చిలికా తీరంలో విదేశీ విహంగాల సందడి

• 11 లక్షలు దాటిన పక్షుల రాక
• ఈసారి రెండు కొత్త అతిథుల ఎంట్రీ
• పక్షుల ప్రేమికులకు కనువిందు చేస్తున్న ఆసియాలోనే అతిపెద్ద ఉప్పునీటి సరస్సు

భువనేశ్వర్: ఆసియాలోనే అతిపెద్ద ఉప్పునీటి సరస్సు అయిన ఒడిశాలోని చిలికా సరస్సు ఈ శీతాకాలంలో లక్షలాది పక్షులకు ఆశ్రయమిస్తున్నది. ఆదివారం నిర్వహించిన శీతాకాల పక్షుల గణనలో ఏకంగా 196 జాతులకు చెందిన 11.32 లక్షల పక్షులు ఇక్కడ విహరిస్తున్నట్లు అటవీ శాఖ అధికారులు గుర్తించారు. గతేడాదితో పోలిస్తే పక్షుల సంఖ్య స్వల్పంగా పెరగడమే కాకుండా, ఈసారి 'ప్లేన్ మార్టిన్', 'బెంగాల్ బుష్ లార్క్' అనే రెండు కొత్త జాతి పక్షులు తొలిసారిగా చిలికా గడ్డపై దర్శనమిచ్చాయి. వన్యప్రాణి విభాగం చీఫ్ వార్డెన్ పి.కె. ఝా తెలిపిన వివరాల ప్రకారం.. 2025లో పక్షుల సంఖ్య 11,27,228 ఉండగా, ఈ ఏడాది అది 11,32,200కు చేరింది. అంటే సుమారు 5 వేల పక్షులు అదనంగా వచ్చాయి.

చిలికా చిత్తడి నేలల్లోని నలబన పక్షుల సంరక్షణ కేంద్రంలో కూడా పక్షుల తాకిడి పెరిగింది. గతేడాది ఇక్కడ 3.43 లక్షల పక్షులు ఉండగా, ఈసారి ఆ సంఖ్య దాదాపు 4 లక్షలకు చేరుకుంది. విదేశాల నుంచి వచ్చే వలస పక్షుల సంఖ్య కూడా గణనీయంగా పెరగడం విశేషం. ఈసారి వచ్చిన పక్షుల్లో అత్యధికంగా 'నార్తర్న్ పింటైల్' (2.18 లక్షలు), 'యురేషియా విజియన్' (1.53 లక్షలు), 'గాడ్వాల్' (1.43 లక్షలు) జాతులు ఉన్నాయి. ఒడిశా వ్యాప్తంగా ఉన్న 51 అటవీ విభాగాల్లోని ప్రధాన సరస్సులు, జలాశయాల వద్ద ఈ గణన ఏకకాలంలో నిర్వహించారు. భీతర్కనికా, హీరాకుడ్, అన్సుపా వంటి ప్రాంతాల్లో కూడా శిక్షణ పొందిన సిబ్బంది ఈ సర్వేలో పాల్గొన్నారు.

ఈ భారీ గణన ప్రక్రియలో అటవీ శాఖ సిబ్బందితో పాటు జూలాజికల్ సర్వే ఆఫ్ ఇండియా, బాంబే నేచురల్ హిస్టరీ సొసైటీ  శాస్త్రవేత్తలు, పక్షి ప్రేమికులు, స్వచ్ఛంద సంస్థల ప్రతినిధులు పాల్గొన్నారు. వివిధ విశ్వవిద్యాలయాల పరిశోధకులు, విద్యార్థులు కూడా ఉదయం 6 గంటల నుంచే రంగంలోకి దిగి పక్షుల స్థితిగతులను అంచనా వేశారు. గతంలో వేర్వేరు తేదీల్లో ఈ సర్వే జరిగేదని, కానీ గత రెండేళ్లుగా రాష్ట్రవ్యాప్తంగా ఒకే రోజున నిర్వహించడం వల్ల కచ్చితమైన సమాచారం లభిస్తున్నదని అధికారులు తెలిపారు. చిలికా అందాలకు ఈ పక్షుల కిలకిలరావాలు తోడవ్వడంతో పర్యాటకుల తాకిడి కూడా పెరిగే అవకాశం ఉంది.