భూమికి దూసుకొస్తున్న నాసా స్విఫ్ట్ టెలిస్కోప్.. రక్షణ యత్నం విఫలం

22 ఏళ్లుగా అంతరిక్షంలో సేవలందించిన నాసాకు చెందిన స్విఫ్ట్ అబ్జర్వేటరీ భూమి వాతావరణంలోకి తిరిగి ప్రవేశించే దశకు చేరుకుంది. దాన్ని రక్షించేందుకు చేపట్టిన ప్రయత్నం విఫలమవడంతో నవంబర్ 6 ప్రాంతంలో భూమిపై పడే అవకాశం ఉందని అమెరికా స్పేస్ ఫోర్స్ అంచనా వేసింది. సుమారు 1.5 టన్నుల బరువున్న టెలిస్కోప్‌లో ఎక్కువ భాగం వాతావరణంలోనే కాలిపోనుంది. అయితే టంగ్‌స్టన్‌తో తయారైన కొన్ని భాగాలు, అద్దాల ముక్కలు భూమిని చేరే అవకాశం ఉందని నాసా శాస్త్రవేత్తలు తెలిపారు. 2004 నవంబర్‌లో ప్రయోగించిన ఈ టెలిస్కోప్ 2,000కు పైగా గామా కిరణ విస్ఫోటనాలు, 1,400 నక్షత్ర విస్ఫోటనాలను గుర్తించింది.

ఇరాన్ యుద్ధం ముగించేందుకు తొందరలేదు

• సమయం ఉందన్న అమెరికా అధ్యక్షుడు ట్రంప్

ఇరాన్‌తో కొనసాగుతున్న యుద్ధాన్ని ముగించేందుకు అమెరికాకు తొందరేమీ లేదని అధ్యక్షుడు డొనాల్డ్ ట్రంప్ అన్నారు. ఇది సాధారణ యుద్ధం కాదని, తమకు సమయం ఉందని వ్యాఖ్యానించారు. ఇరాన్ చర్చలు జరపాలని కోరుకుంటోందని చెబుతూనే, ఆ దేశం సైనికులకు, పోలీసులకు జీతాలు చెల్లించలేని ఆర్థిక ఇబ్బందుల్లో ఉందని పేర్కొన్నారు. యుద్ధానికి అమెరికా పెద్దగా ఖర్చు చేయడం లేదని, వెనిజులా ద్వారా పెట్టిన ఖర్చుకు మించి ఆదాయం పొందినట్లు కూడా ట్రంప్ వ్యాఖ్యానించారు. అయితే ఇందుకు సంబంధించిన గణాంకాలను వెల్లడించలేదు. మరోవైపు, ఇరాన్‌తో అణు ఒప్పందం సాధ్యాసాధ్యాలపై అమెరికా ఉన్నతాధికారుల్లో భిన్నాభిప్రాయాలు కొనసాగుతున్నాయి. కొందరు మరిన్ని సైనిక చర్యలకు మద్దతు ఇస్తుండగా, ఉపాధ్యక్షుడు జేడీ వాన్స్ సహా మరికొందరు చర్చలను పునఃప్రారంభించాలని కోరుతున్నారు. టర్కీ విదేశాంగ మంత్రి హకాన్ ఫిదాన్, అమెరికా విదేశాంగ మంత్రి మార్కో రూబియోతో కూడా చర్చలు జరిపారు. ఫిబ్రవరి 28న అమెరికా, ఇజ్రాయెల్ సంయుక్త దాడులతో ప్రారంభమైన ఘర్షణల అనంతరం ఇరాన్ హార్ముజ్ జలసంధిలో నౌకాయానంపై ఆంక్షలు విధించడంతో ప్రపంచ ఇంధన సరఫరాపై ఆందోళనలు పెరిగాయి. మరోసారి సైనిక ఘర్షణలు చెలరేగితే గల్ఫ్ ప్రాంతంలోని చమురు, గ్యాస్ కేంద్రాలపై దాడులు జరిగే ప్రమాదం ఉందని ఆందోళనలు వ్యక్తమవుతున్నాయి. దీంతో దౌత్య ప్రయత్నాలు కొనసాగుతున్నప్పటికీ, పశ్చిమాసియాలో ఉద్రిక్తతలు తగ్గడంపై అనిశ్చితి నెలకొంది.

సీఈసీ జ్ఞానేశ్ కుమార్‌పై నేహా బోరా తీవ్ర ఆరోపణలు

• 13.3 కోట్ల ఓటర్ల పేర్ల తొలగింపునకు కుట్ర జరిగిందని విమర్శ

ఇండియా కూటమి నిర్వహించిన ప్రతీకాత్మక అభిశంసన కార్యక్రమంలో ఏఐఎస్ఏ అధ్యక్షురాలు నేహా బోరా ప్రధాన ఎన్నికల కమిషనర్ (సీఈసీ) జ్ఞానేశ్ కుమార్‌పై తీవ్ర విమర్శలు చేశారు. ఆయన నియామకం సుప్రీంకోర్టు మార్గదర్శకాలకు విరుద్ధంగా జరిగిందని ఆరోపించారు. ఫారం-6లో అక్రమ మార్పులు, సాఫ్ట్‌వేర్‌లో తారుమారుల ద్వారా ఎన్నికల సంఘం (ఈసీఐ) వ్యవస్థీకృతంగా 13.3 కోట్ల మంది ఓటర్ల పేర్లను ఓటరు జాబితాల నుంచి తొలగించిందని ఆమె ఆరోపించారు.

ఢిల్లీ రామ్‌లీలా మైదానంలో 'ఇండియా' కూటమి భారీ ర్యాలీ

• పోలీసుల అనుమతి, కట్టుదిట్టమైన భద్రతా ఏర్పాట్లు

న్యూఢిల్లీ: ప్రధాన ఎన్నికల కమిషనర్ (CEC) జ్ఞానేశ్ కుమార్ రాజీనామా డిమాండ్ చేస్తూ 'ఇండియా' కూటమి నవంబర్ 1న దిల్లీలోని ప్రసిద్ధ రామ్‌లీలా మైదానంలో తలపెట్టిన భారీ బహిరంగ ర్యాలీకి దిల్లీ పోలీసులు అధికారికంగా అనుమతులు మంజూరు చేశారు. అయితే శాంతిభద్రతల దృష్ట్యా సభ నిర్వహణకు సంబంధించి నిర్దిష్టమైన నిబంధనలతో కూడిన ఆంక్షలను విధించారు. ఈ కార్యక్రమాన్ని ఉదయం 10 గంటల నుంచి సాయంత్రం 5 గంటలలోపు పూర్తి చేయాలని, ఎట్టి పరిస్థితుల్లోనూ రాత్రి సమయంలో రామ్‌లీలా మైదానంలో ఎవరూ ఉండకూడదని పోలీసులు స్పష్టం చేశారు. అలాగే సభ జరిగే ప్రాంగణంలో సీసీటీవీ కెమెరాల ఏర్పాటు, తాగునీరు, మరుగుదొడ్ల సౌకర్యాలను తప్పనిసరిగా కల్పించాలని నిర్వాహకులకు సూచించారు. ఈ నేపథ్యంలో దిల్లీ పోలీస్ కమిషనర్ అనురాగ్ కుమార్ శనివారం స్వయంగా రామ్‌లీలా మైదానాన్ని సందర్శించి, అక్కడ చేపట్టిన భద్రతా ఏర్పాట్లను క్షుణ్ణంగా పరిశీలించారు.

ఆదివారం నాడు రామ్‌లీలా మైదానం పరిసర ప్రాంతాల గుండా ప్రయాణించాలనుకునే ప్రయాణికులు ఎలాంటి ట్రాఫిక్ ఇబ్బందులు తలెత్తకుండా తగిన ప్రత్యామ్నాయ మార్గాలను ఎంచుకోవాలని అధికారులు విజ్ఞప్తి చేశారు. ర్యాలీ జరిగే ప్రాంతంలో ఎలాంటి అవాంఛనీయ ఘటనలు చోటుచేసుకోకుండా సుమారు 4,000 మందికి పైగా పోలీసు సిబ్బందితో పాటు అదనంగా పారామిలిటరీ కేంద్ర బలగాలను భారీగా మోహరించినట్లు వెల్లడించారు. మరోవైపు, ఈ మెగా ర్యాలీకి తెలంగాణ నుంచి తరలివచ్చే పార్టీ కార్యకర్తలు, నాయకుల రవాణా ఏర్పాట్లు, బస్సుల పార్కింగ్ మరియు ఇతర వసతి ఏర్పాట్లను పర్యవేక్షించేందుకు కాంగ్రెస్ ఎంపీలు మల్లు రవి, బలరాం నాయక్, వేం నరేందర్‌రెడ్డి, చామల కిరణ్‌కుమార్‌రెడ్డి తదితరులు ప్రత్యేకంగా ఏర్పాట్లను సమీక్షించారు.

ఎమ్మెల్సీ ఎన్నికల్లో బీజేపీకి మిశ్రమ ఫలితాలు.. కర్ణాటకలో క్లీన్‌స్వీప్‌.. నాగ్‌పూర్‌లో కాంగ్రెస్‌ సంచలన విజయం!

 

• 28 స్థానాలకు జరిగిన ఎన్నికల్లో ఎన్డీఏకు 16 సీట్లు.. బీజేపీకి 13, మిత్రపక్షాలకు మూడు స్థానాలు..
•  యూపీలో ఐదు సీట్లు గెలుచుకున్న సమాజ్‌వాదీ పార్టీ.. బిహార్‌లో ఆర్జేడీ, జన్‌ సురాజ్‌ పార్టీకి చెరో విజయం

న్యూఢిల్లీ: నాలుగు రాష్ట్రాల్లో 28 ఎమ్మెల్సీ స్థానాలకు జరిగిన ద్వైవార్షిక ఎన్నికల్లో అధికార ఎన్డీఏ కూటమి 16 స్థానాలను కైవసం చేసుకుంది. అయితే, కొన్ని కీలక నియోజకవర్గాల్లో విపక్షాలు అధికార పక్షానికి గట్టి షాక్‌ ఇచ్చాయి. ప్రధానంగా ఉత్తరప్రదేశ్‌లోని వారణాసి, లక్నో, ఆగ్రా, బిహార్‌లోని పాట్నా, మహారాష్ట్రలోని నాగ్‌పూర్‌ వంటి ప్రాంతాల్లో విపక్ష అభ్యర్థులు విజయం సాధించడం రాజకీయంగా ప్రాధాన్యం సంతరించుకుంది. అక్టోబర్‌ 23న వెలువడిన ఫలితాల్లో బీజేపీ 13 స్థానాలు గెలుచుకోగా, దాని మిత్రపక్షాలైన శివసేన (ఏక్‌నాథ్‌ షిండే), జేడీయూ, జేడీఎస్‌ ఒక్కో స్థానంలో విజయం సాధించాయి. దీంతో ఎన్డీఏ మొత్తం బలం 16కు చేరింది.

రాష్ట్రాల వారీగా చూస్తే కర్ణాటకలో ఎన్డీఏ పోటీ చేసిన నాలుగు స్థానాలనూ గెలుచుకుని క్లీన్‌స్వీప్‌ చేసింది. ఉత్తరప్రదేశ్‌లో 11 స్థానాలకు గాను ఆరు, బిహార్‌లో మూడు, మహారాష్ట్రలో రెండు స్థానాలను కైవసం చేసుకుంది. మరోవైపు అఖిలేశ్‌ యాదవ్‌ నేతృత్వంలోని సమాజ్‌వాదీ పార్టీ (ఎస్పీ) ఉత్తరప్రదేశ్‌లో ఐదు స్థానాలు గెలుచుకుని సత్తా చాటింది. మహారాష్ట్రలో శరద్‌ పవార్‌ నేతృత్వంలోని ఎన్సీపీ రెండు స్థానాలు, కాంగ్రెస్‌ ఒక స్థానాన్ని గెలుచుకున్నాయి. బిహార్‌లో ఆర్జేడీ, ప్రశాంత్‌ కిశోర్‌ నేతృత్వంలోని జన్‌ సురాజ్‌ పార్టీ చెరో స్థానాన్ని దక్కించుకున్నాయి.

ఎన్నికల తొలి ఫలితాలు వెలువడగానే కాంగ్రెస్‌పై బీజేపీ విమర్శలు గుప్పించింది. గతంలో తన ఆధీనంలో ఉన్న నాలుగు స్థానాల్లోనూ కాంగ్రెస్‌ ఓడిపోయిందంటూ ప్రధాని నరేంద్ర మోదీ ఎద్దేవా చేశారు. నాలుగు రాష్ట్రాల్లో 28 స్థానాలకు బ్యాలెట్‌ పేపర్లతో ఎన్నికలు జరిగాయని, కాంగ్రెస్‌ ఎన్ని స్థానాలు గెలుచుకుందో చెప్పాలంటూ ఆయన సామాజిక మాధ్యమాల్లో వ్యాఖ్యానించారు. బీజేపీకి చెందిన పలువురు కేంద్ర మంత్రులు, నేతలు కూడా కాంగ్రెస్‌ చేపట్టిన ‘ఓటు చోరీ’ ప్రచారాన్ని లక్ష్యంగా చేసుకుని విమర్శలు చేశారు. అయితే, దాదాపు రెండు రోజుల పాటు సాగిన ఓట్ల లెక్కింపు అనంతరం నాగ్‌పూర్‌ గ్రాడ్యుయేట్స్‌ నియోజకవర్గంలో కాంగ్రెస్‌ అభ్యర్థి అభిజీత్‌ వంజారి విజయం సాధించడంతో రాజకీయ వాతావరణం మారిపోయింది. బీజేపీ అభ్యర్థి సుధాకర్‌ కోహలేను 3,271 ఓట్ల తేడాతో ఆయన ఓడించారు.

బిహార్‌లో ఆర్జేడీకి కీలక విజయం

బిహార్‌లో గతంలో ఎన్డీఏ ఆధీనంలో ఉన్న ఎనిమిది స్థానాల్లో నాలుగింటిని కూటమి నిలబెట్టుకుంది. జేడీయూ అభ్యర్థి నీరజ్‌ కుమార్‌ విజయం సాధించగా, తిర్హుట్‌ టీచర్స్‌ నియోజకవర్గంలో బీజేపీ అభ్యర్థి నరేంద్ర ప్రసాద్‌ సింగ్‌ సీపీఐ అభ్యర్థి సంజయ్‌ కుమార్‌ సింగ్‌పై గెలుపొందారు. అయితే, పాట్నా టీచర్స్‌ నియోజకవర్గంలో బీజేపీకి ఊహించని పరాజయం ఎదురైంది. వరుసగా ఐదుసార్లు ఎమ్మెల్సీగా గెలిచిన నావల్‌ కిశోర్‌ యాదవ్‌ను ఆర్జేడీ అభ్యర్థి సంజీవ్‌ కుమార్‌ ఓడించారు. ఈ విజయం ఆర్జేడీకి కీలకంగా మారింది.

సారన్‌ టీచర్స్‌ నియోజకవర్గంలో బీజేపీ నుంచి బహిష్కరణకు గురైన రాహుల్‌ రాజ్‌ స్వతంత్ర అభ్యర్థిగా గెలుపొందారు. గత ఎన్నికల్లో జన సురాజ్‌ పార్టీ మద్దతుతో విజయం సాధించిన అఫాక్‌ అహ్మద్‌ను ఆయన ఓడించారు. మరోవైపు దర్భంగా టీచర్స్‌ నియోజకవర్గంలో జన్‌ సురాజ్‌ పార్టీ అభ్యర్థి డాక్టర్‌ సురేశ్‌ ప్రసాద్‌ రాయ్‌ విజయం సాధించి ఆ పార్టీకి శాసనమండలిలో తొలి విజయాన్ని అందించారు. కాంగ్రెస్‌ సీనియర్‌ నేత, సిట్టింగ్‌ ఎమ్మెల్సీ మదన్‌ మోహన్‌ ఝాను కేవలం 324 ఓట్ల తేడాతో ఓడించారు. తిర్హుట్‌ గ్రాడ్యుయేట్స్‌ నియోజకవర్గంలో బన్షీధర్‌ బ్రజ్‌వాసి స్వతంత్ర అభ్యర్థిగా మరోసారి విజయం సాధించారు.

యూపీలో ఎస్పీ పుంజుకుంది.. బీజేపీకి కీలక స్థానాల్లో ఎదురుదెబ్బ

ఉత్తరప్రదేశ్‌లో 11 ఎమ్మెల్సీ స్థానాలకు జరిగిన ఎన్నికల్లో బీజేపీ ఆరు స్థానాలను గెలుచుకోగా, సమాజ్‌వాదీ పార్టీ ఐదు స్థానాలను దక్కించుకుంది. 2020 ఎన్నికల్లో బీజేపీ ఆరు స్థానాలు గెలుచుకుంది. అనంతరం స్వతంత్ర అభ్యర్థిగా గోరఖ్‌పూర్‌-ఫైజాబాద్‌ టీచర్స్‌ నియోజకవర్గం నుంచి పోటీ చేసిన ధ్రువ్‌ కుమార్‌ త్రిపాఠి బీజేపీలో చేరడంతో ఆ పార్టీ బలం ఏడుకు పెరిగింది. తాజా ఫలితాలతో బీజేపీ ఒక స్థానాన్ని కోల్పోగా, ఎస్పీ గత ఎన్నికలతో పోలిస్తే రెండు స్థానాలు అదనంగా సాధించింది.

వారణాసి, లక్నో గ్రాడ్యుయేట్స్‌ స్థానాల్లో బీజేపీ అభ్యర్థులను ఓడించి ఎస్పీ విజయం సాధించింది. 2020లో స్వతంత్ర అభ్యర్థిగా గెలిచిన ఆకాశ్‌ అగర్వాల్‌ ఈసారి ఎస్పీ తరఫున పోటీ చేసి ఆగ్రా టీచర్స్‌ స్థానాన్ని కైవసం చేసుకున్నారు. ప్రధాని మోదీ ప్రాతినిధ్యం వహిస్తున్న వారణాసిలో బీజేపీ నుంచి గ్రాడ్యుయేట్స్‌ స్థానాన్ని ఎస్పీ చేజిక్కించుకోవడం ప్రత్యేక ప్రాధాన్యం సంతరించుకుంది. 2020లో గెలిచిన టీచర్స్‌ స్థానాన్ని కూడా ఎస్పీ నిలబెట్టుకుంది. కేంద్ర రక్షణ మంత్రి రాజ్‌నాథ్‌ సింగ్‌ ప్రాతినిధ్యం వహిస్తున్న లక్నోలోనూ బీజేపీ ఓటమి పాలైంది.

ఈ ఎన్నికల్లో ముఖ్యమంత్రి యోగి ఆదిత్యనాథ్‌ బీజేపీ అభ్యర్థుల తరఫున అన్ని స్థానాల్లో ప్రచారం చేయగా, ఎస్పీ ప్రధానంగా స్థానిక నాయకులపైనే ఆధారపడింది. అయినప్పటికీ కీలక స్థానాల్లో విజయం సాధించడంపై అఖిలేశ్‌ యాదవ్‌ స్పందిస్తూ, వారణాసి, లక్నో ఫలితాలు బీజేపీ పరిస్థితిని వెల్లడిస్తున్నాయని వ్యాఖ్యానించారు. ఉత్తరప్రదేశ్‌లో వచ్చే ఏడాది అసెంబ్లీ ఎన్నికలు జరగనున్న నేపథ్యంలో ఈ ఎమ్మెల్సీ ఫలితాలు రాష్ట్ర రాజకీయాల్లో చర్చనీయాంశమయ్యాయి. ఈ ఎన్నికల్లో కాంగ్రెస్‌, బీఎస్పీ అభ్యర్థులను నిలబెట్టలేదు.

మహారాష్ట్రలో నాగ్‌పూర్‌ ఫలితంతో బీజేపీకి షాక్‌

మహారాష్ట్రలో ఐదు స్థానాలకు జరిగిన ఎన్నికల్లో ఎన్డీఏకు కేవలం రెండు స్థానాలే దక్కాయి. పుణె టీచర్స్‌ నియోజకవర్గంలో బీజేపీ అభ్యర్థి కౌస్తుభ్‌ గవ్డే, సిట్టింగ్‌ కాంగ్రెస్‌ ఎమ్మెల్సీ జయంత్‌ అస్గావ్కర్‌ను ఓడించారు. అయితే, శివసేన (షిండే) మద్దతుతో పోటీ చేసిన స్వతంత్ర అభ్యర్థి సచిన్‌ సనప్‌ నుంచి ఆయనకు గట్టి పోటీ ఎదురైంది.

పుణె గ్రాడ్యుయేట్స్‌ నియోజకవర్గంలో ఎన్సీపీ (శరద్‌ పవార్‌) అభ్యర్థి హర్షదా దేశ్‌ముఖ్‌-జాధవ్‌ తన స్థానాన్ని నిలబెట్టుకున్నారు. బీజేపీ అభ్యర్థి స్మితా జాధవ్‌పై ఆమె విజయం సాధించారు. ఛత్రపతి సంభాజీనగర్‌ గ్రాడ్యుయేట్స్‌ నియోజకవర్గంలో ఎన్సీపీ అభ్యర్థి ప్రతాప్‌ పాటిల్‌ గెలుపొందారు. ఎన్డీఏకు చెందిన సతీశ్‌ చవాన్‌ను ఆయన ఓడించారు. అమరావతి టీచర్స్‌ నియోజకవర్గంలో సిట్టింగ్‌ ఎమ్మెల్సీ కిరణ్‌ సర్నాయక్‌ తన స్థానాన్ని నిలబెట్టుకోవడంతో మహారాష్ట్రలో ఎన్డీఏకు రెండు స్థానాలు దక్కాయి.

అయితే, నాగ్‌పూర్‌ గ్రాడ్యుయేట్స్‌ నియోజకవర్గ ఫలితం బీజేపీకి, ముఖ్యంగా ముఖ్యమంత్రి దేవేంద్ర ఫడణవీస్‌కు రాజకీయంగా ఇబ్బందికరంగా మారింది. కాంగ్రెస్‌ అభ్యర్థి అభిజీత్‌ వంజారి, బీజేపీ అభ్యర్థి సుధాకర్‌ కోహలేపై 3,271 ఓట్ల ఆధిక్యంతో గెలుపొందారు. ఈ నియోజకవర్గం కేంద్ర మంత్రి నితిన్‌ గడ్కరీ సొంత ప్రాంతం కావడంతో పాటు, బీజేపీ సైద్ధాంతిక మూల సంస్థ ఆర్‌ఎస్‌ఎస్‌ ప్రధాన కార్యాలయం కూడా ఇక్కడే ఉండటం ఈ విజయానికి మరింత ప్రాధాన్యం తెచ్చింది.

ఓట్ల లెక్కింపు ప్రారంభ దశలో బీజేపీ శిబిరం విజయంపై ధీమా వ్యక్తం చేసింది. ఫలితాలు తమకు అనుకూలంగా వస్తున్నాయన్న భావనతో ముఖ్యమంత్రి ఫడణవీస్‌ కాంగ్రెస్‌ను ఎద్దేవా చేస్తూ ‘ఎ బిగ్‌ ఫ్యాట్‌ జీరో’ అంటూ సామాజిక మాధ్యమాల్లో పోస్టు చేశారు. అయితే, తుది ఫలితాల్లో కాంగ్రెస్‌ విజయం ఖరారవడంతో ఆ పోస్టును తొలగించి, ప్రధాని మోదీ చేసిన వ్యాఖ్యను మళ్లీ పోస్టు చేశారు. దీనిపై మహారాష్ట్ర కాంగ్రెస్‌ విభాగం ఫడణవీస్‌ను విమర్శిస్తూ స్పందించింది.

కర్ణాటకలో ఎన్డీఏ క్లీన్‌స్వీప్‌

కర్ణాటకలో నాలుగు ఎమ్మెల్సీ స్థానాలకు జరిగిన ఎన్నికల్లో బీజేపీ తన మూడు స్థానాలను నిలబెట్టుకోగా, మిత్రపక్షమైన జేడీఎస్‌ బెంగళూరు టీచర్స్‌ నియోజకవర్గంలో విజయం సాధించింది. గతంలో ఈ స్థానం కాంగ్రెస్‌ ఆధీనంలో ఉండేది. దీంతో నాలుగు స్థానాలనూ బీజేపీ-జేడీఎస్‌ కూటమి కైవసం చేసుకుంది. ఈ ఎన్నికల్లో రాష్ట్రవ్యాప్తంగా సుమారు 3.25 లక్షల మంది ఓటర్లు తమ ఓటు హక్కును వినియోగించుకున్నారు.

ముఖ్యమంత్రి సిద్ధరామయ్య నేతృత్వంలోని కాంగ్రెస్‌ ప్రభుత్వానికి ఈ ఫలితాలు ఎదురుదెబ్బగా మారాయి. ముఖ్యంగా ఉప ముఖ్యమంత్రి డీకే శివకుమార్‌పై రాజకీయ ఒత్తిడి పెరిగే అవకాశం ఉందని విశ్లేషణలు వెలువడుతున్నాయి. జేడీఎస్‌ రాష్ట్ర అధ్యక్షుడు, కేంద్ర మంత్రి హెచ్‌.డి. కుమారస్వామి గతంలో శివకుమార్‌పై రాజకీయ నేతలపై స్టింగ్‌ ఆపరేషన్లు నిర్వహిస్తున్నారంటూ ఆరోపణలు చేశారు. మాజీ ముఖ్యమంత్రి సిద్ధరామయ్యను లక్ష్యంగా చేసుకుని కూడా స్టింగ్‌ ఆపరేషన్‌ చేయించారని, అందువల్లే ఆయన పదవి నుంచి తప్పుకోవాల్సి వచ్చిందని కుమారస్వామి ఆరోపించారు.

ఎన్నికలకు ముందు కర్ణాటక శాసనమండలిలోని 75 స్థానాల్లో కాంగ్రెస్‌కు 38, బీజేపీకి 24, జేడీఎస్‌కు ఆరు స్థానాలు ఉన్నాయి. ఒక స్వతంత్ర సభ్యుడు, ఒక చైర్మన్‌ ఉండగా, మరో ఐదు స్థానాలు ఖాళీగా ఉన్నాయి. తాజా ఫలితాలపై స్పందించిన డీకే శివకుమార్‌ ప్రజలు తమకు ఒక సందేశం ఇచ్చారని, దానిపై సమీక్షించుకుని, ఆత్మపరిశీలన చేసుకుని, లోపాలను సరిదిద్దుకోవాల్సి ఉందని వ్యాఖ్యానించారు. అదే సమయంలో ఓటర్ల జాబితా ప్రత్యేక సమగ్ర సవరణ (ఎస్‌ఐఆర్‌)కు వ్యతిరేకంగా కాంగ్రెస్‌ పోరాటాన్ని కొనసాగిస్తుందని, కేంద్ర ఎన్నికల ప్రధాన కమిషనర్‌ జ్ఞానేశ్‌ కుమార్‌ రాజీనామా చేయాలన్న డిమాండ్‌ను కూడా పునరుద్ఘాటించారు. బ్యాలెట్‌ పేపర్ల అంశంపై నవంబర్‌ 1 తర్వాత కాంగ్రెస్‌ తదుపరి కార్యాచరణ ప్రకటిస్తుందని శివకుమార్‌ తెలిపారు.

మొత్తంగా చూస్తే.. కర్ణాటకలో ఎన్డీఏ క్లీన్‌స్వీప్‌ చేయడం, ఉత్తరప్రదేశ్‌లో బీజేపీ కీలక స్థానాలను కోల్పోవడం, నాగ్‌పూర్‌లో కాంగ్రెస్‌ విజయం సాధించడం ఈ ఎన్నికల్లో ప్రధాన రాజకీయ పరిణామాలుగా నిలిచాయి. వచ్చే ఏడాది అసెంబ్లీ ఎన్నికలు జరగనున్న ఉత్తరప్రదేశ్‌తో పాటు, కాంగ్రెస్‌ పాలనలో ఉన్న కర్ణాటకలోనూ ఈ ఫలితాలు రాజకీయ పార్టీలకు ఆత్మపరిశీలన చేసుకునే పరిస్థితిని కల్పించాయి.

ఉగ్రవాద నిరోధక అనుభవాన్ని ఆసియాన్‌ దేశాలతో పంచుకుంటాం: రాజ్‌నాథ్‌ సింగ్‌

 

ఉమ్మడి సైనిక విన్యాసాలు, నిఘా సమాచారం, శిక్షణలో సహకారానికి భారత్‌ సిద్ధం.. 

ఇండో-పసిఫిక్‌లో స్వేచ్ఛాయుత, నియమబద్ధ ప్రాంతీయ వ్యవస్థకు మద్దతు

సెబు (ఫిలిప్పీన్స్‌): ఉగ్రవాదాన్ని ఎదుర్కోవడంలో దశాబ్దాల అనుభవం కలిగిన భారత్‌, తన పోరాట అనుభవాన్ని భాగస్వామ్య దేశాలతో పంచుకోవడానికి సిద్ధంగా ఉందని రక్షణ మంత్రి రాజ్‌నాథ్‌ సింగ్‌ తెలిపారు. ఫిలిప్పీన్స్‌లోని సెబులో గురువారం జరిగిన 13వ ఆసియాన్‌ రక్షణ మంత్రుల సమావేశం (ఏడీఎంఎం-ప్లస్‌)లో ఆయన ప్రసంగించారు. ఇండో-పసిఫిక్‌ ప్రాంతంలో సురక్షితమైన, స్వేచ్ఛాయుతమైన, సమ్మిళితమైన, పటిష్ఠమైన, అంతర్జాతీయ నియమాలకు అనుగుణమైన వ్యవస్థకు భారత్‌ కట్టుబడి ఉందని స్పష్టం చేశారు.

ఉగ్రవాదాన్ని అన్ని రూపాల్లో నిర్మూలించాల్సిన అవసరం ఉందని పేర్కొన్న రాజ్‌నాథ్‌ సింగ్‌.. ఉగ్రవాద నిరోధక చర్యల్లో భారత్‌ అనుభవం కేవలం సిద్ధాంతపరమైన అవగాహన కాదని, సరిహద్దు దాటి జరిగే సంక్లిష్ట భద్రతా సవాళ్లను దశాబ్దాలుగా ఎదుర్కొంటూ సంపాదించిన అనుభవమని వివరించారు.

ఆసియాన్‌ భాగస్వామ్య దేశాలతో ఉమ్మడి సైనిక విన్యాసాలు, సామర్థ్యాల పెంపు కార్యక్రమాలు, నిఘా సమాచార మార్పిడి ద్వారా సహకరించేందుకు భారత్‌ సిద్ధంగా ఉందని తెలిపారు. ఉగ్రవాద ముప్పులను సమష్టిగా ఎదుర్కొనేందుకు ఈ సహకారం ఉపయోగపడుతుందని పేర్కొన్నారు.

‘ఆపరేషన్‌ సిందూర్‌’ను ప్రస్తావిస్తూ.. ఉగ్రవాదాన్ని ఎదుర్కోవడంలో భారత్‌ అనుసరిస్తున్న చురుకైన విధానానికి అది నిదర్శనమని రాజ్‌నాథ్‌ అన్నారు. ఉగ్రవాద మౌలిక సదుపాయాలను ధ్వంసం చేయడంతో పాటు, రాజ్య ప్రాయోజిత ఉగ్రవాదంపై భారత్‌ స్పష్టమైన వైఖరిని ప్రదర్శించిందని తెలిపారు.

ఇండో-పసిఫిక్‌ ప్రాంతంలో ఆసియాన్‌ కేంద్ర పాత్రకు భారత్‌ మద్దతు కొనసాగుతుందని చెప్పారు. శాంతి, స్థిరత్వం కోసం అన్ని దేశాల ఉమ్మడి బాధ్యత, నిరంతర సహకారం అవసరమని పేర్కొన్నారు. అంతర్జాతీయ సముద్ర చట్టాలను గౌరవించడమే కాకుండా, వాటిని ఆచరణలోనూ పాటిస్తున్నామని తెలిపారు. సముద్ర మార్గాల్లో నౌకాయాన స్వేచ్ఛను కాపాడటం, అంతర్జాతీయ వాణిజ్యానికి కీలకమైన సముద్ర మార్గాల భద్రతను నిర్ధారించడం భారత నౌకాదళం దీర్ఘకాలిక కార్యాచరణలో భాగమని వివరించారు.

ఇదిలా ఉండగా, చైనాకు చెందిన రక్షణ శాఖ ప్రతినిధి బీజింగ్‌లో స్పందిస్తూ.. ఏడీఎంఎం-ప్లస్‌ సమావేశంలో చైనా పాల్గొనకుండా ఫిలిప్పీన్స్‌ అడ్డుకోవడం ద్వారా ఏకాభిప్రాయం, పారదర్శకత, సమ్మిళితత్వం వంటి సూత్రాలను దెబ్బతీసిందని ఆరోపించారు. ఈ వారంలో జరిగే సమావేశానికి ఫిలిప్పీన్స్‌లోని చైనా రాయబార కార్యాలయ రక్షణ అటాషే తమ దేశం తరఫున హాజరవుతారని చైనా గతంలో ప్రకటించింది.

డిజిటల్‌ మోసాల్లో డబ్బు పోతే బ్యాంకులే పరిహారం చెల్లించాలి: సుప్రీంకోర్టు

 

బ్యాంకుల నిర్లక్ష్యం వల్ల మోసం జరిగితే నష్టపోయిన మొత్తాన్ని తిరిగి ఇవ్వాలి.. 

ఆర్‌బీఐ నిబంధనల్లో బాధ్యత, పరిహారానికి స్పష్టమైన నిబంధనలు ఉండాలని ఆదేశం

న్యూఢిల్లీ: డిజిటల్‌ మోసాల కారణంగా ఖాతాదారులు డబ్బు కోల్పోతే బ్యాంకులు కూడా బాధ్యత వహించాలని సుప్రీంకోర్టు స్పష్టం చేసింది. బ్యాంకుల విధి నిర్వహణలో నిర్లక్ష్యం వల్లే మోసం జరిగినట్లు దర్యాప్తులో తేలితే, బాధితులకు వారు కోల్పోయిన మొత్తానికి తగ్గకుండా పరిహారం చెల్లించేలా నిబంధనలు రూపొందించాలని రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ)కు సూచించింది.

ప్రధాన న్యాయమూర్తి జస్టిస్‌ సూర్యకాంత్‌, న్యాయమూర్తులు జాయ్‌మాల్య బాగ్చి, వి.మోహనలతో కూడిన ధర్మాసనం ఈ వ్యాఖ్యలు చేసింది. సైబర్‌ నేరాలు 50 శాతం తగ్గినప్పటికీ, ఈ ఏడాది ఇప్పటివరకు బాధితులు రూ.800 కోట్ల మేర నష్టపోయారని పేర్కొంది. కేవలం హెచ్చరికలు జారీ చేయడం సరిపోదని, బ్యాంకులపై అమలు చేయగల బాధ్యతలు, నిబంధనలు ఉల్లంఘిస్తే చర్యలు ఉండాలని స్పష్టం చేసింది.

ఆర్‌బీఐ ప్రతిపాదించిన 2026 కేవైసీ సవరణ మార్గదర్శకాలను పరిశీలించిన తర్వాతే తదుపరి నియంత్రణ ప్రక్రియకు అనుమతిస్తామని ధర్మాసనం తెలిపింది. ఈ మార్గదర్శకాలను నవంబర్‌ 30లోగా ప్రకటించి, డిసెంబర్‌ 31 నుంచి అమల్లోకి తీసుకురావాలని ప్రతిపాదించారు.

ఖాతాదారుల సాధారణ లావాదేవీల చరిత్రకు భిన్నంగా భారీ మొత్తంలో డబ్బు బదిలీ చేయాలని ప్రయత్నించినప్పుడు బ్యాంకులు తాత్కాలికంగా ఆ లావాదేవీని నిలిపివేసి పరిశీలించాలని సుప్రీంకోర్టు సూచించింది. అనుమానాస్పద లావాదేవీలను ఆటోమేటిక్‌గా గుర్తించి సంబంధిత అధికారులకు సమాచారం అందించాలని, అవసరమైతే ప్రత్యక్షంగా ధ్రువీకరించాలని పేర్కొంది.

సాధారణంగా తక్కువ మొత్తాల్లో లావాదేవీలు చేసే వృద్ధులు, వ్యక్తిగత ఖాతాదారులు ఒక్కసారిగా భారీ మొత్తాన్ని ఆర్‌టీజీఎస్‌ ద్వారా పంపించాలని ప్రయత్నిస్తే బ్యాంకులు ఎందుకు జోక్యం చేసుకోకూడదని ప్రధాన న్యాయమూర్తి ప్రశ్నించారు. వాణిజ్య సంస్థల ఖాతాల్లో కోట్ల రూపాయల లావాదేవీలు సాధారణం కావచ్చని, వ్యక్తిగత పొదుపు ఖాతాల విషయంలో మాత్రం ప్రత్యేక జాగ్రత్తలు అవసరమని వివరించారు.

ఖాతాదారుల లావాదేవీల సరళిని బట్టి ఖాతాలను వర్గీకరించి, కృత్రిమ మేధ (ఏఐ) సాయంతో అసాధారణ లావాదేవీలను గుర్తించాలని ధర్మాసనం సూచించింది. డిజిటల్‌ అరెస్ట్‌ మోసాలకు గురయ్యే అవకాశం ఉన్నవారి ఖాతాల్లో అనుమానాస్పదంగా భారీ మొత్తాల బదిలీ జరిగితే సమీప పోలీస్‌ స్టేషన్‌కు ఆటోమేటిక్‌గా సమాచారం చేరే వ్యవస్థను కూడా పరిశీలించాలని తెలిపింది.

‘నకిలీ పత్రాలకు సంబంధించిన డిజిటల్‌ అరెస్ట్‌ బాధితుల వ్యవహారం’ పేరిట సుప్రీంకోర్టు స్వయంగా చేపట్టిన విచారణలో ఈ వ్యాఖ్యలు చేసింది. సైబర్‌ మోసాలను అరికట్టడంలో బ్యాంకులు ముందస్తు జాగ్రత్తలు తీసుకోవాలని, బాధితుల నష్టాన్ని తగ్గించేలా వ్యవస్థాగత చర్యలు ఉండాలని ధర్మాసనం స్పష్టం చేసింది.