పుదుచ్చేరిలో మళ్ళీ రంగసామి హవా

• థట్టంచవాడిలో భారీ ఆధిక్యం 
• ఎన్‌డీఏ మ్యాజిక్ ఫిగర్ దిశగా అడుగులు

పుదుచ్చేరి అసెంబ్లీ ఎన్నికల ఓట్ల లెక్కింపులో అధికార నేషనల్ డెమోక్రటిక్ అలయన్స్ (NDA) దూసుకుపోతోంది. మొత్తం 30 స్థానాలున్న అసెంబ్లీలో ఏఐఎన్ఆర్సీ (AINRC) నేతృత్వంలోని కూటమి ప్రస్తుతం 11 స్థానాల్లో ముందంజలో ఉండి, ప్రభుత్వం ఏర్పాటుకు అవసరమైన 16 సీట్ల మెజారిటీ మార్కుకు దగ్గరవుతోంది. అత్యంత ప్రతిష్టాత్మకమైన థట్టంచవాడి నియోజకవర్గంలో ముఖ్యమంత్రి ఎన్. రంగసామి తన సమీప ప్రత్యర్థి, కాంగ్రెస్ అభ్యర్థి వి. వైద్యలింగంపై దాదాపు 3,500 ఓట్ల పైచిలుకు ఆధిక్యంలో కొనసాగుతున్నారు. రంగసామి ఈసారి రెండు నియోజకవర్గాల నుండి పోటీ చేయగా, తన సొంత గడ్డపై ఆయనకు తిరుగులేని మద్దతు లభిస్తోంది.  ప్రధాన ప్రతిపక్షమైన కాంగ్రెస్-డీఎంకే కూటమి (INDIA bloc) కేవలం 3 స్థానాల్లో మాత్రమే ముందంజలో ఉండి ఎన్‌డీఏకు ఆశించినస్థాయిలో పోటీ ఇవ్వలేకపోతోంది. ఏఐఎన్ఆర్సీ అభ్యర్థులు విలియనూర్, ముత్యాలపేట , అరియంకుప్పం వంటి కీలక స్థానాల్లో ఆధిక్యాన్ని ప్రదర్శిస్తున్నారు. ఏప్రిల్ 9న జరిగిన ఈ ఎన్నికల్లో పుదుచ్చేరి చరిత్రలోనే అత్యధికంగా దాదాపు 90 శాతం పోలింగ్ నమోదు కావడం విశేషం. ఈ భారీ ఓటింగ్ అధికార పక్షానికి అనుకూలంగా మారినట్లు ప్రస్తుత ధోరణులు సూచిస్తున్నాయి. నటుడు విజయ్ నేతృత్వంలోని టీవీకే (TVK) పార్టీ కూడా కొన్నిచోట్ల ఓట్లను చీలుస్తూ తన ఉనికిని చాటుకుంటోంది.