న్యాయవ్యవస్థ ఇంత బలహీనంగా ఉండటం ఆశ్చర్యకరం

• ఉన్నావ్ కేసుపై కాంగ్రెస్ నేత టి.ఎస్. సింగ్ దేవ్ సంచలన వ్యాఖ్యలు

న్యూఢిల్లీ: ఉన్నావ్ అత్యాచార కేసులో దోషి, బహిష్కృత బీజేపీ నేత కుల్దీప్ సింగ్ సెంగర్ జీవిత ఖైదును నిలిపివేస్తూ ఢిల్లీ హైకోర్టు ఇచ్చిన ఉత్తర్వులపై సుప్రీంకోర్టు స్టే విధించడంపై కాంగ్రెస్ సీనియర్ నేత టి.ఎస్. సింగ్ దేవ్ స్పందించారు. దేశంలో న్యాయవ్యవస్థ ఇంత బలహీనంగా మారుతుండటం తనను ఆశ్చర్యానికి గురిచేస్తోందని ఆయన వ్యాఖ్యానించారు.

హైకోర్టు నిర్ణయంపై విమర్శలు

స్త్రీలను దేవతలుగా ఆరాధించే మన దేశంలో, ఇలాంటి తీవ్రమైన నేరాలకు పాల్పడిన వ్యక్తికి (సెంగర్‌కు) హైకోర్టు ఊరటనివ్వడం అత్యంత సిగ్గుచేటని ఆయన అన్నారు. ఢిల్లీ హైకోర్టు నిర్ణయంపై సుప్రీంకోర్టు స్టే ఇవ్వకుంటే అది దేశానికి తీవ్ర నిరాశ కలిగించే విషయమయ్యేదని పేర్కొన్నారు. ఉన్నావ్ మైనర్ బాలికపై అత్యాచార కేసులో సెంగర్‌కు విధించిన జీవిత ఖైదును సస్పెండ్ చేస్తూ డిసెంబర్ 23న ఢిల్లీ హైకోర్టు ఇచ్చిన బెయిల్ ఉత్తర్వులపై సుప్రీంకోర్టు సోమవారం స్టే విధించింది. సీబీఐ దాఖలు చేసిన పిటిషన్‌ను విచారించిన సీజేఐ సూర్యకాంత్ నేతృత్వంలోని ధర్మాసనం.. సెంగర్ జైలు నుంచి విడుదల కాకూడదని స్పష్టం చేసింది. సెంగర్ ఇప్పటికే మరో హత్య కేసులో (సెక్షన్ 304) కూడా దోషిగా తేలి శిక్ష అనుభవిస్తున్నాడని, ఇలాంటి పరిస్థితుల్లో అతనికి ఉపశమనం కలిగించడం సరికాదని సుప్రీంకోర్టు అభిప్రాయపడింది. దేశంలోని ఆడబిడ్డలకు పూర్తి స్థాయిలో న్యాయం జరిగినప్పుడే తాము ఈ నిర్ణయాన్ని సంపూర్ణంగా స్వాగతిస్తామని ఎన్ఎస్‌యూఐ అధ్యక్షుడు వరుణ్ చౌదరి తెలిపారు. ఉత్తరప్రదేశ్ మాజీ ఎమ్మెల్యే అయిన కుల్దీప్ సింగ్ సెంగర్‌కు 2017 ఉన్నావ్ అత్యాచార కేసులో 2019లో జీవిత ఖైదు, రూ. 25 లక్షల జరిమానా విధించబడింది. తాజా సుప్రీంకోర్టు నిర్ణయంతో అతను జైలులోనే కొనసాగనున్నారు.