నాగరికత సాహసానికి సోమనాథ్ నిలువెత్తు నిదర్శనం

•  పవిత్ర క్షేత్రంలో ప్రధాని మోడీ భావోద్వేగం

గాంధీనగర్: గుజరాత్‌లోని పవిత్ర సోమనాథ్ క్షేత్రాన్ని సందర్శించడం పట్ల ప్రధాని నరేంద్ర మోడీ హర్షం వ్యక్తం చేశారు. 'సోమనాథ్ స్వాభిమాన్ పర్వ్' వేడుకల్లో భాగంగా శనివారం ఆలయాన్ని సందర్శించిన ఆయన, ఈ పుణ్యక్షేత్రం మన నాగరికతకు ఉన్న సాహసానికి. తిరుగులేని సంకల్పానికి గర్వకారణమని అభివర్ణించారు. జ్యోతిర్లింగ స్వరూపుడైన సోమనాథుడిని దర్శించుకోవడం వల్ల తాను ఎంతో ధన్యుడినయ్యానని, ఈ క్షేత్రం భారతదేశపు ఆధ్యాత్మిక శక్తికి నిలువెత్తు సాక్ష్యమని ఆయన కొనియాడారు. చరిత్రలో ఎన్నో దాడులను ఎదుర్కొని కూడా సోమనాథ్ ఆలయం నేడు ఇంతటి శోభతో వెలుగొందడం భారతీయుల ఆత్మగౌరవానికి ప్రతీక అని ఆయన పేర్కొన్నారు.

సోషల్‌ మీడియా వేదికగా స్పందించిన ప్రధాని, సోమనాథ్  ఒక దేవాలయం మాత్రమే కాదని, అది మన సంస్కృతి . సంప్రదాయాల పునరుజ్జీవనానికి చిహ్నమని తెలిపారు. అనాది కాలంగా సోమనాథుడి ఆశీస్సులు భారత భూమిపై ఉన్నాయని, ఈ పవిత్ర క్షేత్రం నుంచి వెలువడే సానుకూల శక్తి దేశాభివృద్ధికి ప్రేరణనిస్తుందని ఆయన ఆకాంక్షించారు. ఈ సందర్భంగా ఆలయంలో నిర్వహించిన ప్రత్యేక పూజలు తనలో నూతనోత్తేజాన్ని నింపాయని, భక్తులందరికీ ఆ పరమశివుడి అనుగ్రహం లభించాలని తాను కోరుకున్నట్లు ప్రధాని వెల్లడించారు. భవిష్యత్తు తరాలకు మన గొప్ప వారసత్వాన్ని అందించాల్సిన బాధ్యత అందరిపై ఉందని ఆయన గుర్తుచేశారు.

ఆలయ ప్రాంగణంలో ఏర్పాటు చేసిన అభివృద్ధి పనుల ప్రదర్శనను కూడా ప్రధాని పరిశీలించారు. ఆధ్యాత్మిక పర్యాటకాన్ని ప్రోత్సహించడం ద్వారా స్థానిక యువతకు ఉపాధి అవకాశాలు మెరుగుపడతాయని ఆయన అభిప్రాయపడ్డారు. ముఖ్యంగా 'సోమనాథ్ స్వాభిమాన్ పర్వ్' వేడుకల ద్వారా భారతీయ కళలు, సంస్కృతిని ప్రపంచానికి చాటిచెప్పడం అభినందనీయమని ఆయన కొనియాడారు. ఈ వేడుకల్లో భాగంగా దేశవ్యాప్తంగా ఉన్న యాత్రికులు సోమనాథ్ చరిత్రను, క్షేత్ర విశిష్టతను తెలుసుకోవడానికి ఈ పర్యటన ఒక గొప్ప అవకాశంగా నిలుస్తుందని ఆయన పేర్కొన్నారు.