సంగీత ప్రపంచంలో కొత్త విప్లవం

'గుంగుణాలు' యాప్‌ను ప్రారంభించిన జావేద్ అక్తర్, శంకర్ మహదేవన్

సృజనాకర్తలకు అండగా నిలిచే సరికొత్త వేదిక

ముంబై: భారతీయ సంగీత రంగంలో కళాకారులకు, సృజనాకర్తలకు మరింత సాధికారత కల్పించే లక్ష్యంతో ‘గుంగుణాలు’ (GoonGoonalo) అనే సరికొత్త మ్యూజిక్ యాప్ ఘనంగా ప్రారంభమైంది. ముంబైలో జరిగిన ఈ లాంచ్ ఈవెంట్‌లో ప్రముఖ గీత రచయిత జావేద్ అక్తర్, గాయకులు షాన్ , శంకర్ మహదేవన్‌లతో పాటు పలువురు దిగ్గజ కళాకారులు పాల్గొన్నారు. ఈ యాప్ కేవలం పాటలు వినడానికి మాత్రమే కాకుండా, స్వతంత్ర సంగీత విద్వాంసులు తమ ప్రతిభను ప్రపంచానికి చాటిచెప్పడానికి , వారి సృజనాత్మకతకు తగిన గుర్తింపు, ఆదాయం పొందేలా రూపొందించబడింది. ఇది సంగీత పరిశ్రమలో ఒక గేమ్-ఛేంజర్‌గా నిలుస్తుందని అతిథులు ధీమా వ్యక్తం చేశారు.

ఈ సందర్భంగా జావేద్ అక్తర్ మాట్లాడుతూ, నేటి డిజిటల్ యుగంలో ప్రతిభ ఉన్నప్పటికీ సరైన వేదిక దొరకక ఎంతోమంది కళాకారులు మరుగున పడిపోతున్నారని, 'గుంగుణాలు' అటువంటి వారికి ఒక గొప్ప వరమని పేర్కొన్నారు. సంగీత సృష్టికర్తలకు హక్కులు, రాయల్టీల విషయంలో ఈ యాప్ పారదర్శకతను అందిస్తుందని శంకర్ మహదేవన్ కొనియాడారు. కేవలం పెద్ద కంపెనీలకే పరిమితం కాకుండా, ప్రతి గొంతు ప్రపంచానికి వినిపించేలా ఈ యాప్ ప్రోత్సహిస్తుందని గాయకుడు షాన్ ఆశాభావం వ్యక్తం చేశారు. అత్యాధునిక ఫీచర్లతో రూపొందిన ఈ యాప్, సంగీత ప్రియులకు, కళాకారులకు మధ్య ఉన్న దూరాన్ని తగ్గిస్తూ భారతీయ సంగీత వైవిధ్యాన్ని చాటిచెప్పనుంది.

ప్రస్తుతం మార్కెట్‌లో ఉన్న ఇతర మ్యూజిక్ స్ట్రీమింగ్ యాప్‌లతో పోలిస్తే, ఇది కళాకారుల ప్రయోజనాలకు అత్యధిక ప్రాధాన్యం ఇస్తుందని నిర్వాహకులు వెల్లడించారు. ఈ కార్యక్రమంలో సినీ పరిశ్రమకు చెందిన పలువురు ప్రముఖ సంగీత దర్శకులు , నిర్మాతలు పాల్గొని యాప్ వ్యవస్థాపకులకు అభినందనలు తెలిపారు. త్వరలోనే ఈ యాప్ ద్వారా కొత్త ప్రతిభను వెలికితీసేందుకు మరిన్ని కార్యక్రమాలు చేపడతామని వారు ప్రకటించారు.