మధ్యప్రాచ్య శాంతి చర్చల్లో పాక్ 'ద్వంద్వ నీతి'

• అమెరికా అనుమానం.. మధ్యవర్తిత్వంపై ట్రంప్ సర్కార్‌లో పెరుగుతున్న అసహనం!

మధ్యప్రాచ్య సంక్షోభాన్ని పరిష్కరించేందుకు అమెరికా-ఇరాన్ మధ్య మధ్యవర్తిగా వ్యవహరిస్తున్న పాకిస్థాన్ పాత్రపై అమెరికా ఉన్నతాధికారులు తీవ్ర ఆందోళన వ్యక్తం చేస్తున్నారు. ఒకవైపు శాంతి చర్చలు జరుపుతున్నట్లు నటిస్తూనే, మరోవైపు ఇరాన్‌కు సహకరిస్తూ పాక్ 'ద్వంద్వ క్రీడ' ఆడుతోందని వాషింగ్టన్ వర్గాలు అనుమానిస్తున్నాయి. ఇరాన్ పంపిన శాంతి ప్రతిపాదనలను పాక్ అధికారులు అమెరికాకు చేరవేసినప్పటికీ, ఆ ప్రతిపాదనల తీరుపై అధ్యక్షుడు డొనాల్డ్ ట్రంప్ తీవ్ర అసంతృప్తి వ్యక్తం చేశారు. ఇరాన్ ఇచ్చిన సమాధానం ఏమాత్రం ఆమోదయోగ్యం కాదని, అది కేవలం ఒక "చెత్త కాగితం" వంటిదని ట్రంప్ కొట్టిపారేయడం గమనార్హం.మరింత ఆందోళనకరమైన విషయం ఏమిటంటే, ఇరాన్ సైనిక విమానాలకు పాకిస్థాన్ తన వైమానిక స్థావరాల్లో ఆశ్రయం కల్పించిందని నివేదికలు వెల్లడిస్తున్నాయి. అమెరికా వైమానిక దాడుల నుంచి ఇరాన్ యుద్ధ విమానాలను రక్షించేందుకు పాక్ ఈ రహస్య ఒప్పందానికి పాల్పడిందని తెలుస్తోంది. మధ్యవర్తిగా నిష్పక్షపాతంగా వ్యవహరించాల్సిన పాకిస్థాన్, ఇరాన్ వాదనలను అమెరికాకు అనుకూలంగా మార్చి చెబుతోందని, అసలు వాస్తవాలను దాచిపెడుతోందని సీఎన్ఎన్ వంటి అంతర్జాతీయ మీడియా సంస్థలు పేర్కొన్నాయి. ఈ పరిణామాల నేపథ్యంలో పాకిస్థాన్‌పై నమ్మకం కోల్పోతున్న ట్రంప్ యంత్రాంగం, శాంతి ప్రక్రియలో చైనా వంటి ఇతర దేశాల ప్రమేయంపై దృష్టి సారించే అవకాశం కనిపిస్తోంది.