- కేంద్ర మంత్రుల హర్షం
- ఇరు దేశాల ఆర్థిక ప్రగతికి సరికొత్త బాటలు
భారత్ - అమెరికా మధ్య కుదిరిన చరిత్రాత్మక వాణిజ్య ఒప్పందంపై కేంద్ర మంత్రులు అమిత్ షా, ఎస్. జైశంకర్, రాజ్నాథ్ సింగ్, పీయూష్ గోయల్, నితిన్ గడ్కరీ, అశ్విని వైష్ణవ్, కిరణ్ రిజిజు హర్షం వ్యక్తం చేస్తూ ప్రధాని నరేంద్ర మోడీ, అధ్యక్షుడు డొనాల్డ్ ట్రంప్లకు అభినందనలు తెలిపారు. ఈ ఒప్పందం వల్ల ఇరు దేశాల్లో ఉద్యోగ అవకాశాలు మెరుగుపడతాయని, వృద్ధి రేటు పెరుగుతుందని విదేశాంగ మంత్రి జైశంకర్ పేర్కొన్నారు. ఇది 'మేక్ ఇన్ ఇండియా' ఆశయాలకు బలాన్నివ్వడమే కాకుండా, వ్యూహాత్మక భాగస్వామ్యానికి బలమైన పునాదిగా మారుతుందని ఆయన అభిప్రాయపడ్డారు. భారత ఉత్పత్తులపై టారిఫ్లను 18 శాతానికి తగ్గించడం ద్వారా వాణిజ్యం మరింత వృద్ధి చెందుతుందని, రెండు దేశాల ప్రజలకు ప్రత్యక్ష ప్రయోజనం చేకూరుతుందని హోంమంత్రి అమిత్ షా , రక్షణ మంత్రి రాజ్నాథ్ సింగ్ స్పష్టం చేశారు.
ఈ ఒప్పందం కేవలం వాణిజ్యానికి సంబంధించింది మాత్రమే కాదని, 'వికసిత్ భారత్ 2047' లక్ష్యానికి ఇదొక చరిత్రాత్మక మలుపు అని వాణిజ్య శాఖ మంత్రి పీయూష్ గోయల్ కొనియాడారు. రైతులు, ఎంఎస్ఎంఈలు, నైపుణ్యం కలిగిన కార్మికులకు ఇది సరికొత్త అవకాశాలను సృష్టిస్తుందని, అమెరికా నుంచి అత్యాధునిక సాంకేతికతను పొందేందుకు భారత్కు మార్గం సుగమం అవుతుందని ఆయన వివరించారు. మరోవైపు, 'మేడ్ ఇన్ ఇండియా' ఉత్పత్తులకు గ్లోబల్ మార్కెట్లో కొత్త ద్వారాలు తెరుచుకున్నాయని నితిన్ గడ్కరీ పేర్కొనగా, ఐటీ మరియు కమ్యూనికేషన్ రంగాల్లో సహ - అభివృద్ధికి ఇది గొప్ప అవకాశమని అశ్విని వైష్ణవ్ అభివర్ణించారు. పర్యాటక శాఖ మంత్రి గజేంద్ర సింగ్ శేఖావత్ మాట్లాడుతూ, ఈ ఒప్పందంతో ఇరు దేశాల మధ్య నెలకొన్న అనిశ్చితి మేఘాలు తొలిగిపోయాయని, ముఖ్యంగా టెక్స్టైల్ ఎగుమతిదారులు ఈ పరిణామం పట్ల ఎంతో ఉత్సాహంగా ఉన్నారని వెల్లడించారు.
No comments:
Post a Comment