సంక్షోభంలో భారత్ - అమెరికా బంధం

• ప్రతిరోజూ కొత్త సవాళ్లే: జైరామ్ రమేశ్‌

భారత్ -  అమెరికా మధ్య ద్వైపాక్షిక సంబంధాలు ప్రస్తుతం అత్యంత క్లిష్టమైన దశను ఎదుర్కొంటున్నాయని కాంగ్రెస్ సీనియర్ నేత జైరామ్ రమేశ్‌ ఆందోళన వ్యక్తం చేశారు. డొనాల్డ్ ట్రంప్ రెండోసారి అధ్యక్షుడిగా బాధ్యతలు చేపట్టిన తర్వాత ప్రధాని నరేంద్ర మోడీ వైట్ హౌస్‌ను సందర్శించిన తొలి నేతల్లో ఒకరైనప్పటికీ, క్షేత్రస్థాయిలో పరిస్థితులు అందుకు భిన్నంగా ఉన్నాయని ఆయన విమర్శించారు. గురువారం సోషల్ మీడియా వేదికగా స్పందించిన ఆయన, ఇరు దేశాల మధ్య మైత్రిలో ఇప్పుడు అసాధారణ పరిస్థితులు నెలకొన్నాయని, ప్రతిరోజూ కొత్త సవాళ్లు పుట్టుకొస్తున్నాయని వ్యాఖ్యానించారు.

రష్యా నుంచి చమురు దిగుమతులు, ఇతర వాణిజ్య సంబంధాల కారణంగా భారత్‌పై భారీ ఆంక్షలు విధించేలా అమెరికా సెనేటర్ లిండ్సే గ్రాహం ఒక బిల్లును ముందుకు తెస్తున్నారని జైరామ్ రమేశ్‌ గుర్తు చేశారు. అలాగే, అమెరికా కంపెనీలు భారత్ వంటి దేశాలకు పనులు అవుట్‌సోర్సింగ్ ఇస్తే వాటిపై 25 శాతం పన్ను విధించే ప్రతిపాదనలు కూడా వస్తున్నాయని, ఇది భారత ఐటీ రంగానికి గట్టి దెబ్బని ఆయన పేర్కొన్నారు. ఒకవైపు మోడీ ప్రభుత్వం 'అన్నీ బాగున్నాయి' అని సంకేతాలిస్తున్నా, మరోవైపు ట్రంప్ ప్రభుత్వం పాకిస్తాన్ ఆర్మీ చీఫ్ అసిమ్ మునీర్‌పై ప్రశంసలు కురిపిస్తుండటం భారత్‌కు ఇబ్బందికర పరిణామమని ఆయన విశ్లేషించారు.

గత ఏడాది మే నెలలో భారత్-పాక్ సరిహద్దుల్లో ఉద్రిక్తతలు పెరిగినప్పుడు (ఆపరేషన్ సిందూర్ సమయంలో), అమెరికా జోక్యం వల్లే యుద్ధం ఆగిందని ట్రంప్ పదే పదే చెప్పుకుంటున్నారని, దీనిపై ప్రధాని మోడీ ఎందుకు మౌనంగా ఉన్నారని జైరామ్ రమేశ్‌ ప్రశ్నించారు. కేవలం వ్యక్తిగత స్నేహం వల్ల దేశ ప్రయోజనాలు సిద్ధించవని, అమెరికా అనుసరిస్తున్న ఏకపక్ష వాణిజ్య విధానాలు, సుంకాల పెంపు వల్ల భారత ఆర్థిక వ్యవస్థ ప్రభావితమవుతోందని ఆయన హెచ్చరించారు. విదేశీ దౌత్య రంగంలో భారత్ తీవ్ర ఎదురుదెబ్బలను ఎదుర్కొంటోందని ఆయన ఆరోపించారు.