ప్రయాగ్‌రాజ్ సంగమంలో భక్తి పారవశ్యం

• మౌని అమావాస్య వేళ పోటెత్తిన జనసందోహం
• త్రివేణి సంగమంలో కోట్లాది మంది పుణ్యస్నానాలు

ప్రయాగ్‌రాజ్ (ఉత్తరప్రదేశ్): పవిత్ర మాఘ మాసం సందర్భంగా ప్రయాగ్‌రాజ్‌లోని త్రివేణి సంగమం వద్ద ఆధ్యాత్మిక శోభ సంతరించుకుంది. మౌని అమావాస్యను పురస్కరించుకుని గంగా, యమునా, అంతర్వాహిని సరస్వతీ నదుల కలయిక అయిన సంగమం వద్ద లక్షలాదిమంది భక్తులు పుణ్యస్నానాలు ఆచరిస్తున్నారు. వార్షిక మాఘ మేళాలో భాగంగా అత్యంత విశిష్టమైన మూడవ స్నాన ఘట్టం కావడంతో తెల్లవారుజాము నుండే భక్తులు భారీగా తరలివచ్చారు. వివిధ అఖడాలకు చెందిన సాధువులు, మునులు, కిన్నర్ అఖడా ప్రతినిధులు సైతం మేళతాళాల మధ్య సంగమ తీరానికి చేరుకుని పవిత్ర స్నానాలు ఆచరించారు. కేవలం నిన్న ఒక్కరోజే కోటి 50 లక్షల మంది స్నానాలు చేయగా, ఆదివారం ఆ సంఖ్య సుమారు 3 కోట్లకు చేరుకోవచ్చని అధికార యంత్రాంగం అంచనా వేస్తున్నది.

డ్రోన్ల ద్వారా నిరంతర నిఘా 

భక్తుల రద్దీని దృష్టిలో ఉంచుకుని ఉత్తరప్రదేశ్ ప్రభుత్వం, ప్రయాగ్‌రాజ్ జిల్లా యంత్రాంగం పటిష్టమైన ఏర్పాట్లు చేసింది. భక్తుల సౌకర్యార్థం సుమారు 3 కిలోమీటర్ల పొడవైన ఘాట్లను సిద్ధం చేయడంతో పాటు తాత్కాలిక వంతెనలు (పాంటూన్ బ్రిడ్జిలు), వేలాది టెంట్లు, వైద్య శిబిరాలను ఏర్పాటు చేశారు. భద్రత కోసం భారీగా పోలీసు బలగాలను మోహరించడమే కాకుండా, సీసీటీవీ కెమెరాలు, డ్రోన్ల ద్వారా నిరంతరం నిఘా ఉంచారు. జిల్లా కలెక్టర్ స్వయంగా ఏర్పాట్లను పర్యవేక్షిస్తూ భక్తులకు ఎలాంటి ఇబ్బందులు కలగకుండా చర్యలు తీసుకుంటున్నారు. ప్రయాగ్‌రాజ్ తో పాటు వారణాసి, అయోధ్య, కాన్పూర్, మీర్జాపూర్ వంటి ఇతర ఆధ్యాత్మిక నగరాల్లోని ఘాట్లు కూడా భక్తులతో కిక్కిరిసిపోయాయి.

మౌని అమావాస్యకు విశిష్ట స్థానం

హిందూ ధర్మంలో మౌని అమావాస్యకు విశిష్ట స్థానం ఉంది. ఈ రోజున మౌనంగా ఉండి పవిత్ర నదులలో స్నానం చేయడం వల్ల పాపాలు తొలగిపోయి మోక్షం లభిస్తుందని భక్తుల నమ్మకం. ఈ పవిత్ర పర్వదినం సందర్భంగా నదీ తీరాలన్నీ 'హర హర గంగే' నామస్మరణతో మారుమోగుతున్నాయి. భక్తులు స్నానాల అనంతరం నదీ మాతకు హారతులు ఇచ్చి, పేదలకు దానధర్మాలు చేస్తూ భక్తి శ్రద్ధలతో పూజలు నిర్వహిస్తున్నారు. గడ్డకట్టే చలిని కూడా లెక్కచేయకుండా దేశం నలుమూలల నుంచి వచ్చిన భక్తులతో అస్తిత్వ భారతం ఇక్కడ సాక్షాత్కరిస్తున్నది.