ప్రజాస్వామ్యానికి స్వచ్ఛమైన ఓటర్ల జాబితాయే పునాది

• ప్రధాన ఎన్నికల కమిషనర్ జ్ఞానేష్ కుమార్ పిలుపు

జాతీయ ఓటర్ల దినోత్సవం సందర్భంగా భారత ప్రధాన ఎన్నికల కమిషనర్ (సీఈసీ) జ్ఞానేష్ కుమార్ దేశ ప్రజలకు కీలక సందేశం ఇచ్చారు. ప్రజాస్వామ్య వ్యవస్థ పటిష్టంగా ఉండాలంటే స్వచ్ఛమైన, పారదర్శకమైన ఓటర్ల జాబితా అత్యంత ఆవశ్యకమని ఆయన పేర్కొన్నారు. అర్హులైన ప్రతి ఒక్కరి పేరు ఓటర్ల జాబితాలో ఉండేలా, అనర్హుల పేర్లు తొలగించేలా కేంద్ర ఎన్నికల సంఘం చేపట్టిన 'ప్రత్యేక సమగ్ర సవరణ' (సర్‌) కార్యక్రమం అద్భుత ఫలితాలను ఇస్తున్నదని ఆయన వెల్లడించారు. ఇప్పటికే బిహార్‌లో ఈ ప్రక్రియ విజయవంతంగా ముగిసిందని, ప్రస్తుతం మరో 12 రాష్ట్రాలు, కేంద్రపాలిత ప్రాంతాల్లో ఇది సాఫీగా జరుగుతున్నదని, త్వరలోనే దేశవ్యాప్తంగా అన్ని రాష్ట్రాల్లో దీనిని అమలుచేస్తామని ఆయన ప్రకటించారు.

డిజిటల్ యుగంలో ఓటర్లకు సేవలను మరింత చేరువ చేస్తూ 'ECINet' అనే సరికొత్త యాప్‌ను ఎన్నికల సంఘం అందుబాటులోకి తీసుకువచ్చిందని జ్ఞానేష్ కుమార్ తెలిపారు. ఓటర్ల నమోదు నుంచి జాబితాలో మార్పుల వరకు అన్ని సేవలు ఇప్పుడు ఒకే వేదికపై లభిస్తాయని, ఇది కమిషన్ సాంకేతిక సామర్థ్యానికి నిదర్శనమని ఆయన కొనియాడారు. ఇటీవలే 70కి పైగా దేశాల ప్రతినిధులతో నిర్వహించిన అంతర్జాతీయ ఎన్నికల నిర్వహణ సదస్సు (IICDEM), ప్రపంచ స్థాయిలో భారత ఎన్నికల వ్యవస్థపై ఉన్న నమ్మకాన్ని, నాయకత్వాన్ని చాటిచెప్పిందని ఆయన గుర్తు చేశారు.

ముఖ్యంగా యువ ఓటర్లను ఉద్దేశించి ప్రసంగిస్తూ.. ప్రతి ఒక్కరూ తప్పనిసరిగా ఓటు హక్కును వినియోగించుకోవాలని ఆయన కోరారు. యువత కేవలం ఓటర్లుగానే కాకుండా 'ప్రజాస్వామ్య రాయబారులు'గా మారి ఇతరులను కూడా ప్రోత్సహించాలని పిలుపునిచ్చారు. సామాజిక మాధ్యమాల్లో వ్యాపించే తప్పుడు సమాచారం (Misinformation), అవాస్తవ ప్రచారాలకు వ్యతిరేకంగా పోరాడటంలో యువత ముందుండాలని ఆయన ఆకాంక్షించారు. 1950 జనవరి 25న ఎన్నికల సంఘం ఏర్పడిన జ్ఞాపకార్థం  ఏటా జాతీయ ఓటర్ల దినోత్సవాన్ని జరుపుకుంటున్నామని, దీని ముఖ్య ఉద్దేశ్యం ఓటర్ల భాగస్వామ్యాన్ని పెంచడమేనని ఆయన స్పష్టం చేశారు.