‘నీరు కాదు.. విషం పంచారు’

• ప్రభుత్వ నిర్లక్ష్యమే ప్రాణాలు తీసింది
• బాధితులకు భారీ పరిహారం డిమాండ్
• ఇండోర్‌లో రాహుల్ గాంధీ పర్యటన

ఇండోర్ (మధ్యప్రదేశ్): మధ్యప్రదేశ్ రాష్ట్రం ఇండోర్‌లోని భగీరథపుర ప్రాంతంలో కలుషిత నీరు తాగి పలువురు ప్రాణాలు కోల్పోయిన ఘటనపై లోక్‌సభ ప్రతిపక్ష నేత రాహుల్ గాంధీ శనివారం తీవ్రస్థాయిలో మండిపడ్డారు. బాధితులను, మృతుల కుటుంబాలను పరామర్శించిన ఆయన.. ఈ విషాదానికి ప్రభుత్వ నిర్లక్ష్యమే కారణమని ఆరోపించారు. స్వచ్ఛమైన నీరు అందించాల్సిన బాధ్యతను విస్మరించిన ప్రభుత్వం, బాధ్యులను గుర్తించి కఠిన చర్యలు తీసుకోవాలని డిమాండ్ చేశారు. బాధితులకు మెరుగైన ఉచిత వైద్యంతో పాటు మృతుల కుటుంబాలకు తక్షణమే భారీ పరిహారం అందించాలని ఆయన డిమాండ్ చేశారు.

రాజకీయాలు చేస్తున్నదని రాహుల్ ధ్వజం

కలుషిత నీరు తాగి ప్రజలు మరణిస్తుంటే రాష్ట్ర ప్రభుత్వం రాజకీయాలు చేస్తున్నదని రాహుల్ ధ్వజమెత్తారు. "స్మార్ట్ సిటీ పేరుతో ప్రగల్భాలు పలుకుతున్న ప్రభుత్వం, సామాన్యులకు తాగడానికి నీరు కూడా ఇవ్వలేకపోతున్నది. కలుషిత నీరు వస్తున్నదని ప్రజలు పదే పదే ఫిర్యాదు చేసినా అధికారులు కుంభకర్ణుడిలా నిద్రపోయారు" అని ఆయన దుయ్యబట్టారు. స్వయంగా బాధితుల ఇళ్లకు వెళ్లి వారి కష్టాలను అడిగి తెలుసుకున్న రాహుల్, వారికి కాంగ్రెస్ పార్టీ అండగా ఉంటుందని భరోసా ఇచ్చారు. మానవతా దృక్పథంతో బాధితులను పరామర్శిస్తుంటే దానిని కూడా బీజేపీ ప్రభుత్వం రాజకీయం చేయడం సిగ్గుచేటని ఆయన వ్యాఖ్యానించారు.

దోషులపై కఠిన చర్యలు తీసుకునే వరకు పోరాటం ఆగదు

మరోవైపు, ఈ ఘటనపై ఇప్పటికే స్పందించిన ముఖ్యమంత్రి మోహన్ యాదవ్, మృతుల కుటుంబాలకు రూ. 2 లక్షల ఆర్థికసాయం , బాధితులకు ఉచిత వైద్యం అందిస్తామని ప్రకటించారు. అయితే, ప్రభుత్వం ప్రకటించిన ఈ మొత్తం ఏమాత్రం సరిపోదని, ప్రభుత్వ తప్పిదానికి భారీ మూల్యం చెల్లించాలని రాహుల్ పట్టుబట్టారు. కేవలం పరిహారంతో సరిపెట్టకుండా, మురుగునీరు తాగునీటి పైపుల్లోకి ఎలా కలిసిందో నిగ్గుతేల్చాలని ఆయన కోరారు. ఈ ఘటనపై సమగ్ర విచారణ జరిపించి దోషులపై కఠిన చర్యలు తీసుకునే వరకు తమ పోరాటం ఆగదని రాహుల్ స్పష్టం చేశారు.