భారత్ - బ్రిటన్ మధ్య చరిత్రాత్మక ఒప్పందం

• డబుల్ సోషల్ సెక్యూరిటీ చెల్లింపులకు చెక్
• ఉద్యోగులకు భారీ ఊరట

భారతదేశం - యునైటెడ్ కింగ్‌డమ్ (UK) మధ్య సామాజిక భద్రత ఒప్పందంపై న్యూఢిల్లీలో జరిగిన చర్చలు విజయవంతంగా ముగిశాయి. రెండు దేశాల మధ్య పని చేసే ఉద్యోగులు, యజమానులు ఎదుర్కొంటున్న 'రెట్టింపు సామాజిక భద్రత చెల్లింపుల' సమస్యను పరిష్కరిస్తూ పరస్పర ప్రయోజనకరమైన ఒప్పందాన్ని ఇరుపక్షాలు ఖరారు చేశాయి. ఈ నెల 21, 22 తేదీల్లో జరిగిన ఈ కీలక సమావేశంలో భారత విదేశీ వ్యవహారాల శాఖ జాయింట్ సెక్రటరీ పి.ఎస్. గంగాధర్, యూకే నేషనల్ ఇన్సూరెన్స్ పాలసీ డిప్యూటీ డైరెక్టర్ ఎడ్మండ్ హెయిర్ పాల్గొన్నారు. ఈ ఒప్పందం వల్ల విదేశాల్లో పనిచేసే నిపుణులు, ఆయా కంపెనీలపై పడుతున్న అదనపు ఆర్థిక భారం గణనీయంగా తగ్గనుంది.

సాధారణంగా ఒక దేశం నుంచి మరో దేశానికి వెళ్లి పని చేసే నిపుణులు రెండు దేశాల్లోనూ సామాజిక భద్రత లేదా ఇన్సూరెన్స్ ప్రీమియంలు చెల్లించాల్సి వచ్చేది. ఈ కొత్త ఒప్పందం అమలులోకి రావడం వల్ల అటు భారత్, ఇటు బ్రిటన్ మధ్య రాకపోకలు సాగించే ప్రతిభావంతులకు మరియు అంతర్జాతీయ వ్యాపార సంస్థలకు ద్వంద్వ చెల్లింపుల నుంచి విముక్తి లభిస్తుంది. ఇది రెండు దేశాల మధ్య ఆర్థిక బంధాన్ని బలోపేతం చేయడమే కాకుండా, నిపుణుల వలసలను మరింత సులభతరం చేస్తుంది. భారత్ - యూకే స్వేచ్ఛా వాణిజ్య ఒప్పందం (FTA) దిశగా ఇది ఒక కీలకమైన ముందడుగు అని విదేశీ వ్యవహారాల శాఖ వెల్లడించింది.