పొగమంచు దుప్పటిలో రాజధాని.. కాస్త మెరుగైన గాలి నాణ్యత

 ఢిల్లీలో గడ్డకట్టే చలి

 

న్యూఢిల్లీ: దేశ రాజధాని ఢిల్లీలో చలి తీవ్రత కొనసాగుతున్నది. ఆదివారం (జనవరి 11) ఉదయం నగరం గడ్డకట్టే చలితో మేల్కొంది. కనిష్ట ఉష్ణోగ్రత 6.6 డిగ్రీల సెల్సియస్‌గా నమోదైందని వాతావరణ శాఖ వెల్లడించింది. దీనికి తోడు నగరాన్ని దట్టమైన పొగమంచు (Smog) కమ్మేయడంతో పలు ప్రాంతాల్లో దృశ్యమానత (Visibility) తగ్గి వాహనదారులు, ప్రయాణికులు తీవ్ర ఇబ్బందులుపడ్డారు. ముఖ్యంగా సరాయ్ కాలే ఖాన్, ఇండియా గేట్ పరిసరాల్లో పొగమంచు ప్రభావం ఎక్కువగా కనిపించింది.

గాలి నాణ్యతలో స్వల్ప మార్పు

 వాయు కాలుష్యానికి సంబంధించి ఢిల్లీ వాసులకు స్వల్ప ఊరట లభించింది. శనివారం 'అత్యంత ప్రమాదకర'  కేటగిరీలో ఉన్న గాలి నాణ్యత, ఆదివారం ఉదయానికి 'పేలవమైన' కేటగిరీకి మెరుగుపడింది. సెంట్రల్ పొల్యూషన్ కంట్రోల్ బోర్డ్ (CPCB) గణాంకాల ప్రకారం, ఉదయం 7 గంటల సమయంలో ఢిల్లీ సగటు గాలి నాణ్యత సూచీ (ఏక్యూఐ) 298గా నమోదైంది. అయితే, నెహ్రూ నగర్ (359), జహంగీర్‌పురి (347), ఆనంద్ విహార్ (339) వంటి ప్రాంతాల్లో కాలుష్య స్థాయిలు ఇంకా 300 మార్కు కంటే ఎక్కువే ఉండటం ఆందోళన కలిగిస్తున్నది.

ముంచుకొస్తున్న చలిగాలులు

 కొద్దిరోజులుగా ఉత్తర భారతంలో ఉష్ణోగ్రతలు గణనీయంగా పడిపోతున్నాయి. శనివారం ఢిల్లీలో ఈ సీజన్‌లోనే అత్యంత తక్కువగా 4.2 డిగ్రీల కనిష్ట ఉష్ణోగ్రత నమోదైంది. పొగమంచు కారణంగా విమాన, రైలు రాకపోకల పైన కూడా ప్రభావం పడింది. రాబోయే రెండు మూడు రోజుల పాటు నగరంలో ఓ మోస్తరు నుంచి దట్టమైన పొగమంచు కురిసే అవకాశం ఉందని, ప్రజలు అప్రమత్తంగా ఉండాలని వాతావరణ కేంద్రం (IMD) 'యెల్లో అలర్ట్' జారీ చేసింది. ముఖ్యంగా ఉపాసన, శ్వాసకోశ సమస్యలు ఉన్నవారు బయటకు వచ్చేటప్పుడు తగిన జాగ్రత్తలు తీసుకోవాలని నిపుణులు సూచిస్తున్నారు.