ఓస్లోలో భారత్ వర్సెస్ నార్వే మీడియా

• పత్రికా స్వేచ్ఛపై ప్రశ్నించిన విదేశీ జర్నలిస్ట్‌కు భారత విదేశాంగ శాఖ గట్టి కౌంటర్
• "అజ్ఞాన ఎన్జీవోల నివేదికలు చదివి మాట్లాడకండి" అంటూ సీరియస్

నార్వే రాజధాని ఓస్లోలో జరిగిన ప్రెస్ కాన్ఫరెన్స్ వేదికగా భారత విదేశాంగ మంత్రిత్వ శాఖ (MEA) కు, ఒక స్థానిక మహిళా జర్నలిస్ట్‌కు మధ్య అత్యంత ఉత్కంఠభరితమైన, వాడివేడి దౌత్యపరమైన చర్చ నడిచింది. భారతదేశంలో పత్రికా స్వేచ్ఛ, మానవ హక్కులు,  మైనారిటీల రక్షణపై సదరు నార్వేజియన్ జర్నలిస్ట్ పదే పదే అడిగిన ప్రశ్నలకు భారత విదేశాంగ శాఖ కార్యదర్శి (పశ్చిమ విభాగం) సిబి జార్జ్ అత్యంత కఠినమైన పదజాలంతో, గట్టి ఆధారాలతో తిప్పికొట్టారు. విదేశాలలో కూర్చుని భారతదేశ వాస్తవ పరిస్థితులు , దేశ పరిమాణంపై కనీస అవగాహన లేకుండా, కేవలం కొన్ని స్వార్థపూరిత ఎన్జీవోల నివేదికలను నమ్మి ప్రచారాలు చేయడం సరికాదని ఆయన మండిపడ్డారు.

ఈ ప్రెస్ మీట్ సందర్భంగా సిబి జార్జ్ భారత మీడియా వ్యవస్థ  విస్తృతిని ప్రపంచానికి వివరించారు. "భారతదేశం ఎంత పెద్దదో, ఇక్కడి మీడియా ఎంత శక్తివంతమైనదో చాలా మందికి అసలు అవగాహనే లేదు. కేవలం దేశ రాజధాని ఢిల్లీలోనే ఇంగ్లీష్, హిందీ , వివిధ ప్రాంతీయ భాషలకు చెందిన కనీసం 200 కు పైగా టీవీ ఛానళ్లు ఉన్నాయి. ప్రతిరోజూ సాయంత్రం వందలాది బ్రేకింగ్ న్యూస్ కథనాలతో ఇక్కడి మీడియా నిరంతరం ప్రజల్లో ఉంటుంది. దేశ వాస్తవాలతో ఏమాత్రం సంబంధం లేని, అజ్ఞానంతో నిండిన కొన్ని ఎన్జీవోలు (Ignorant NGOs) ప్రచురించే ఒకటి రెండు నివేదికలను చదివేసి.. ఇక్కడికి వచ్చి భారతదేశ ప్రజాస్వామ్యాన్ని ప్రశ్నించడం హాస్యాస్పదం" అని ఆయన తీవ్రంగా విమర్శించారు. ఒక దశలో భారత దౌత్యవేత్తల సమాధానాలపై అసహనానికి గురైన సదరు మహిళా జర్నలిస్ట్ ప్రెస్ రూమ్ నుండి బయటకు నడిచి వెళ్లిపోయి, ఆ తర్వాత మళ్లీ వెనక్కి రావడం గమనార్హం.

భారత రాజ్యాంగం దేశంలోని ప్రతి పౌరుడికి ప్రాథమిక హక్కులను కల్పించిందని, ఒకవేళ వాటికి భంగం వాటిల్లితే న్యాయపరమైన రక్షణ పొందే పూర్తి స్వేచ్ఛ ఇక్కడ ఉందని సిబి జార్జ్ స్పష్టం చేశారు. ప్రపంచంలోనే అనేక ముందడుగు వేసిన దేశాల కంటే ముందే, భారతదేశం స్వాతంత్ర్యం వచ్చిన తొలి రోజు (1947) నుండే మహిళలకు సమాన ఓటు హక్కు కల్పించిందని ఆయన గుర్తుచేశారు. "మేము సమానత్వాన్ని, మానవ హక్కులను బలంగా నమ్ముతాము. ఒక ప్రజాస్వామ్య దేశంలో మానవ హక్కులకు అత్యున్నత ఉదాహరణ ఏమిటంటే.. ప్రజలు ఓటు ద్వారా తమకు నచ్చిన ప్రభుత్వాన్ని మార్చుకోగలగడం. ఆ అద్భుతమైన ప్రక్రియ నిరంతరం భారతదేశంలో విజయవంతంగా సాగుతోంది, దీనిపై మేము ఎంతో గర్విస్తున్నాము" అని చెప్తూ భారత్‌పై జరుగుతున్న అంతర్జాతీయ దుష్ప్రచారానికి ఓస్లో వేదికగా భారత విదేశాంగ శాఖ గట్టి సమాధానం ఇచ్చింది.