ముంబై మున్సిపల్ ఎన్నికల వేళ కాంగ్రెస్‌కు భారీ షాక్

 

•  బీజేపీలో చేరిన 12 మంది కార్పొరేటర్లు

ముంబై: మహారాష్ట్రలో స్థానిక సంస్థల ఎన్నికల నగారా మోగిన తరుణంలో కాంగ్రెస్ పార్టీకి గట్టి ఎదురుదెబ్బ తగిలింది. బృహన్ ముంబై మున్సిపల్ కార్పొరేషన్ (BMC) ఎన్నికలకు ముందు, పార్టీ క్రమశిక్షణ ఉల్లంఘన కింద సస్పెండ్ అయిన 12 మంది మాజీ కార్పొరేటర్లు బీజేపీ తీర్థం పుచ్చుకున్నారు. ముంబైలో జరిగిన ఒక కార్యక్రమంలో మహారాష్ట్ర  ముఖ్యమంత్రి దేవేంద్ర ఫడ్నవీస్ సమక్షంలో వీరంతా కాషాయ జెండా కప్పుకున్నారు. ఈ పరిణామం ముంబై రాజకీయాల్లో ఒక్కసారిగా వేడిని పెంచింది.

కాంగ్రెస్ పార్టీలోని అంతర్గత విభేదాలు, నాయకత్వ వైఫల్యాల వల్లే తాము పార్టీని వీడాల్సి వచ్చిందని చేరిన నేతలు పేర్కొన్నారు. ప్రధాని నరేంద్ర మోడీ నాయకత్వం , అభివృద్ధి మోడల్ పట్ల ఆకర్షితులై బీజేపీలో చేరుతున్నట్లు వారు వెల్లడించారు. సస్పెన్షన్‌కు గురైన నేతలందరూ ముంబైలోని వివిధ నియోజకవర్గాల్లో పట్టున్న వారు కావడంతో, రాబోయే బీఎంసీ ఎన్నికల్లో ఇది బీజేపీకి పెద్ద బలంగా మారనుంది. ముంబైపై పట్టు సాధించాలని గట్టి పట్టుదలతో ఉన్న బీజేపీకి ఈ నేతల చేరిక కొత్త ఉత్సాహాన్ని ఇచ్చింది.

మరోవైపు, పార్టీ వ్యతిరేక కార్యకలాపాలకు పాల్పడినందుకే వారిని సస్పెండ్ చేశామని, వారి వెళ్ళిపోవడం వల్ల పార్టీకి వచ్చే నష్టం ఏమీ లేదని కాంగ్రెస్ నాయకత్వం కొట్టిపారేస్తోంది. అయితే, కీలకమైన ఎన్నికల సమయంలో ఒకేసారి 12 మంది కార్పొరేటర్లు ప్రత్యర్థి పార్టీలో చేరడం కార్యకర్తల్లో గందరగోళానికి దారితీస్తోంది. ఇప్పటికే ఠాక్రే సోదరుల కలయికతో రాష్ట్ర రాజకీయాలు ఆసక్తికరంగా మారిన తరుణంలో, ఈ వలసలు ముంబై మున్సిపల్ పీఠం కోసం జరగబోయే పోరాటాన్ని మరింత రసవత్తరంగా మార్చాయి.