గ్రామీణ పేదల జీవనోపాధిపై కేంద్రం దాడి

• ఉపాధి హామీ పథకం మార్పు 'చరిత్రాత్మక తప్పిదం'
• మహాత్మా గాంధీని అవమానించడమే
• నల్ల చట్టానికి వ్యతిరేకంగా పోరాటం
• కేంద్ర ప్రభుత్వ నిర్ణయంపై సచిన్ పైలట్ ఫైర్

బెంగళూరు/న్యూఢిల్లీ: మహాత్మా గాంధీ జాతీయ గ్రామీణ ఉపాధి హామీ చట్టాన్ని (MGNREGA) రద్దు చేసి, దాని స్థానంలో 'వీబీ-జీ రామ్ జీ' (VB-G-RAM-G) చట్టాన్ని తీసుకురావాలన్న కేంద్ర ప్రభుత్వ నిర్ణయంపై కాంగ్రెస్ సీనియర్ నేత సచిన్ పైలట్ తీవ్రస్థాయిలో విరుచుకుపడ్డారు. ఇది గ్రామీణ పేదల ఆర్థిక భద్రతపై జరుగుతున్న ప్రత్యక్ష దాడి అని, దేశ చరిత్రలో ఇదొక 'చరిత్రాత్మక తప్పిదం' అని ఆయన అభివర్ణించారు.

మహాత్మా గాంధీని అవమానించడమే

స్వతంత్ర భారత చరిత్రలో జాతిపిత మహాత్మా గాంధీ పేరు మీద ఉన్న ఒక ప్రతిష్టాత్మక పథకం పేరును మార్చడం ఇదే మొదటిసారి అని, ఇది ఆయన వారసత్వాన్ని అవమానించడమేనని పైలట్ మండిపడ్డారు. పాత చట్టం ప్రకారం ఎక్కడ, ఎంత పని కావాలనేది గ్రామసభలు నిర్ణయించేవని (డిమాండ్ ఆధారిత), కానీ కొత్త చట్టంతో అన్ని అధికారాలు ఢిల్లీ చేతుల్లోకి వెళ్తాయని ఆందోళన వ్యక్తం చేశారు. ఇది గ్రామ పంచాయతీల స్వయంప్రతిపత్తిని దెబ్బతీస్తుందని పేర్కొన్నారు. ఉపాధి హామీ నిధుల్లో కేంద్రం వాటాను 90 శాతం నుంచి 60 శాతానికి తగ్గించిందని, మిగిలిన 40 శాతం భారాన్ని రాష్ట్రాలపై మోపడం వల్ల గ్రామీణ పేదలకు నిధుల కొరత ఏర్పడే ప్రమాదం ఉందని ఆయన వివరించారు. పార్లమెంటులో చర్చ లేకుండా, రాష్ట్రాల అభిప్రాయం తీసుకోకుండా ఈ 'నల్ల చట్టాన్ని' బలవంతంగా రుద్దారని ఆరోపించారు. కాంగ్రెస్, ఇండియా (INDIA) కూటమి కలిసి ఈ చట్టాన్ని వెనక్కి తీసుకునే వరకు పోరాడతాయని స్పష్టం చేశారు.