నితిన్ నబిన్ సారథ్యంలో బీజేపీ సరికొత్త శిఖరాలకు

• యువ నాయకత్వానికి పగ్గాలు అప్పగించిన జేపీ నడ్డా
• పార్టీని మరింత ముందుకు తీసుకెళ్తారని ఆకాంక్ష

న్యూఢిల్లీ: భారతీయ జనతా పార్టీ నూతన జాతీయ అధ్యక్షుడిగా బాధ్యతలు చేపట్టిన నితిన్ నబిన్‌పై దిగిపోయిన అధ్యక్షుడు జేపీ నడ్డా ప్రశంసల జల్లు కురిపించారు. మంగళవారం ఢిల్లీలోని పార్టీ ప్రధాన కార్యాలయంలో జరిగిన అధికారిక కార్యక్రమంలో నడ్డా తన వారసుడికి పార్టీ పగ్గాలను అప్పగించారు. ఈ సందర్భంగా ఆయన మాట్లాడుతూ.. నితిన్ నబిన్ అత్యంత కష్టపడి పనిచేసే నాయకుడని, పార్టీని అట్టడుగుస్థాయి నుంచి బలోపేతం చేయడంలో ఆయన నిరంతరం శ్రమిస్తారని కొనియాడారు. పార్టీని మరింత ముందుకు తీసుకెళ్లడంలో ఆయన ఎటువంటి అవకాశాన్ని వదిలిపెట్టరని, ఆయన నాయకత్వంలో బీజేపీ సరికొత్త విజయాలను అందుకుంటుందని ధీమా వ్యక్తం చేశారు. ఒక సామాన్య కార్యకర్తగా ప్రస్థానాన్ని ప్రారంభించి నేడు జాతీయ అధ్యక్షుడిగా ఎదగడం నబిన్ పట్టుదలకు నిదర్శనమని నడ్డా పేర్కొన్నారు.

అనంతరం నితిన్ నబిన్ మాట్లాడుతూ, ప్రధాని నరేంద్ర మోడీ మార్గదర్శకత్వంలో పార్టీని దేశవ్యాప్తంగా మరింత విస్తరించడమే తన లక్ష్యమని స్పష్టం చేశారు. జేపీ నడ్డా హయాంలో పార్టీ సాధించిన అద్భుతమైన విజయాలను స్ఫూర్తిగా తీసుకుని, కార్యకర్తలందరినీ సమన్వయం చేసుకుంటూ ముందుకు సాగుతానని హామీ ఇచ్చారు. ముఖ్యంగా రాబోయే రాష్ట్రాల అసెంబ్లీ ఎన్నికల్లో బీజేపీ జెండాను రెపరెపలాడించడమే తన ముందున్న ప్రధాన సవాల్ అని ఆయన పేర్కొన్నారు. ఈ కార్యక్రమంలో కేంద్ర మంత్రులు, పార్టీ సీనియర్ నేతలు భారీ సంఖ్యలో పాల్గొని నూతన అధ్యక్షుడికి శుభాకాంక్షలు తెలిపారు. యువ నాయకత్వానికి పగ్గాలు దక్కడంతో దేశవ్యాప్తంగా ఉన్న బీజేపీ శ్రేణుల్లో కొత్త ఉత్సాహం ఉరకలేస్తోంది.