నితిన్ నబిన్ నిజంగానే మోడీకి 'బాస్' అవుతారా?

• బీజేపీ కొత్త సారథి ఎదుట సవాలక్ష ప్రశ్నలు
• కాషాయ పార్టీలో మారేదేమిటి?

భారతీయ జనతా పార్టీ జాతీయ అధ్యక్షుడిగా నితిన్ నబిన్ బాధ్యతలు చేపట్టడం రాజకీయవర్గాల్లో ఆసక్తికర చర్చకు దారితీసింది. ప్రధాని మోడీ స్వయంగా "పార్టీ పరంగా నబిన్ నా బాస్" అని వ్యాఖ్యానించినప్పటికీ, క్షేత్రస్థాయిలో పరిస్థితి అందుకు భిన్నంగా ఉంటుందని రాజకీయ విశ్లేషకులు అభిప్రాయపడుతున్నారు. 2001లో గుజరాత్ సీఎం అయినప్పటి నుండి మోడీ పనితీరును గమనిస్తే, పార్టీ అధ్యక్షుడికి స్వతంత్ర నిర్ణయాలు తీసుకునే అవకాశం ఎంతవరకు ఉంటుందనేది మిలియన్ డాలర్ల ప్రశ్న. త్వరలో నబిన్ నియమించబోయే కొత్త కార్యవర్గం కూడా ఆయన సొంత ఎంపికయ్యే అవకాశం లేదని, మోడీ ,అమిత్ షా నిర్దేశించిన వారికే అందులో చోటు దక్కుతుందని విశ్లేషకులు భావిస్తున్నారు.

నితిన్ నబిన్ ఎంపిక ప్రక్రియ అనుమానాలు

నితిన్ నబిన్ ఎంపిక ప్రక్రియ కూడా అనేక అనుమానాలకు తావిచ్చింది. జేపీ నడ్డా వారసుడి గురించి పార్టీలో ఎటువంటి ముందస్తు చర్చ జరగకపోవడం, డిసెంబర్ మధ్యలో అకస్మాత్తుగా ఆయన్ను వర్కింగ్ ప్రెసిడెంట్‌గా ప్రకటించడం గమనార్హం. గతంలో పార్టీ రాజ్యాంగం ప్రకారం జరిగే సంస్థాగత సమావేశాలు ఇప్పుడు కేవలం నామమాత్రంగానే సాగుతున్నాయని, చివరకు ప్రధాని మోడీని పార్లమెంటరీ పార్టీ నేతగా ఎన్నుకునే ప్రక్రియలో కూడా పాత పద్ధతులు పాటించలేదని విమర్శలు వస్తున్నాయి. ఈ పరిస్థితుల్లో పార్టీ రాజ్యాంగబద్ధమైన ప్రక్రియలను పునరుద్ధరించడం నబిన్ ముందున్న అతిపెద్ద సవాలు.

సీనియర్లతో సమన్వయమే సవాల్‌

నబిన్‌కు జాతీయ రాజకీయాల్లో గానీ, పార్టీ కేంద్ర కమిటీల్లో గానీ గతంలో పెద్దగా అనుభవం లేదు. గతంలో బిహార్ యువ మోర్చా అధ్యక్షుడిగా పనిచేసినప్పటికీ, అప్పట్లో నీతీష్ కుమార్ నేతృత్వంలోని జేడీయూ బలంగా ఉండటంతో ఆయన తనదైన ముద్ర వేయలేకపోయారు. ఇప్పుడు పార్టీ అధ్యక్షుడిగా ఆయన తనకంటే సీనియర్లైన రాజ్‌నాథ్ సింగ్, నితిన్ గడ్కరీ, శివరాజ్ సింగ్ చౌహాన్ వంటి నేతలను సమన్వయం చేసుకోవాల్సి ఉంటుంది. అలాగే రాష్ట్రాల్లో తిరుగులేని నాయకులుగా ఎదిగిన యోగి ఆదిత్యనాథ్, దేవేంద్ర ఫడ్నవీస్ వంటి వారితో సఖ్యతగా ఉంటూనే పార్టీ పట్టును నిరూపించుకోవాల్సి ఉంటుంది.

అధికారం విషయంలో మార్పు లేదు

2024 లోక్‌సభ ఎన్నికల్లో బీజేపీ సొంతంగా మెజారిటీ సాధించలేకపోవడానికి ఆరెస్సెస్ కార్యకర్తలు ఉత్సాహంగా పని చేయకపోవడమే ప్రధాన కారణమని ఒక వాదన ఉంది. మోడీ చుట్టూ వ్యక్తిగత ఆరాధన పెరగడం వల్లే సంఘ్ కేడర్ దూరమైందని భావిస్తున్న తరుణంలో, నబిన్ ఎంపికలో కూడా ఆరెస్సెస్ ప్రమేయం తక్కువగా ఉందని తెలుస్తున్నది. మొత్తానికి బీజేపీ నాయకత్వంలో 'తరం మార్పు' జరిగినట్లు కనిపిస్తున్నా, అసలు అధికారం ఎవరి చేతిలో ఉంటుందనే విషయంలో మాత్రం ఎటువంటి మార్పూ లేదని, పాత పద్ధతులే కొనసాగుతాయని రాజకీయ విశ్లేషణలు స్పష్టం చేస్తున్నాయి.