కాంగ్రెస్‌లో ముదురుతున్న విభేదాలు

• రాహుల్ గాంధీ తీరుపై శశి థరూర్ అసంతృప్తి
• కీలక భేటీకి దూరం!

కాంగ్రెస్ పార్టీలో అంతర్గత కలహాలు మరోసారి బహిర్గతమయ్యాయి. పార్టీ సీనియర్ నేత, తిరువనంతపురం ఎంపీ శశి థరూర్.. రాహుల్ గాంధీ వైఖరిపై తీవ్ర అసంతృప్తితో ఉన్నట్లు సమాచారం. ఈ నేపథ్యంలోనే పార్టీ అత్యంత ప్రతిష్టాత్మకంగా నిర్వహించనున్న ఒక కీలక సమావేశానికి ఆయన హాజరుకావడం లేదని విశ్వసనీయవర్గాలు వెల్లడించాయి. కేరళ రాజకీయాల్లో తన ప్రాధాన్యాన్ని తగ్గించేలా అధిష్టానం తీసుకుంటున్న కొన్ని నిర్ణయాల పట్ల థరూర్ గత కొంతకాలంగా గుర్రుగా ఉన్నట్లు తెలుస్తున్నది.

ముఖ్యంగా రాష్ట్రంలో పార్టీ వ్యవహారాలు, వ్యూహరచనలో తనను సంప్రదించకుండానే కీలక నిర్ణయాలు తీసుకుంటున్నారని, దీని వెనుక రాహుల్ గాంధీ ఆమోదం ఉందనేది థరూర్ ప్రధాన ఆరోపణగా కనిపిస్తున్నది. పార్టీలో సంస్కరణలు కోరుకునే 'జి-23' నేతల్లో ఒకరైన థరూర్, గతంలో అధ్యక్ష ఎన్నికల్లో పోటీ చేసినప్పటి నుంచి అధిష్టానానికి, ఆయనకు మధ్య గ్యాప్ పెరుగుతూ వస్తున్నది. తాజా పరిణామాలు కేరళ కాంగ్రెస్‌లో పెను మార్పులకు సంకేతంగా మారుతాయా అనే చర్చ రాజకీయవర్గాల్లో మొదలైంది.

మరోవైపు, బడ్జెట్ సమావేశాల కంటే ముందే పార్టీని ఏకతాటిపైకి తీసుకురావాలని చూస్తున్న మల్లికార్జున ఖర్గేకు థరూర్ నిర్ణయం పెద్ద తలనొప్పిగా మారింది. పార్టీలో చర్చల ద్వారా సమస్యలను పరిష్కరించుకోవాలని హైకమాండ్ సూచిస్తున్నప్పటికీ, థరూర్ మాత్రం తన నిరసనను వ్యక్తం చేసేందుకే సమావేశానికి గైర్హాజరు కావాలని నిర్ణయించుకున్నట్లు సమాచారం. ఈ పరిణామంపై అటు రాహుల్ గాంధీ కార్యాలయం గానీ, ఇటు థరూర్ గానీ ఇప్పటివరకు అధికారికంగా స్పందించలేదు.