గాజా 'శాంతి బోర్డు'లోకి భారత్

• ప్రధాని మోడీకి అమెరికా అధ్యక్షుడు ట్రంప్ ఆహ్వానం
• మధ్యప్రాచ్యంలో శాశ్వత శాంతి స్థాపన కోసం అగ్రరాజ్యం మాస్టర్ ప్లాన్

వాషింగ్టన్/న్యూఢిల్లీ: గాజాలో నెలకొన్న ఉద్రిక్తతలను అంతం చేసి, అక్కడ శాశ్వత శాంతిని నెలకొల్పేందుకు అమెరికా అధ్యక్షుడు డొనాల్డ్ ట్రంప్ చరిత్రాత్మక అడుగు వేశారు. అంతర్జాతీయస్థాయిలో ప్రతిష్టాత్మకంగా ఏర్పాటు చేయబోతున్న 'బోర్డ్ ఆఫ్ పీస్' (శాంతి బోర్డు)లో సభ్యునిగా చేరాలని భారత ప్రధాని నరేంద్ర మోడీని ఆయన ఆహ్వానించారు. ఈ మేరకు ట్రంప్ స్వయంగా ప్రధానికి లేఖ రాశారు. భారత్‌లో అమెరికా రాయబారి సెర్గియో గోర్ ఈ లేఖను సోషల్ మీడియా వేదికగా పంచుకోవడంతో ఈ విషయం వెలుగులోకి వచ్చింది. మధ్యప్రాచ్యంలో శాంతిని సుస్థిరం చేయడంతో పాటు, ప్రపంచవ్యాప్త సంఘర్షణల పరిష్కారానికి సరికొత్త అంతర్జాతీయ వేదికను రూపొందించడంలో భారత్ భాగస్వామ్యం కావాలని ట్రంప్ ఆ లేఖలో కోరారు.

ఇజ్రాయెల్ - హమాస్ మధ్య కుదిరిన రెండవ దశ కాల్పుల విరమణ ఒప్పందంలో భాగంగా ఈ శాంతి బోర్డును ట్రంప్ ప్రతిపాదించారు. గతేడాది అక్టోబర్‌లోనే ఇరు పక్షాలు ట్రంప్ శాంతి ప్రణాళికకు అంగీకరించాయి. ఈ క్రమంలోనే గాజా పునర్నిర్మాణం , అక్కడ స్థిరత్వాన్ని తీసుకురావడానికి ఈ బోర్డు ఒక అంతర్జాతీయసంస్థగా పనిచేయనుంది. గాజాను ఉగ్రవాద రహిత ప్రాంతంగా మార్చడం, పొరుగు దేశాలకు ఎటువంటి ముప్పు లేకుండా చేయడం వంటి 20 అంశాలతో కూడిన రోడ్‌మ్యాప్‌ను ట్రంప్ ఇప్పటికే ప్రకటించారు. ప్రధాని మోడీకి ఉన్న అంతర్జాతీయ పలుకుబడి, ఇతర దేశాలతో ఉన్న సత్సంబంధాలు ఈ శాంతి ప్రక్రియలో కీలకమవుతాయని అమెరికా భావిస్తున్నది. గాజా సంక్షోభాన్ని ముగించే ఈ భారీ ప్రణాళికలో భారత్ చేరడం ద్వారా ప్రపంచశాంతి స్థాపనలో మన దేశం మరో మైలురాయిని అధిగమించే అవకాశం ఉంది.