అసోం గడ్డపై నుంచే కాంగ్రెస్‌కు గట్టి జవాబు

 

• మీరు విద్వేషం పంచారు.. మేము అభివృద్ధి చేశాం 
• ఈశాన్య రాష్ట్రాల పట్ల కాంగ్రెస్ పాపాలను కడుగుతున్నామన్న ప్రధాని మోడీ

గువహటి (అసోం): పశ్చిమ బెంగాల్ పర్యటన ముగించుకుని అసోం చేరుకున్న ప్రధాని నరేంద్ర మోడీ, కాంగ్రెస్ పార్టీపై విమర్శల పదును పెంచారు. ఆదివారం అసోంలోని పలు అభివృద్ధి ప్రాజెక్టులను ప్రారంభించిన అనంతరం ఆయన మాట్లాడుతూ.. కాంగ్రెస్ దశాబ్దాల పాలనలో అసోం - ఈశాన్య రాష్ట్రాలను దేశ ప్రధాన స్రవంతి నుంచి వేరు చేసిందని ఆరోపించారు. "అసోం గడ్డపై నుంచే కాంగ్రెస్‌కు ప్రజలు గట్టి జవాబు ఇస్తారు. గతం లో కాంగ్రెస్ చేసిన రాజకీయ పాపాలను మా ప్రభుత్వం ఒక్కొక్కటిగా కడుగుతున్నది" అని ఆయన ఘాటుగా వ్యాఖ్యానించారు. ఒకప్పుడు ఈ ప్రాంతంలో గొడవలు, హింస మాత్రమే ఉండేవని, కానీ నేడు శాంతి, అభివృద్ధి సంగీతం వినిపిస్తున్నదని మోడీ పేర్కొన్నారు.

కాంగ్రెస్ కేవలం ఓటు బ్యాంకు రాజకీయాల కోసం చొరబాటుదారులను ప్రోత్సహించిందని, అసలైన అసోం సంస్కృతిని, అస్తిత్వాన్ని విస్మరించిందని ప్రధాని మండిపడ్డారు. భుపేన్ హజారికా వంటి మహనీయులకు భారతరత్న ఇవ్వడానికి నిరాకరించిన కాంగ్రెస్, నేడు అసోం సంప్రదాయాలను తాను ధరించినప్పుడు వెక్కిరిస్తున్నదని ఆగ్రహం వ్యక్తం చేశారు. "కాంగ్రెస్‌కు కేవలం అధికారం ముఖ్యం, మాకు అసోం ఆత్మగౌరవం ముఖ్యం. దశాబ్దాలుగా మీరు సృష్టించిన అడ్డంకులను అధిగమిస్తూ, నేడు అసోం దేశంలోనే అత్యంత వేగంగా అభివృద్ధి చెందుతున్న రాష్ట్రాలలో ఒకటిగా నిలిచింది" అని ఆయన స్పష్టం చేశారు.

బోడో శాంతి ఒప్పందం ద్వారా ఈ ప్రాంతంలో శాశ్వత శాంతిని నెలకొల్పామని, ఒకప్పుడు తుపాకీ మోతలతో దద్దరిల్లిన బోడోలాండ్ నేడు ప్రగతి పథంలో నడుస్తున్నదని ప్రధాని వివరించారు. ఈశాన్య భారత అభివృద్ధి కేవలం ఒక ప్రాంతానికే పరిమితం కాదని, ఇది మొత్తం దేశాభివృద్ధిలో కీలక భాగమని ఆయన అన్నారు. తన హయాంలో జరిగిన అభివృద్ధి పనులు, మౌలిక సదుపాయాల కల్పనే వచ్చే ఎన్నికల్లో కాంగ్రెస్‌కు గట్టి సమాధానం చెబుతాయని మోడీ ధీమా వ్యక్తం చేశారు. ఈ కార్యక్రమంలో అసోం ముఖ్యమంత్రి హిమంత బిశ్వ శర్మ , ఇతర కీలక నేతలు పాల్గొన్నారు.