కాంగ్రెస్ 'వందేమాతరం' నినాదంతో జైలుకు వెళ్తే ... మీ పూర్వీకులు బ్రిటిష్ వారికి పని చేశారు

• రాజ్యసభలో ఖర్గే తీవ్ర విమర్శలు

న్యూఢిల్లీ: కాంగ్రెస్ అధ్యక్షుడు, రాజ్యసభ ప్రతిపక్ష నాయకులు మల్లికార్జున ఖర్గే మంగళవారం 'వందేమాతరం'పై జరిగిన ప్రత్యేక చర్చ సందర్భంగా బీజేపీపై తీవ్ర స్థాయిలో విరుచుకుపడ్డారు.

ఖర్గే తన ప్రసంగంలో బీజేపీ సిద్ధాంత పూర్వీకుల చరిత్రను లక్ష్యంగా చేసుకున్నారు. 1921లో మహాత్మా గాంధీ ప్రారంభించిన 'సహాయ నిరాకరణ ఉద్యమం లో కాంగ్రెస్ నుంచి లక్షలాది మంది స్వాతంత్య్ర సమరయోధులు 'వందేమాతరం' నినాదంతో జైళ్లకు వెళ్లారు. "అప్పుడు మీరు (బీజేపీని ఉద్దేశించి) ఏమి చేస్తున్నారు? మీ పూర్వీకులు బ్రిటిష్ వారికి పని చేస్తున్నారు" అని ఖర్గే ఆరోపించారు. స్వాతంత్య్ర పోరాట సమయంలో 'వందేమాతరం'ను దేశభక్తి నినాదంగా మార్చిన ఘనత తమ పార్టీదేనని ఆయన అన్నారు.బీజేపీ సిద్ధాంత పూర్వీకుల చరిత్ర "ఎల్లప్పుడూ స్వాతంత్య్ర పోరాటానికి, దేశభక్తి గీతాలకు వ్యతిరేకం" అని ఆయన తీవ్రంగా విమర్శించారు.ప్రధానమంత్రి నరేంద్ర మోడీ జవహర్‌లాల్ నెహ్రూను అవమానించడానికి ఏ అవకాశాన్ని వదులుకోరని, హోంమంత్రి అమిత్ షా కూడా దాన్నే అనుసరిస్తారని ఖర్గే విమర్శించారు.

వందేమాతరం గీతం 150వ వార్షికోత్సవం సందర్భంగా రాజ్యసభలో ఈ ప్రత్యేక చర్చ జరుగుతోంది. అంతకుముందు, ఈ చర్చను పశ్చిమ బెంగాల్ ఎన్నికలతో ముడిపెడుతున్నారనే ఆరోపణలను కేంద్ర హోంమంత్రి అమిత్ షా తోసిపుచ్చారు. వందేమాతరం అనేది "మాతృభూమి పట్ల భక్తి, కర్తవ్యాన్ని మేల్కొల్పే ఒక అమర సృష్టి" అని షా పేర్కొన్నారు. ఈ చర్చ ఉద్దేశాన్ని ప్రశ్నిస్తున్నవారు 'కొత్తగా ఆలోచించి, స్పష్టతతో అర్థం చేసుకోవాలి' అని ఆయన సూచించారు.