కర్ణాటకలో ‘కుర్చీ’లాటపై డి.కె. శివకుమార్ సంచలన వ్యాఖ్యలు

• అన్నీ బయట చెప్పలేం.. చర్చించలేం
• నాయకత్వ మార్పు ఊహాగానాలపై సస్పెన్స్

బెంగళూరు: కర్ణాటక రాజకీయాల్లో గత కొంతకాలంగా వినిపిస్తున్న నాయకత్వ మార్పు వార్తలపై ఉపముఖ్యమంత్రి, కేపీసీసీ అధ్యక్షుడు డి.కె. శివకుమార్ ఆసక్తికర వ్యాఖ్యలు చేశారు. రాష్ట్రంలో ముఖ్యమంత్రి మార్పు లేదా అధికార పంపిణీకి సంబంధించిన అంశాలపై జరుగుతున్న ప్రచారాన్ని ఆయన తోసిపుచ్చలేదు, అలాగని ధృవీకరించలేదు. "పార్టీ అంతర్గత విషయాలను, నాయకత్వ మార్పు గురించి జరిగే చర్చలను మేము బహిరంగంగా వెల్లడించలేము, అలాగే వాటిపై చర్చించలేము" అని ఆయన వ్యాఖ్యానించడం ఇప్పుడు రాజకీయవర్గాల్లో చర్చనీయాంశమైంది. హైకమాండ్ నిర్ణయమే ఫైనల్ అని చెబుతూనే, ప్రస్తుతానికి ప్రభుత్వం సుస్థిరంగా ఉందని ఆయన స్పష్టం చేశారు.

సిద్ధరామయ్య , డి.కె. శివకుమార్ మధ్య పదవీ కాలం పంపిణీ  ఒప్పందం ఉందని, త్వరలోనే మార్పు ఉండబోతున్నదని వస్తున్న వార్తలపై విలేకరులు అడిగిన ప్రశ్నలకు ఆయన తనదైన శైలిలో సమాధానమిచ్చారు. పార్టీలో క్రమశిక్షణ ముఖ్యమని, ఏవైనా నిర్ణయాలు ఉంటే అవి అధిష్టానం ద్వారానే వస్తాయని చెప్పారు. కేవలం మీడియాలో వచ్చే ఊహాగానాలపై తాను స్పందించబోనని, రాష్ట్ర అభివృద్ధిపైనే తమ దృష్టి ఉందని ఆయన వివరించారు. అయినప్పటికీ, ఆయన చేసిన 'బహిర్గతం చేయలేం' అనే వ్యాఖ్యలు కర్ణాటక కాంగ్రెస్ లోపల ఏదో జరుగుతోందన్న అనుమానాలకు మరింత ఊతమిస్తున్నాయి.

ప్రతిపక్ష బీజేపీ, జేడీఎస్ లు ఈ అవకాశాన్ని వాడుకుంటూ ప్రభుత్వం కూలిపోబోతున్నదని విమర్శలు గుప్పిస్తున్న తరుణంలో, శివకుమార్ చేసిన ఈ సంయమన వ్యాఖ్యలు ప్రాధాన్యం సంతరించుకున్నాయి. పార్టీ శ్రేణులు , మంత్రులు నాయకత్వం గురించి బహిరంగ వ్యాఖ్యలు చేయవద్దని ఇప్పటికే అధిష్టానం హెచ్చరించినట్లు సమాచారం. ఈ సస్పెన్స్ నేపథ్యంలో, రాబోయే రోజుల్లో కర్ణాటక రాజకీయాల్లో ఎలాంటి మార్పులు చోటుచేసుకుంటాయో వేచి చూడాలి.