ఇరాన్‌లో ఆందోళనకారులపై ప్రభుత్వ్ం ఉక్కుపాదం

•  5,000 మందికి పైగా మృతి!

ఇరాన్‌లో నిరంకుశ పాలనకు వ్యతిరేకంగా సాగుతున్న దేశవ్యాప్త నిరసనలపై అక్కడి ప్రభుత్వం అత్యంత పాశవికంగా విరుచుకుపడుతున్నది. ఆర్థిక సంక్షోభం, పెరిగిన ధరలు, కఠినమైన ఆంక్షలకు వ్యతిరేకంగా వీధుల్లోకి వచ్చిన సామాన్య ప్రజలను అణచివేసేందుకు భద్రతా దళాలు జరిపిన కాల్పుల్లో ఇప్పటివరకు 5,000 మందికి పైగా ప్రాణాలు కోల్పోయినట్లు మానవ హక్కుల కార్యకర్తలు సంచలన గణాంకాలను వెల్లడించారు. మృతుల్లో వందలాదిమంది మహిళలు, చిన్నారులు కూడా ఉన్నట్లు నివేదికలు చెబుతున్నాయి. ఇరాన్ చరిత్రలోనే ఇది అత్యంత రక్తసిక్తమైన అణచివేతగా అభివర్ణించబడుతున్నది.

దేశవ్యాప్తంగా నిరసనలు ఉధృతం కావడంతో, బయటి ప్రపంచానికి సమాచారం అందకుండా ప్రభుత్వం ఇంటర్నెట్‌పై పూర్తిస్థాయిలో ఆంక్షలు విధించింది. సోషల్ మీడియా ప్లాట్‌ఫారమ్‌లను బ్లాక్ చేయడంతో పాటు, మొబైల్ నెట్‌వర్క్‌లను నిలిపివేసి ఇరాన్‌ను ఒక 'చీకటి ద్వీపం'గా మార్చేశారని అంతర్జాతీయసంస్థలు ఆరోపిస్తున్నాయి. ఈ ఇంటర్నెట్ బ్లాక్‌అవుట్‌ను ఆసరాగా చేసుకుని, ప్రభుత్వం మరింత హింసకు పాల్పడుతున్నదని, వేలాదిమందిని అక్రమంగా నిర్బంధించి జైళ్లలో చిత్రహింసలకు గురిచేస్తున్నారని కార్యకర్తలు ఆవేదన వ్యక్తం చేస్తున్నారు.

మరోవైపు ఇరాన్ ఆర్థిక పరిస్థితి పూర్తిగా దిగజారిపోయింది. ద్రవ్యోల్బణం ఆకాశాన్ని తాకడం, నిత్యావసర వస్తువుల కొరతతో ప్రజలు ఆకలితో అలమటిస్తున్నారు. తమ కనీస అవసరాలను తీర్చలేని ప్రభుత్వం, హక్కుల కోసం పోరాడుతున్న వారిని తుపాకులతో నోరు నొక్కేయడంపై ప్రపంచవ్యాప్తంగా నిరసనలు వ్యక్తమవుతున్నాయి. ఐక్యరాజ్యసమితి సహా అనేక దేశాలు ఇరాన్ ప్రభుత్వ చర్యలను తీవ్రంగా ఖండించాయి. అమెరికా అధ్యక్షుడు ట్రంప్ సైతం ఈ మారణకాండను ఆపకపోతే తీవ్ర పర్యవసానాలు ఉంటాయని హెచ్చరించిన నేపథ్యంలో, ఇరాన్ భవిష్యత్తు ఇప్పుడు ప్రశ్నార్థకంగా మారింది.