కొత్త బంగ్లాదేశ్‌కు ఇది పుట్టినరోజు

•  ఓటు వేసిన తర్వాత డాక్టర్ యూనస్ వ్యాఖ్య

ఢాకా: బంగ్లాదేశ్ రాజకీయ చరిత్రలో నూతన అధ్యాయం మొదలైంది. గత ఏడాది జరిగిన భారీ ప్రజా ఉద్యమం తర్వాత దేశంలో మొదటిసారిగా జరుగుతున్న 13వ పార్లమెంటరీ ఎన్నికలు, రాజ్యాంగబద్ధమైన ప్రజాభిప్రాయ సేకరణ గురువారం ప్రారంభమయ్యాయి. ఈ కీలక సందర్భంలో బంగ్లాదేశ్ తాత్కాలిక ప్రభుత్వ ప్రధాన సలహాదారు , నోబెల్ బహుమతి గ్రహీత డాక్టర్ మహమ్మద్ యూనస్ తన ఓటు హక్కును వినియోగించుకున్నారు.

• సరికొత్త బంగ్లాదేశ్ ఆరంభం

ఢాకాలోని గుల్షన్ మోడల్ స్కూల్ అండ్ కాలేజీ పోలింగ్ కేంద్రంలో ఓటు వేసిన అనంతరం డాక్టర్ యూనస్ మీడియాతో మాట్లాడారు. "ఇది గొప్ప ఆనందాన్ని ఇచ్చే రోజు. కొత్త బంగ్లాదేశ్‌కు ఇది పుట్టినరోజు" అని ఆయన ఉద్వేగంగా వ్యాఖ్యానించారు. దేశం ఇంతకాలం ఎదుర్కొన్న పాత, చీకటి రోజులకు స్వస్తి పలికి, ప్రజాస్వామ్య మార్గంలో సరికొత్త దేశాన్ని నిర్మించుకునే అవకాశం ప్రజలకు లభించిందని ఆయన పేర్కొన్నారు.

• బంగ్లాదేశ్ భవిష్యత్తుకు అత్యంత కీలకం

మాజీ ప్రధాని షేక్ హసీనా ప్రభుత్వం పడిపోయిన తర్వాత జరుగుతున్న ఈ ఎన్నికలు బంగ్లాదేశ్ భవిష్యత్తుకు అత్యంత కీలకం. ఈ ఎన్నికలలో భాగంగా ప్రజలు తమ ప్రతినిధులను ఎన్నుకోవడంతో పాటు, "జులై చార్టర్" అనే రాజ్యాంగ సంస్కరణల ప్యాకేజీపై కూడా ఓటు వేస్తున్నారు. ఈ సంస్కరణలు ప్రధానమంత్రి అధికారాలను పరిమితం చేసి, ప్రజాస్వామ్యవ్యవస్థను బలోపేతం చేసే లక్ష్యంతో రూపొందించబడ్డాయి. సుమారు 12.7 కోట్ల మంది ఓటర్లు తమ హక్కును వినియోగించుకోనుండగా, బంగ్లాదేశ్ రాజకీయాల్లో ఇది ఒక మలుపుగా పరిగణించబడుతున్నది.