స్టార్టప్ ఇండియా దశాబ్ది ఉత్సవం: పదేళ్లలో సరికొత్త విప్లవం

 

• ఉద్యోగాల వేటగాళ్లు కాదు, సృష్టికర్తలుగా మారిన భారత యువత!

న్యూఢిల్లీ: గత పదేళ్లలో 'స్టార్టప్ ఇండియా' మిషన్ దేశంలో ఒక గొప్ప విప్లవాన్ని తీసుకువచ్చిందని, 'ఆత్మనిర్భర భారత్' నిర్మాణంలో మన స్టార్టప్‌లు కీలకపాత్ర పోషిస్తున్నాయని ప్రధాని నరేంద్ర మోడీ ప్రశంసించారు. 'నేషనల్ స్టార్టప్ డే' (జనవరి 16, 2026) సందర్భంగా న్యూఢిల్లీలోని భారత్ మండపంలో జరిగిన 'స్టార్టప్ ఇండియా దశాబ్ది ఉత్సవాల'లో ఆయన పాల్గొన్నారు. ఈ సందర్భంగా ప్రధాని మాట్లాడుతూ.. నేడు భారతదేశం ప్రపంచంలోనే మూడవ అతిపెద్ద స్టార్టప్ ఎకోసిస్టమ్‌గా ఎదిగిందని గర్వంగా ప్రకటించారు. కేవలం అంకెలే కాకుండా, దేశ యువతలో వచ్చిన ఆత్మవిశ్వాసం, రిస్క్ తీసుకునే తత్వం, కొత్త కలలను నిజం చేసుకునే ధైర్యం తనకు ఎంతో సంతోషాన్ని ఇస్తున్నాయని ఆయన పేర్కొన్నారు. ఈ వేడుకల్లో భాగంగా ఏర్పాటు చేసిన ప్రదర్శనను ప్రధాని సందర్శించి, యువ ఆవిష్కర్తలతో ముఖాముఖి మాట్లాడారు.

కేంద్ర వాణిజ్య, పరిశ్రమల శాఖ మంత్రి పీయూష్ గోయల్ ఈ సందర్భంగా మాట్లాడుతూ.. 2016లో కేవలం 400 స్టార్టప్‌లతో ప్రారంభమైన ఈ ప్రయాణం, ప్రధాని నాయకత్వంలో నేడు 2 లక్షల మార్కును దాటిందని వెల్లడించారు. భారతదేశాన్ని 'ఉద్యోగాలు వెతికే వారి దేశం' నుంచి 'ఉద్యోగాలను సృష్టించే వారి దేశం'గా మార్చడమే లక్ష్యంగా 2016 జనవరి 16న ప్రారంభమైన ఈ మిషన్, నేడు దేశ ఆర్థికవ్యవస్థకు వెన్నెముకగా మారిందని ఆయన చెప్పారు. గత దశాబ్ద కాలంలో ఈ పథకం ద్వారా సంస్థాగత యంత్రాంగం బలోపేతం కావడమే కాకుండా, పెట్టుబడులు, మార్గదర్శకత్వం  సులభంగా అందుబాటులోకి వచ్చాయని, ఇది అన్నిరంగాల్లో స్టార్టప్‌ల వృద్ధికి తోడ్పడిందని ఆయన వివరించారు.


భారతదేశం తన రెండో దశాబ్దపు స్టార్టప్ ప్రయాణంలోకి అడుగుపెడుతున్న తరుణంలో.. ఈ వేడుకలు కేవలం గతాన్ని స్మరించుకోవడమే కాకుండా, భవిష్యత్ భారత్ (వికసిత్ భారత్ @2047) వైపు వేయాల్సిన అడుగులను నిర్దేశించాయి. కేవలం మెట్రో నగరాలకే పరిమితం కాకుండా ద్వితీయ, తృతీయ శ్రేణి పట్టణాలకు కూడా స్టార్టప్ సంస్కృతి విస్తరించడం, మహిళా పారిశ్రామికవేత్తల సంఖ్య పెరగడం వంటి అంశాలను ప్రధాని ప్రత్యేకంగా అభినందించారు. దేశాభివృద్ధిలో స్టార్టప్‌లు కేవలం వ్యాపారాలు మాత్రమే కాదని, అవి దేశ భవిష్యత్తును మార్చే శక్తివంతమైన సాధనాలని ప్రధాని మోడీ ఉద్ఘాటించారు.