలోని పెద్దలు ఇలాంటి వ్యాఖ్యలు చేయడం వల్ల వేధింపులకు పాల్పడేవారికి మరింత బలం చేకూరుతుందని, బాధితులు బయటకు వచ్చి మాట్లాడటానికి భయపడే ప్రమాదం ఉందని చిన్మయి ఆవేదన వ్యక్తం చేశారు. ప్రస్తుతం ఈ వివాదం ఇటు సినీ వర్గాల్లోనూ, అటు సోషల్ మీడియాలోనూ పెద్ద ఎత్తున చర్చకు దారితీసింది.

భారత్ - ఈయూ చరిత్రాత్మక వాణిజ్య సంరంభం

• 'మదర్ ఆఫ్ ఆల్ డీల్స్' ఖరారు 
• సరికొత్త శిఖరాలకు ద్వైపాక్షిక బంధం

భారతదేశం, యూరోపియన్ యూనియన్ (EU) మధ్య దశాబ్దాల నిరీక్షణకు తెరదించుతూ మంగళవారం న్యూఢిల్లీలో చరిత్రాత్మక స్వేచ్ఛా వాణిజ్య ఒప్పందం (FTA) ఖరారైంది. ప్రధాని నరేంద్ర మోడీ, యూరోపియన్ కౌన్సిల్ ప్రెసిడెంట్ ఆంటోనియో కోస్టా, యూరోపియన్ కమిషన్ ప్రెసిడెంట్ ఉర్సులా వాన్ డెర్ లేయన్‌ల మధ్య జరిగిన ప్రతినిధిస్థాయి చర్చల అనంతరం ఈ కీలక ప్రకటన వెలువడింది. ఈ ఒప్పందాన్ని ప్రధాని మోడీ , ఉర్సులా వాన్ డెర్ లేయన్ సంయుక్తంగా 'మదర్ ఆఫ్ ఆల్ డీల్స్' (అన్ని ఒప్పందాలకూ తల్లి వంటిది) అని అభివర్ణించారు. వాణిజ్యం, భద్రత, రక్షణ భాగస్వామ్యం, గ్రీన్ హైడ్రోజన్, విపత్తు నిర్వహణ వంటి కీలకరంగాల్లో మొత్తం ఏడు కీలక ఒప్పందాలను ఇరుపక్షాలు ఈ సందర్భంగా మార్చుకున్నాయి.

ఈ సందర్భంగా ప్రధాని మోడీ మాట్లాడుతూ.. భారత్ - ఈయూ సంబంధాలు ఈ జు కొత్త శిఖరాలను తాకాయని ఆనందం వ్యక్తం చేశారు. ఇది కేవలం వాణిజ్యానికి సంబంధించిన ఒప్పందం మాత్రమే కాదని, ఇరు దేశాల ఉమ్మడి శ్రేయస్సు కోసం రూపొందించిన సరికొత్త మార్గదర్శి అని ఆయన పేర్కొన్నారు. 27 దేశాలతో కూడిన యూరోపియన్ యూనియన్‌తో భారత్ కుదుర్చుకున్న అతిపెద్ద స్వేచ్ఛా వాణిజ్య ఒప్పందం ఇదేనని, దీనివల్ల అంతర్జాతీయస్థాయిలో పెట్టుబడులు పెరగడమే కాకుండా సరఫరా గొలుసులు (Supply Chains) మరింత బలోపేతం అవుతాయని ఆయన వివరించారు. ఈ ఒప్పందం ద్వారా రెండు బిలియన్ల జనాభా ఉన్న మార్కెట్ అనుసంధానం కావడం విశేషం.

యూరోపియన్ కౌన్సిల్ ప్రెసిడెంట్ ఆంటోనియో కోస్టా ఈ ఒప్పందాన్ని ఒక చరిత్రాత్మక ఘట్టంగా అభివర్ణిస్తూ, భారత్ - ఈయూ సంబంధాల్లో ఒక కొత్త అధ్యాయం ప్రారంభమైందని తెలిపారు. గణతంత్ర వేడుకలకు ముఖ్యఅతిథిగా హాజరుకావడం తనకెంతో గౌరవంగా ఉందని ఉర్సులా వాన్ డెర్ లేయన్ పేర్కొన్నారు. భారతదేశం సాధిస్తున్న విజయాలు ప్రపంచ స్థిరత్వానికి, ఆర్థిక శ్రేయస్సుకు ఎంతో అవసరమని ఆమె కొనియాడారు. 2024-25 ఆర్థిక సంవత్సరంలో భారత్ - ఈయూ మధ్య సుమారు 136 బిలియన్ డాలర్ల వాణిజ్యం జరగగా, తాజా ఒప్పందంతో ఇది రాబోయే కొద్ది ఏళ్లలోనే రెట్టింపు అయ్యే అవకాశం ఉందని ఆర్థిక నిపుణులు అంచనా వేస్తున్నారు.

దక్షిణ కొరియాకు ట్రంప్ భారీ షాక్

• దిగుమతి సుంకాలను 25 శాతానికి పెంచుతూ సంచలన నిర్ణయం

అమెరికా అధ్యక్షుడు డొనాల్డ్ ట్రంప్ దక్షిణ కొరియా వస్తువులపై దిగుమతి సుంకాలను ఒక్కసారిగా 15 శాతం నుంచి 25 శాతానికి పెంచుతున్నట్లు ప్రకటించి అంతర్జాతీయ వాణిజ్యవర్గాల్లో కలకలం రేపారు. ఇరుదేశాల మధ్య కుదిరిన వాణిజ్య ఒప్పందాన్ని అమలు చేయడంలో దక్షిణ కొరియా శాసనసభ వైఫల్యం చెందడమే ఈ నిర్ణయానికి ప్రధాన కారణమని ఆయన పేర్కొన్నారు. ఈ మేరకు సోషల్ మీడియా వేదికగా స్పందించిన ట్రంప్.. ఆటోమొబైల్స్, కలప, ఔషధ రంగాలు. ఇతర పరస్పర వాణిజ్య వస్తువులపై ఈ పెంచిన సుంకాలు వర్తిస్తాయని స్పష్టం చేశారు. అయితే, సవరించిన ఈ పన్నులు ఇప్పటికే అమలులోకి వచ్చాయా లేదా అనే అంశంపై ఇంకా పూర్తి స్పష్టత రావాల్సి ఉంది.

గత ఏడాది (2024) గణాంకాల ప్రకారం, దక్షిణ కొరియా నుంచి అమెరికాకు సుమారు 132 బిలియన్ డాలర్ల విలువైన వస్తువులు ఎగుమతి అయ్యాయి. ముఖ్యంగా కార్లు, సెమీకండక్టర్లు, ఎలక్ట్రానిక్ వస్తువుల సరఫరాలో అమెరికాకు దక్షిణ కొరియా ఒక ప్రధాన వనరుగా ఉంది. ఇప్పుడు తాజా పన్ను పెంపుతో ఈ వస్తువుల ధరలు భారీగా పెరిగే అవకాశం ఉంది. గతేడాది జూలైలో కుదిరిన ఒప్పందం ప్రకారం సుంకాలను 15 శాతానికి ఖరారు చేస్తూ, అందుకు ప్రతిగా అమెరికా నియంత్రణలోని పెట్టుబడుల కోసం దక్షిణ కొరియా 350 బిలియన్ డాలర్లు సమకూరుస్తుందని ట్రంప్ గతంలో ప్రకటించారు. అయితే తాజా నిర్ణయం ఆ ఒప్పందాన్ని తలకిందులు చేయడమే కాకుండా, ఇరు దేశాల మధ్య వాణిజ్య యుద్ధానికి దారితీసే సూచనలు కనిపిస్తున్నాయి.

అన్ని ఒప్పందాలకూ తల్లి వంటిది

• భారత్ - ఈయూ వాణిజ్య ఒప్పందంపై ప్రధాని మోడీ ప్రశంసల జల్లు

భారతదేశం, యూరోపియన్ యూనియన్ (EU) మధ్య కుదిరిన స్వేచ్ఛా వాణిజ్య ఒప్పందాన్ని (FTA) ప్రధాని నరేంద్ర మోడీ చరిత్రాత్మకమైనదిగా అభివర్ణించారు. మంగళవారం జరిగిన 'ఇండియా ఎనర్జీ వీక్' ప్రారంభోత్సవంలో వర్చువల్ పద్ధతిలో ప్రసంగించిన ఆయన, ఈ ఒప్పందాన్ని "అన్ని ఒప్పందాలకూ తల్లి వంటిది" (Mother of all deals) అని పేర్కొన్నారు. ప్రపంచంలోని రెండు అతిపెద్ద ఆర్థిక వ్యవస్థల మధ్య ఉన్న అద్భుతమైన సమన్వయానికి ఇది నిదర్శనమని ఆయన కొనియాడారు. ఈ ఒప్పందం ఇప్పటికే ఉన్న భారత్-బ్రిటన్ వాణిజ్య ఒప్పందానికి అదనపు బలాన్ని ఇస్తుందని, దీనివల్ల దేశంలోని తయారీ, సేవా రంగాలు కొత్త పుంతలు తొక్కుతాయని ఆశాభావం వ్యక్తం చేశారు.

ఈ మైలురాయి వంటి ఒప్పందం భారతదేశంలోని 140 కోట్ల మంది ప్రజలతో పాటు యూరోపియన్ యూనియన్‌లోని మిలియన్ల మందికి అపారమైన అవకాశాలను కల్పిస్తుందని ప్రధాని వివరించారు. ప్రపంచ జీడీపీలో ఈ రెండు ప్రాంతాల వాటా 25 శాతం ఉండటమే కాకుండా, అంతర్జాతీయ వాణిజ్యంలో మూడో వంతు భాగస్వామ్యాన్ని కలిగి ఉన్నాయని ఆయన గుర్తుచేశారు. ఆర్థిక ప్రయోజనాలతో పాటు, ప్రజాస్వామ్యం, చట్టబద్ధ పాలన పట్ల మనకున్న ఉమ్మడి నిబద్ధతను ఈ ఒప్పందం పునరుద్ఘాటిస్తుందని ఆయన పేర్కొన్నారు. ప్రపంచంలోనే అత్యంత వేగంగా వృద్ధి చెందుతున్న ఆర్థికవ్యవస్థగా భారత్ ఎదిగిందని, ఇంధన రంగంలో పెట్టుబడులకు మన దేశం ఒక గొప్ప వేదికని ఆయన స్పష్టం చేశారు.

పెట్రోలియం ఉత్పత్తుల ఎగుమతుల్లో భారత్ ప్రస్తుతం ప్రపంచంలోనే టాప్-5 దేశాల్లో ఒకటిగా ఉందని ప్రధాని మోడీ గర్వంగా ప్రకటించారు. పెట్రోలియం రిఫైనింగ్ సామర్థ్యంలో ప్రస్తుతం ప్రపంచంలోనే రెండో స్థానంలో ఉన్న భారతదేశం, త్వరలోనే ప్రథమ స్థానానికి చేరుకుంటుందని ధీమా వ్యక్తం చేశారు. ప్రస్తుతం మన వార్షిక రిఫైనింగ్ సామర్థ్యం 260 మిలియన్ మెట్రిక్ టన్నులుగా (MMTPA) ఉందని, దానిని 300 MMTPA కి పెంచేందుకు చురుగ్గా కృషి చేస్తున్నామని ఆయన వెల్లడించారు. 'ఇండియా ఎనర్జీ వీక్' అనేది అంతర్జాతీయ పెట్టుబడిదారులను ఆకర్షించడమే కాకుండా, శక్తి రంగంలో చర్చలు , ఆచరణాత్మక చర్యల కోసం ఒక ప్రపంచస్థాయి వేదికగా అవతరించిందని ప్రధాని మోడీ ప్రశంసించారు.

భారత్ - ఈయూ వ్యూహాత్మక బంధంలో నవ శకం

• యూరోపియన్ యూనియన్ అగ్రనేతలతో ప్రధాని మోడీ కీలక భేటీ

భారతదేశం, యూరోపియన్ యూనియన్ (EU) మధ్య మైత్రిని సరికొత్త శిఖరాలకు చేరుస్తూ ప్రధాని నరేంద్ర మోడీ మంగళవారం న్యూఢిల్లీలో యూరోపియన్ కౌన్సిల్ ప్రెసిడెంట్ ఆంటోనియో కోస్టా, యూరోపియన్ కమిషన్ ప్రెసిడెంట్ ఉర్సులా వాన్ డెర్ లేయన్‌లతో ద్వైపాక్షిక చర్చలు జరిపారు. 77వ గణతంత్ర దినోత్సవ వేడుకలకు ముఖ్యఅతిథులుగా విచ్చేసిన ఈ నేతలతో ప్రధాని మోడీ నిర్వహించిన ఈ ప్రతినిధి స్థాయి చర్చలు ఇరుదేశాల మధ్య ఉన్న వ్యూహాత్మక భాగస్వామ్యాన్ని మరింత బలోపేతం చేయనున్నాయి. ఈ కీలక భేటీ అనంతరం రక్షణ, వాణిజ్యం, సాంకేతిక రంగాలలో పలు కీలక ఒప్పందాలపై సంతకాలు జరిగే అవకాశం ఉందని అధికారికవర్గాలు వెల్లడించాయి.

2004 నుంచి భారత్, యూరోపియన్ యూనియన్ మధ్య కొనసాగుతున్న వ్యూహాత్మక భాగస్వామ్యం గత ఏడాది కాలంగా మరిన్ని వినూత్న పుంతలు తొక్కుతున్నది. ముఖ్యంగా గత ఏడాది ఫిబ్రవరిలో యూరోపియన్ కమిషన్ ప్రతినిధుల బృందం భారత్‌లో పర్యటించిన తర్వాత రెండు దేశాల మధ్య ద్వైపాక్షిక సంబంధాలు వేగంగా విస్తరించాయి. సోమవారం గణతంత్ర పరేడ్‌లో ఈయూ నేతల భాగస్వామ్యం, మంగళవారం జరిగిన  16వ భారత్-ఈయూ శిఖరాగ్ర సమావేశం ఇరు దేశాల మధ్య పరస్పర ప్రయోజనాలున్న ప్రాధాన్య రంగాల్లో సహకారాన్ని పెంపొందించడానికి ఒక గొప్ప వేదికగా నిలిచాయి. ఆర్థిక వ్యవస్థ, ఇంధన భద్రత, గ్లోబల్ సప్లై చైన్ వంటి కీలక అంశాలపై ఈ భేటీలో విస్తృతంగా చర్చించారు.

ప్రపంచ ఆర్థిక గమనానికి భారత్ - ఈయూ వాణిజ్య ఒప్పందం కీలకం

• అంతర్జాతీయ వేదికపై ప్రధాని మోడీ కీలక వ్యాఖ్యలు

భారతదేశం, యూరోపియన్ యూనియన్ (EU) మధ్య కుదిరిన స్వేచ్ఛా వాణిజ్య ఒప్పందం ప్రపంచంలోని రెండు అతిపెద్ద ఆర్థిక వ్యవస్థల మధ్య అద్భుతమైన సమన్వయమని ప్రధాని నరేంద్ర మోడీ కొనియాడారు. మంగళవారం జరిగిన 'ఇండియా ఎనర్జీ వీక్' సదస్సులో వర్చువల్ పద్ధతిలో ప్రసంగించిన ఆయన, ఈ ఒప్పందం ఇప్పటికే ఉన్న భారత్ - బ్రిటన్ వాణిజ్య ఒప్పందానికి పరిపూర్ణంగా నిలుస్తుందని, దీనివల్ల దేశీయ తయారీ, సేవా రంగాలు భారీగా పుంజుకుంటాయని ఆశాభావం వ్యక్తం చేశారు. ప్రపంచ వాణిజ్యం, సరఫరా గొలుసులో ఈ రెండు ఆర్థిక వ్యవస్థలు దాదాపు మూడో వంతు వాటాను కలిగి ఉన్నాయని, ఈ నేపథ్యంలో కుదిరిన ఒప్పందం అంతర్జాతీయ విపణిలో కీలక మార్పులకు నాంది పలుకుతుందని ఆయన పేర్కొన్నారు.

శక్తి రంగంలో పెట్టుబడులకు భారతదేశం ఒక గొప్ప అవకాశాల గని అని, ఇక్కడ ఇంధన అవసరాలు నిరంతరం పెరుగుతున్నాయని ప్రధాని మోడీ వివరించారు. 'ఇండియా ఎనర్జీ వీక్' అనేది ప్రపంచవ్యాప్తంగా ఉన్న పెట్టుబడిదారులను ఆకర్షించడానికి, చర్చలు జరపడానికి ఒక అంతర్జాతీయ వేదికగా వేగంగా ఎదిగిందని ఆయన ప్రశంసించారు. పెట్రోలియం ఉత్పత్తుల ఎగుమతుల్లో భారత్ ప్రస్తుతం ప్రపంచంలోనే టాప్-5 దేశాల్లో ఒకటిగా ఉందని, 150 కంటే ఎక్కువ దేశాలకు మనం ఇంధన ఉత్పత్తులను ఎగుమతి చేస్తున్నామని ఆయన గర్వంగా ప్రకటించారు. ఈ సదస్సు కేవలం చర్చలకే పరిమితం కాకుండా, గ్లోబల్ ఎనర్జీ సెక్టార్‌లో ఆచరణాత్మకమైన మార్పులకు ఒక ప్లాట్‌ఫారమ్‌గా నిలుస్తుందని ప్రధాని తన ప్రసంగంలో స్పష్టం చేశారు.

స్నేహితుడి స్మృతిలో 'లూయిస్ టాంలిన్సన్' కంటతడి

• లియామ్ పేన్ జ్ఞాపకార్థం 'డార్క్ టు లైట్' సాంగ్ విడుదల

ప్రముఖ హాలీవుడ్ గాయకుడు లూయిస్ టాంలిన్సన్ తన దివంగత స్నేహితుడు, మాజీ 'వన్ డైరెక్షన్' బ్యాండ్‌మేట్ లియామ్ పేన్‌కు సంగీతం ద్వారా భావోద్వేగ నివాళి అర్పించారు. గతేడాది అక్టోబర్‌లో అర్జెంటీనాలో జరిగిన ప్రమాదంలో లియామ్ పేన్ మరణించిన సంగతి తెలిసిందే. తాజాగా లూయిస్ విడుదల చేసిన తన కొత్త ఆల్బమ్ 'హౌ డిడ్ ఐ గెట్ హియర్?' (How Did I Get Here?) లోని 'డార్క్ టు లైట్' అనే పాట ఇప్పుడు అభిమానుల కళ్లు చెమ్మగిల్లేలా చేస్తున్నది. ఈ పాటలోని సాహిత్యం, లూయిస్ అనుభవిస్తున్న బాధను, తన స్నేహితుడిని కోల్పోయిన తీరును కళ్లకు కట్టినట్లు వివరిస్తున్నది.

ముఖ్యంగా "నీ కళ్లలో నీవు ఎలా కనిపిస్తావో ఒక్కసారి చూస్తే బాగుండేది.. అది నిన్ను చీకటి నుంచి వెలుగులోకి తీసుకురాగలదా?" వంటి వరుసలు లియామ్ మానసిక పోరాటాన్ని, స్నేహితుడిగా లూయిస్ పడుతున్న ఆవేదనను ప్రతిబింబిస్తున్నాయి. ఈ పాట పేరు కూడా లియామ్ పేన్ శరీరంలోని "హియర్ డార్క్ మీట్స్ లైట్" అనే టాటూను స్ఫురింపజేస్తున్నదని అభిమానులు  సోషల్‌ మీడియాలో చర్చిస్తున్నారు. లూయిస్ గతంలోనే లియామ్‌ను తన సోదరుడిగా భావిస్తానని, తన జీవితంలో ఒక భాగం కొట్టుకుపోయిందని ఆవేదన వ్యక్తం చేశారు. ఇప్పుడు విడుదలైన ఈ గీతం వారి మధ్య ఉన్న విడదీయలేని అనుబంధానికి నిదర్శనంగా నిలిచింది.

ఒడియా సంగీత లోకానికి తీరని లోటు

• ప్రముఖ మ్యూజిక్ డైరెక్టర్ అభిజిత్ మజుందార్ కన్నుమూత

ఒడియా చిత్ర పరిశ్రమలో 'హిట్ మెషిన్'గా పేరుగాంచిన ప్రముఖ సంగీత దర్శకుడు, గాయకుడు అభిజిత్ మజుందార్ (54) ఆదివారం కన్నుమూశారు. గత కొంతకాలంగా కాలేయ సంబంధిత వ్యాధులు, ఇతర ఆరోగ్య సమస్యలతో బాధపడుతున్న ఆయన, భువనేశ్వర్‌లోని ఎయిమ్స్ (AIIMS) ఆసుపత్రిలో చికిత్స పొందుతూ తుదిశ్వాస విడిచారు. గతేడాది సెప్టెంబర్ నుంచి ఆసుపత్రిలో చికిత్స పొందుతున్న ఆయన ఆరోగ్యం శనివారం రాత్రి క్షిణించింది. ఆదివారం ఉదయం గుండెపోటు రావడంతో వైద్యులు చేసిన ప్రయత్నాలు ఫలించలేదు. 1991లో సంబల్ పురి సంగీతంతో తన ప్రస్థానాన్ని ప్రారంభించిన అభిజిత్, మూడు దశాబ్దాల కెరీర్‌లో 700కు పైగా పాటలకు సంగీతాన్ని అందించారు.

అభిజిత్ మజుందార్ మృతి పట్ల ఒడిశా ముఖ్యమంత్రి మోహన్ చరణ్ మాఝీ తీవ్ర దిగ్భ్రాంతి వ్యక్తం చేశారు. అభిజిత్ మరణం ఒడియా సంగీత, సినీ, సాంస్కృతిక రంగానికి తీరని లోటని ఆయన అన్నారు. తనదైన విశిష్ట శైలితో దశాబ్దాల పాటు లక్షలాది మంది శ్రోతల హృదయాల్లో అభిజిత్ స్థానం సంపాదించుకున్నారని సీఎం పేర్కొన్నారు. కేంద్ర మంత్రి ధర్మేంద్ర ప్రధాన్, మాజీ ముఖ్యమంత్రి నవీన్ పట్నాయక్ సహా పలువురు ప్రముఖులు ఆయనకు ఘన నివాళులర్పించారు. 'లవ్ స్టోరీ', 'సిస్టర్ శ్రీదేవి' వంటి సూపర్ హిట్ చిత్రాలకు ఆయన అందించిన సంగీతం ఎప్పటికీ నిలిచిపోతుందని అభిమానులు ఆవేదన వ్యక్తం చేస్తున్నారు.

దేశభక్తి పరవశం.. 'వందేమాతరం' ఆల్బమ్ విడుదల

• గణతంత్ర వేడుకల వేళ ఉషా రాణి దామెర్ల, వినయ్ వర్మల స్వరార్చన

భారతదేశ 77వ గణతంత్ర దినోత్సవ వేడుకల నేపథ్యంలో దేశభక్తిని చాటిచెప్పేలా రూపొందించిన 'వందేమాతరం' మ్యూజిక్ ఆల్బమ్‌ను ప్రముఖులు ఉషా రాణి దామెర్ల,  వినయ్ వర్మ సంయుక్తంగా విడుదల చేశారు. ఈ సందర్భంగా వారు మాట్లాడుతూ.. వందేమాతరం అనేది కేవలం ఒక గీతం మాత్రమే కాదని, అది ప్రతి భారతీయుడి గుండె చప్పుడు, దేశం పట్ల మనకున్న అంకితభావానికి ప్రతీక అని పేర్కొన్నారు. స్వాతంత్య్ర పోరాట కాలం నుంచి నేటి వరకు మనల్ని ఏకం చేస్తున్న ఈ గీతాన్ని కొత్త తరానికి మరింత దగ్గర చేయాలనే ఉద్దేశంతో ఈ ప్రత్యేక ఆల్బమ్‌ను రూపొందించినట్లు వారు తెలిపారు. ఈ గీతం వింటుంటే ప్రతి పౌరుడిలో జాతీయ భావం ఉప్పొంగుతుందని, దేశవ్యాప్తంగా ఉన్న సంగీత ప్రియులను ఈ ఆల్బమ్ అలరిస్తుందని వారు ఆశాభావం వ్యక్తం చేశారు.

ఈ ఆల్బమ్‌లోని సంగీతం, దృశ్యకావ్యం భారత సంస్కృతిని, దేశ ప్రగతిని ప్రతిబింబించేలా ఉన్నాయని నిర్వాహకులు వెల్లడించారు. గణతంత్ర దినోత్సవ శుభవేళ ఇటువంటి గీతాలు యువతలో బాధ్యతాయుతమైన దేశభక్తిని నింపుతాయని వినయ్ వర్మ వ్యాఖ్యానించారు. ఉషా రాణి దామెర్ల తన ప్రసంగంలో ఈ పాట దేశం మొత్తానికి అత్యంత ప్రత్యేకం అని, దీని రూపకల్పనలో భాగమైన ప్రతి కళాకారుడు ఎంతో గర్వంగా భావిస్తున్నాడని చెప్పారు. విభిన్న భాషలు, ప్రాంతాలు ఉన్నప్పటికీ మనందరినీ కలిపే ఏకైక మంత్రం 'వందేమాతరం' అని వారు ఉద్ఘాటించారు. ఈ నూతన ఆల్బమ్ ప్రస్తుతం అన్ని డిజిటల్ ప్లాట్‌ఫారమ్‌లలో అందుబాటులో ఉంది.

డ్రాగన్, ఏనుగు కలిసి చిందులేయాలి

• భాగస్వామ్యంతోనే అభివృద్ధి సాధ్యం
• భారత గణతంత్ర వేడుకల వేళ జిన్‌పింగ్ కీలక సందేశం

భారతదేశ 77వ గణతంత్ర దినోత్సవాన్ని పురస్కరించుకుని చైనా అధ్యక్షుడు షీ జిన్‌పింగ్ భారత్‌కు ప్రత్యేక శుభాకాంక్షలు తెలియజేస్తూ ఆసక్తికరమైన సందేశాన్ని పంపారు. ఆసియాలోని రెండు అగ్రరాజ్యాలైన చైనా (డ్రాగన్), భారత్ (ఏనుగు) పరస్పర విరోధాన్ని వీడి కలిసి ముందుకు సాగాలని ఆయన ఆకాంక్షించారు. భారత్ - చైనాలు కేవలం పొరుగు దేశాలు మాత్రమే కాదని, ప్రపంచంలోనే అత్యంత వేగంగా అభివృద్ధి చెందుతున్న దేశాలని పేర్కొంటూ.. ఈ రెండు దేశాలు పోటీ పడటం కంటే సహకరించుకోవడం ద్వారా ప్రపంచ స్థిరత్వానికి, ఆర్థిక వృద్ధికి తోడ్పడగలవని ఆయన అభిప్రాయపడ్డారు. పరస్పర ప్రయోజనాలు, గౌరవంతో కూడిన బలమైన భాగస్వామ్యాన్ని నిర్మించుకోవాలని, అప్పుడే ఆసియా శతాబ్దం కల నిజమవుతుందని జిన్‌పింగ్ తన సందేశంలో ఉద్ఘాటించారు.

 కొన్నేళ్లుగా సరిహద్దు వివాదాల కారణంగా ఇరు దేశాల మధ్య ఉద్రిక్తతలు నెలకొన్న నేపథ్యంలో, జిన్‌పింగ్ పంపిన ఈ సానుకూల సందేశం దౌత్య వర్గాల్లో ప్రాధాన్యం సంతరించుకుంది. సంక్లిష్టమైన అంతర్జాతీయ పరిస్థితుల మధ్య భారత్ - చైనా మధ్య సంబంధాల పునరుద్ధరణ అవసరమని, ఇరు దేశాల మధ్య ఉన్న సమస్యలను చర్చల ద్వారా పరిష్కరించుకోవాలని ఆయన కోరారు. ఆర్థిక, సాంస్కృతిక రంగాల్లో కలిసి పనిచేయడం ద్వారా ఇరు దేశాల ప్రజల జీవన ప్రమాణాలు మెరుగుపడతాయని ఆయన ఆశాభావం వ్యక్తం చేశారు. గణతంత్ర దినోత్సవం సందర్భంగా భారత్ సాధిస్తున్న ప్రగతిని అభినందిస్తూ, రాబోయేకాలంలో ఇరు దేశాల మధ్య కొత్త అధ్యాయం మొదలవుతుందని చైనా అధ్యక్షుడు ఆకాంక్షించారు.

కర్తవ్య పథంలో మిరుమిట్లు గొలిపిన భారత్ శౌర్యం

• సాంస్కృతిక వైభవం, సైనిక పరాక్రమాల మేళవింపుతో 77వ గణతంత్ర వేడుకలు

భారతదేశం 77వ గణతంత్ర దినోత్సవాన్ని శనివారం అత్యంత వైభవోపేతంగా జరుపుకుంది. దేశ రాజధానిలోని కర్తవ్య పథంలో రాష్ట్రపతి ద్రౌపది ముర్ము నేతృత్వంలో జరిగిన ఈ వేడుకలు భారత సైనిక శక్తిని, సాంస్కృతిక వైవిధ్యాన్ని ప్రపంచానికి చాటిచెప్పాయి. ఈ కార్యక్రమం ప్రధాని నరేంద్ర మోడీ నేషనల్ వార్ మెమోరియల్ వద్ద అమరవీరులకు నివాళులర్పించడంతో ప్రారంభమైంది. అనంతరం రాష్ట్రపతి ద్రౌపది ముర్ము, ఈ ఏడాది గణతంత్ర వేడుకల ప్రధాన అతిథులైన యూరోపియన్ కౌన్సిల్ ప్రెసిడెంట్ ఆంటోనియో కోస్టా , యూరోపియన్ కమిషన్ ప్రెసిడెంట్ ఉర్సులా వాన్ డెర్ లేయన్‌లతో కలిసి సాంప్రదాయక బగ్గీలో కర్తవ్య పథానికి చేరుకున్నారు. జాతీయ పతాకావిష్కరణ అనంతరం 21 ఫిరంగుల గంభీర శబ్దాల మధ్య జాతీయ గీతం మార్మోగింది. ఈ సందర్భంగా భారత వైమానిక దళానికి చెందిన గ్రూప్ కెప్టెన్ శుభాన్షు శుక్లాకు అత్యున్నత శాంతి కాల శౌర్య పురస్కారం 'అశోక చక్ర'ను రాష్ట్రపతి ప్రదానం చేశారు.

ఈ ఏడాది పరేడ్ 'స్వతంత్రతా కా మంత్ర: వందేమాతరం', 'సమృద్ధి కా మంత్ర: ఆత్మనిర్భర్ భారత్' అనే ఇతివృత్తాలతో సాగింది. వివిధ రాష్ట్రాలు, కేంద్రపాలిత ప్రాంతాలు, కేంద్ర మంత్రిత్వ శాఖలకు చెందిన 30 శకటాలు ప్రదర్శనలో పాల్గొన్నాయి. వందేమాతరం గీతం 150 ఏళ్ల ప్రస్థానాన్ని, వివిధ రంగాలలో భారత్ సాధిస్తున్న స్వయం సమృద్ధిని ఈ శకటాలు కళ్లకు కట్టాయి. ముఖ్యంగా 'ఆపరేషన్ సింధూర్'లో భారత సైన్యం ఉపయోగించిన అత్యాధునిక ఆయుధ వ్యవస్థల నమూనాలతో కూడిన త్రివిధ దళాల శకటం ప్రత్యేక ఆకర్షణగా నిలిచింది. బ్రహ్మోస్, ఆకాష్ క్షిపణి వ్యవస్థలు, సూర్యాస్త్ర రాకెట్ లాంచర్లు , అర్జున్ మెయిన్ బాటిల్ ట్యాంకులు భారత రక్షణ సన్నద్ధతను గర్వంగా చాటాయి.

ఈ వేడుకల్లో 2,500 మందికి పైగా కళాకారులు ప్రదర్శించిన సాంస్కృతిక కార్యక్రమాలు ప్రేక్షకులను మంత్రముగ్ధులను చేశాయి. పరేడ్ ముగింపులో భారత వైమానిక దళానికి చెందిన రాఫెల్, సుఖోయ్-30, మిగ్-29 మరియు అపాచీ హెలికాప్టర్లతో కూడిన 29 యుద్ధ విమానాలు ఆకాశంలో విన్యాసాలు చేస్తూ చేసిన 'ఫ్లైపాస్ట్' చూపరులను అబ్బురపరిచింది. వివిధ రంగాలకు చెందిన విశిష్ట అతిథులు, సామాన్య ప్రజల భాగస్వామ్యంతో జరిగిన ఈ వేడుకలు నవ భారత్  ఆత్మవిశ్వాసాన్ని ప్రతిబింబించాయి.