మోడీ-పుతిన్ భేటీలో అందరి దృష్టిని ఆకర్షించిన ప్రత్యేక మొక్క

• దాని పేరు, ప్రత్యేకతలు ఏమిటంటే...

న్యూఢిల్లీ: రష్యా అధ్యక్షుడు వ్లాదిమిర్ పుతిన్ భారత పర్యటన సందర్భంగా ప్రధాని నరేంద్ర మోడీతో శుక్రవారం హైదరాబాద్‌ హౌస్‌లో  కీలక ద్వైపాక్షిక సమావేశం జరిగిన సంగతి తెలిసిందే. ఈ భేటీలో  కేవలం ఇద్దరు నాయకుల కరచాలనం, ముఖ్య ప్రకటనల గురించే కాకుండా.. ఒక మొక్క అందరి దృష్టిని ఆకర్షించింది. ఆ ఇద్దరు నేతల వెనుక ఎరుపు, పసుపు రంగులతో అలంకరించబడిన పొడవైన, ఆకర్షణీయమైన మొక్క పేరేమిటి? దాని ప్రత్యేకతల గురించి తెలుసుకోవడానికి నెటిజన్లు ఇంటర్నెట్‌లో తెగ వెతికారు. ఇంతకీ ఆ మొక్క పేరు ఏమిటంటే... దీనిపేరు  'హెలికోనియా'. 

ఇదొక సాధారణ అలంకరణ మాత్రమే కాదని, దీని ఉద్దేశం, సంకేతాలపై ఆసక్తికరమైన చర్చ జరిగింది. పసుపు-ఎరుపు రంగులతో నిండుగా, నిటారుగా ఉండే ఆ హెలికోనియా మొక్క  శోభను అద్దడంతోపాటు...సానుకూల శక్తి, శ్రేయస్సు, వృద్ధి, సమతుల్యత, సామరస్యం, కొత్త ప్రారంభాలు, పురోగతి వంటి వాటికి ప్రతీకగా పరిగణించబడుతుంది.

ఉన్నత స్థాయి దౌత్య చర్చలలో, గదిలో ఉంచే ప్రతి అంశం (పువ్వులు, రంగులు, అలంకరణ) ఒక ప్రత్యేకమైన అర్థాన్ని జోడిస్తుంది. హెలికోనియా మొక్క నిటారుగా ఉండే నిర్మాణం మప్రకాశవంతమైన రంగులు ఆ భేటీ సానుకూలత, భాగస్వామ్యం, పురోగతి గురించి జరిగిందని సూచిస్తూ ఒక స్పష్టమైన సందేశాన్ని అందించాయి. ఈ భేటీ కేవలం వ్యూహాత్మకమే కాకుండా, భవిష్యత్తుపై ఆశావహ దృక్పథంతో జరిగిందని ఈ మొక్క సూచించింది.