కాంగ్రెస్ తీరుపై ప్రకాష్ జవదేకర్ ఫైర్‌

•  ఒకే కుటుంబం చుట్టూ రాజకీయాలా అంటూ విమర్శలు

కేరళ రాజకీయాల్లో వారసత్వ రాజకీయం అంశం మరోసారి చర్చనీయాంశమైంది. కాంగ్రెస్ పార్టీ తీరును తప్పుబడుతూ బీజేపీ కేరళ రాష్ట్ర ఇన్ ఛార్జ్ ప్రకాష్ జవదేకర్ తీవ్ర విమర్శలు గుప్పించారు. కాంగ్రెస్ పార్టీ నాయకత్వం ఎప్పుడూ ఒకే కుటుంబం పరిధిలోనే వ్యక్తులను వెతుకుతుందని, సామాన్య కార్యకర్తలకు అక్కడ గుర్తింపు ఉండదని ఆయన ఆరోపించారు. పార్టీలో సమర్థులైన నాయకులు ఉన్నప్పటికీ, కీలక పదవులు, అవకాశాలు మాత్రం కేవలం ఒకే కుటుంబానికి చెందిన వారికే దక్కుతున్నాయని ఆయన మండిపడ్డారు. దేశంలో ప్రజాస్వామ్య విలువలను కాపాడటంలో కాంగ్రెస్ విఫలమైందని, కేవలం కుటుంబ ప్రయోజనాలకే ఆ పార్టీ ప్రాధాన్యం ఇస్తుందని జవదేకర్ విమర్శించారు. కేరళలో రాబోయే ఎన్నికల నేపథ్యంలో బీజేపీ తన ప్రచారాన్ని వేగవంతం చేస్తూ, కాంగ్రెస్ బలహీనతలను ఎత్తిచూపే ప్రయత్నం చేస్తున్నది. వారసత్వ రాజకీయాలకు స్వస్తి పలికి, ప్రజల కోసం పనిచేసే నాయకత్వాన్ని ఎన్నుకోవాలని ఆయన ఈ సందర్భంగా పిలుపునిచ్చారు.