ఏఐ విప్లవానికి భారత్ వేదిక

• ఇండియా ఏఐ ఇంపాక్ట్ సమ్మిట్‌ను ప్రారంభించిన ప్రధాని మోడీ

కృత్రిమ మేధస్సు (ఏఐ) పరివర్తనలో భారతదేశం ప్రపంచంలోనే అగ్రస్థానంలో నిలుస్తుందని, ఏఐ అభివృద్ధిలో భారత్ చూపిస్తున్న పురోగతి తన ఆశయానికి, బాధ్యతకు అద్దం పడుతుందని ప్రధాని నరేంద్ర మోడీ పేర్కొన్నారు. ఢిల్లీలోని భారత్ మండపంలో ఫిబ్రవరి 16 నుండి 20 వరకు జరగనున్న "ఇండియా ఏఐ ఇంపాక్ట్ సమ్మిట్, ఎక్స్‌పో 2026" ను ఆయన ప్రారంభించారు. ఈ సదస్సుకు ప్రపంచవ్యాప్తంగా ఉన్న నాయకులు, పరిశ్రమల అధిపతులు, ఆవిష్కర్తలు, సాంకేతిక నిపుణులకు ఆయన స్వాగతం పలికారు.

"అందరి సంక్షేమం, అందరి సంతోషం"  అనే నినాదంతో ఈ సదస్సు జరుగుతున్నదని, ఇది మానవ-కేంద్రిత పురోగతి కోసం ఏఐని ఉపయోగించుకోవాలనే మన భాగస్వామ్య నిబద్ధతను ప్రతిబింబిస్తుందని ప్రధాని మోడీ స్పష్టం చేశారు. ఆరోగ్య సంరక్షణ, విద్య, వ్యవసాయం, పాలన, వ్యాపార రంగాలలో ఏఐ అద్భుతమైన మార్పులను తీసుకువస్తున్నదని ఆయన పేర్కొన్నారు. ఏఐ ఆవిష్కరణలు, సహకారం, బాధ్యతాయుతమైన వినియోగంపై ప్రపంచ చర్చను ఈ సమ్మిట్ బలోపేతం చేస్తుందని ఆయన ఆశాభావం వ్యక్తం చేశారు.

భారతదేశం 1.4 బిలియన్ల జనాభాతో ఏఐ పరివర్తనలో ముందుందని ఆయన అన్నారు. డిజిటల్ పబ్లిక్ ఇన్‌ఫ్రాస్ట్రక్చర్ నుంచి శక్తివంతమైన స్టార్టప్ పర్యావరణ వ్యవస్థ వరకు, భారత్ ఏఐ రంగంలో దూసుకుపోతున్నదని ప్రధాని పేర్కొన్నారు. అలాగే, బడ్జెట్‌లో ప్రకటించిన పన్ను ప్రోత్సాహకాలు ఏఐ రంగంలో పెట్టుబడులను వేగవంతం చేస్తాయని, డేటా ఇన్‌ఫ్రాస్ట్రక్చర్ కోసం భారత్‌ను ప్రపంచ-పోటీ గమ్యస్థానంగా మారుస్తాయని ఆయన తెలిపారు. ప్రపంచ డేటా అంతా భారతదేశంలో పెట్టడానికి మేము ఆహ్వానిస్తున్నామని ఆయన గ్లోబల్ అవుట్‌రీచ్ సందేశాన్ని అందించారు.