జనవాక్కు: రాజకీయాలు అత్యంత కఠినమైన వృత్తి అని, దీనిలో జీతం తక్కువైనా ఖర్చులు ఎక్కువని బీజేపీ ఎంపీ, మండీ నియోజకవర్గ ప్రతినిధి కంగనా రనౌత్ ఆసక్తికర వ్యాఖ్యలు చేశారు. బీజేపీ నేత సురేశ్ గోపీ ఇటీవల చేసిన వ్యాఖ్యలకు మద్దతు తెలిపిన ఆమె, తన ఇన్స్టా స్టోరీలో ఈ విషయాన్ని పంచుకున్నారు.“రాజకీయాలు అత్యంత సవాలుతో కూడిన వృత్తి. జీతం తక్కువ, ఖర్చులు ఎక్కువ. రాజకీయ జీవితంలో కళాకారులు తమ వృత్తికి సమయం కేటాయిస్తే ఎగతాళికి గురవుతారు. ప్రజలు రాజకీయ నిపుణుల పట్ల తమ అభిప్రాయాలను మార్చుకోవాలి. మంత్రిగా ఉన్నా, ప్రభుత్వంలో భాగమైనా, మమ్మల్ని మా రంగంలో పనిచేసేందుకు అనుమతించాలి” అని కంగనా పేర్కొన్నారు.గతంలో కూడా కంగనా రాజకీయ నేతల జీతం సరిపోదని వ్యాఖ్యానించారు. నియోజకవర్గాల్లో పర్యటనలకు లక్షల రూపాయల ఖర్చు అవుతుందని, ఒక్కో ప్రాంతం 300-400 కి.మీ. దూరంలో ఉండటం దీనికి కారణమని తెలిపారు. “రాజకీయాలు ఖర్చుతో కూడినవి. ఎంపీల జీతం సరిపోదు, అందుకే మరో ఉద్యోగం చేసుకోవాల్సి ఉంటుంది. చాలా మంది ఎంపీలు వ్యాపారవేత్తలు, న్యాయవాదులుగా ఉన్నారు” అని ఆమె అభిప్రాయపడ్డారు.మరోవైపు, కేంద్ర మంత్రి పదవి నుంచి వైదొలగాలని భావిస్తున్నట్లు బీజేపీ ఎంపీ సురేశ్ గోపీ వెల్లడించారు. సినీ రంగం నుంచి రాజకీయాల్లోకి వచ్చిన ఆయన, ఆదివారం బీజేపీ కార్యకర్తల సమావేశంలో మాట్లాడుతూ, సినీ కెరీర్ను వదులుకొని మంత్రి కావాలని తానెప్పుడూ కోరుకోలేదని, ఆదాయం తగ్గిపోయినందున మళ్లీ సినిమాల్లో నటించాలనుకుంటున్నానని చెప్పారు. తన పదవిని కేరళకు చెందిన రాజ్యసభ సభ్యుడు సదానందన్ మాస్టర్కు ఇవ్వాలని సూచించారు. ప్రస్తుతం సురేశ్ గోపీ పెట్రోలియం శాఖ సహాయ మంత్రిగా వ్యవహరిస్తున్నారు.
No comments:
Post a Comment