లాంచ్‌కు ముందే ఏఐ మోడల్స్ స్క్రీనింగ్

• అడ్వాన్స్‌డ్ ఆర్టిఫిషియల్ ఇంటెలిజెన్స్ నియంత్రణపై వైట్ హౌస్  ముసాయిదా..
•  త్వరలోనే ట్రంప్ కీలక ఉత్తర్వులు!

ఆర్టిఫిషియల్ ఇంటెలిజెన్స్ (AI) సాంకేతికత ప్రపంచాన్ని వేగంగా మారుస్తున్న తరుణంలో, అమెరికా ప్రభుత్వం అత్యంత అధునాతన ఏఐ మోడల్స్‌పై గట్టి నిఘా ఉంచేందుకు సిద్ధమైంది. సరికొత్త ఏఐ మోడళ్లను ప్రజల్లోకి విడుదల చేయడానికి ముందే.. వాటిని ప్రభుత్వ సమీక్షకు సమర్పించేలా ఒక స్వచ్ఛంద విధానాన్ని (Voluntary Framework) ప్రతిపాదిస్తూ వైట్ హౌస్ త్వరలోనే ఒక కీలక ఎగ్జిక్యూటివ్ ఆర్డర్ (కార్యనిర్వాహక ఉత్తర్వు) జారీ చేయనుందని అధికారిక వర్గాలను ఉటంకిస్తూ అంతర్జాతీయ మీడియా వెల్లడించింది. యాంథ్రోపిక్ సంస్థకు చెందిన 'మైథోస్' (Mythos), ఓపెన్ ఏఐ కి చెందిన 'జీపీటీ-5.5-సైబర్' వంటి శక్తివంతమైన మోడళ్లు సైబర్ దాడులకు, దేశ రక్షణ వ్యవస్థలకు ముప్పుగా మారే అవకాశం ఉందన్న నిపుణుల హెచ్చరికల నేపథ్యంలో అమెరికా అధ్యక్షుడు డొనాల్డ్ ట్రంప్ ఈ నిర్ణయం తీసుకోబోతున్నారు.

ఈ ముసాయిదా ఉత్తర్వుల ప్రకారం, మైక్రోసాఫ్ట్, గూగుల్, ఓపెన్ ఏఐ, యాంథ్రోపిక్ వంటి టెక్ దిగ్గజాలు తాము రూపొందించిన అధునాతన 'ఫ్రంటియర్ ఏఐ మోడల్స్'ను మార్కెట్లోకి తెచ్చేందుకు కనీసం 90 రోజుల ముందే అమెరికా ప్రభుత్వ అధికారుల పరిశీలనకు అందించాల్సి ఉంటుంది. అయితే ఈ సమీక్షా గడువును 14 రోజులకు తగ్గించాలని టెక్ పరిశ్రమలు ఒత్తిడి తెస్తున్నాయి. ప్రభుత్వంతో పాటు బ్యాంకులు, హెల్త్‌కేర్ వంటి కీలకమైన మౌలిక సదుపాయాల విభాగాలకు కూడా ఈ మోడళ్లకు సంబంధించిన ముందస్తు యాక్సెస్ లభించనుంది. దీనివల్ల ఆయా సాంకేతికతల్లో పొంచి ఉన్న సైబర్ భద్రతా లోపాలను ముందుగానే గుర్తించి, వాటి దుర్వినియోగాన్ని అడ్డుకునే వీలుంటుంది.

ఈ ప్రతిపాదిత ఎగ్జిక్యూటివ్ ఆర్డర్ ప్రధానంగా రెండు విభాగాలుగా ఉండబోతోంది. మొదటిది సైబర్ సెక్యూరిటీ కాగా, రెండోది 'ఫ్రంటియర్ మోడల్స్' పరిధిని నిర్ణయించడం. సైబర్ విభాగానికి సంబంధించి అమెరికా ట్రెజరీ డిపార్ట్‌మెంట్, ఇతర ఫెడరల్ ఏజెన్సీలు , ప్రైవేట్ ఏఐ సంస్థల భాగస్వామ్యంతో ఒక 'క్లియరింగ్‌హౌస్' (సమాచార మార్పిడి కేంద్రం) ఏర్పాటు చేయనున్నారు. ఇది విడుదల కాని ఏఐ మోడళ్లలోని లోపాలను గుర్తించి సరిచేయడానికి సహాయపడుతుంది. అలాగే, ప్రభుత్వ సమాచార సాంకేతిక (IT) వ్యవస్థలను ఆధునీకరించేందుకు 'యూఎస్ టెక్ ఫోర్స్' (US Tech Force) కింద పెద్ద ఎత్తున ఇంజినీర్లను నియమించుకోవాలని కూడా వైట్ హౌస్ యోచిస్తోంది.

ఈ నిర్ణయం ట్రంప్ ప్రభుత్వ మునుపటి విధానాలకు పూర్తి భిన్నంగా ఉండటం గమనార్హం. గతంలో ఏఐ రంగంలో ఎలాంటి కఠిన నిబంధనలు లేకుండా స్వేచ్ఛా విధానాన్ని (Hands-off Approach) అవలంబించిన ట్రంప్.. బైడెన్ హయాంలోని ఏఐ నిబంధనలను కూడా రద్దు చేశారు. కానీ, ఇటీవల సరికొత్త మోడళ్ల వల్ల సైబర్ దాడుల ముప్పు తీవ్రతరమవ్వడంతో, ప్రభుత్వం తలదూర్చక తప్పని పరిస్థితి ఏర్పడింది. ప్రస్తుతం టెక్ రంగానికి చెందిన మార్క్ జుకర్‌బర్గ్, సుందర్ పిచాయ్, సామ్ ఆల్ట్‌మాన్ వంటి ప్రముఖులతో వైట్ హౌస్ అధికారులు ఈ ముసాయిదాపై చర్చలు జరుపుతున్నారు. అయితే దీనిపై వైట్ హౌస్ ఇంకా ఎలాంటి అధికారిక ప్రకటన చేయలేదు.