స్కై జోరు పెంచాల్సిందే

•  సూర్య నెత్తిన వేలాడుతున్న గిల్ కత్తి

ఆసియా కప్‌లోనూ, అంతకుముందూ బ్యాట్‌తో రాణించని టీ20 కెప్టెన్ సూర్యకుమార్ యాదవ్ నెత్తిన.. శుభ్‌మన్ గిల్ రూపంలో కత్తి వేలాడుతోంది! ఇకనైనా మునుపటి జోరు చూపించకపోతే.. డిప్యూటీకి నాయకత్వం అప్పగించాల్సి వస్తుందని విశ్లేషకులు అంటున్నారు.వన్డేల్లో రోహిత్ శర్మ స్థానంలో గిల్‌ను కెప్టెన్‌గా నియమించారు. టీ20ల్లో వైస్ కెప్టెన్సీ కూడా ఇచ్చారు. ఈ వేగంతోనే టీ20 నాయకత్వం కూడా గిల్‌దే అవుతుందని క్రికెట్ పరిశీలకులు అంచనా వేస్తున్నారు. కారణం.. సూర్య బ్యాటింగ్‌లో వరుస వైఫల్యాలు.

తగ్గిన సూర్య ప్రకాశం!

ఆసియా కప్‌లో సూర్య చెప్పుకోదగ్గ ఇన్నింగ్స్ ఆడలేదు. పాకిస్థాన్‌పై 47*, యూఏఈపై 7*, బంగ్లాదేశ్‌పై 5, శ్రీలంకపై 12, ఫైనల్‌లో పాక్‌పై 1 రన్.. మొత్తం 72 పరుగులతో నిరాశపరిచాడు. సూపర్-4లో పాక్‌పై డకౌట్.2025లో కెప్టెన్‌గా 11 ఇన్నింగ్స్‌ల్లో 100 పరుగులే. ఓవరాల్‌గా 20 ఇన్నింగ్స్‌ల్లో 330 పరుగులు. అర్ధశతకం చేసి ఏడాది దాటింది. అక్టోబర్ 12, 2024లో బంగ్లాదేశ్‌పై 75 రన్స్ చేశాడు. ఆ తర్వాత ఆసియా కప్‌లో పాక్‌పై 47*నే టాప్ స్కోర్.

మేలుకోకపోతే..

2026 టీ20 వరల్డ్ కప్ ముందు ఆస్ట్రేలియాతో 5, దక్షిణాఫ్రికాతో 5, న్యూజిలాండ్‌తో 5 మ్యాచ్‌లు ఆడనుంది టీమిండియా. సఫారీ, కివీస్ సిరీస్‌లు స్వదేశంలో. ఇందులో సూర్య మెరవాల్సిందే. కెప్టెన్‌గా విజయాలు ఇస్తున్నా.. పరుగులు లేకుండా ఎక్కువ కాలం జట్టులో ఉండడం కష్టం. ఫస్ట్ డౌన్‌లో బ్యాటింగ్‌కు వచ్చే సూర్యకు ఇది కీలకం.కోచ్ గౌతమ్ గంభీర్, సెలెక్టర్ అజిత్ అగార్కర్ సంచలన నిర్ణయాలు తీసుకుంటున్నారు. సూర్య ఇబ్బంది ఎదుర్కోకూడదంటే.. మునుపటి లాగే పరుగులతో మెరవాల్సిందే!అభిషేక్ శర్మ ప్రపంచంలోనే టాప్ టీ20 బ్యాటర్. 23 ఇన్నింగ్స్‌ల్లో 36.91 యావరేజ్‌తో 849 రన్స్. 2 శతకాలు, 5 అర్ధశతకాలు. ఇండియా-ఆసీస్ మధ్య 32 టీ20ల్లో భారత్ 20, ఆసీస్ 11 గెలిచాయి. ఒకటి ఫలితం లేకుండా. గత మూడు సిరీస్‌ల్లోనూ భారత్ ఆసీస్‌ను ఓడించింది.