ఒకే కుటుంబం.. మూడు వేర్వేరు పార్టీలు

• 'లాటరీ కింగ్' శాంటియాగో మార్టిన్ ఫ్యామిలీ సృష్టించిన అరుదైన రాజకీయ రికార్డు!

భారత రాజకీయాల్లో ఒకే కుటుంబానికి చెందిన వ్యక్తులు భిన్నమైన సిద్ధాంతాలు కలిగిన పార్టీల్లో ఉండటం కొత్తేమీ కాదు. జాతీయస్థాయిలో గాంధీ కుటుంబం నుండి, హర్యానాలోని చౌతాలాలు, తెలంగాణలోని కేసీఆర్ కుటుంబం వరకు ఇలాంటి చీలికలు మనం చూస్తూనే ఉన్నాం. అయితే, తాజాగా ముగిసిన తమిళనాడు , పుదుచ్చేరి అసెంబ్లీ ఎన్నికల్లో 'లాటరీ కింగ్'గా పేరొందిన శాంటియాగో మార్టిన్ కుటుంబం ఒక అరుదైన చరిత్రను లిఖించింది. ఒకే కుటుంబానికి చెందిన భార్య, కుమారుడు , అల్లుడు మూడు వేర్వేరు పార్టీల తరపున పోటీ చేసి విజయం సాధించడం ఇప్పుడు రాజకీయ వర్గాల్లో హాట్ టాపిక్‌గా మారింది.

తమిళనాడులోని లాల్గుడి నియోజకవర్గం నుండి ఏఐఏడీఎంకే (AIADMK) అభ్యర్థిగా పోటీ చేసిన లీనా రోజ్ మార్టిన్ విజయం సాధించగా, ఆమె అల్లుడు ఆధవ్ అర్జున 'దళపతి' విజయ్ స్థాపించిన తమిళగ వెట్రి కళగం (TVK) తరపున విల్లివాక్కం నుండి ఎమ్మెల్యేగా ఎన్నికయ్యారు. వీరిద్దరూ ఒకే అసెంబ్లీలో అడుగుపెట్టబోతుండటం విశేషం. ఇక శాంటియాగో మార్టిన్ కుమారుడు జోస్ చార్లెస్ మార్టిన్ పుదుచ్చేరిలో సొంతంగా 'లక్ష్య జననాయక కచ్చి' అనే పార్టీని స్థాపించి, కామరాజర్ నగర్ నుండి గెలుపొందారు. ఆయన అక్కడ బీజేపీ నేతృత్వంలోని ఎన్డీఏ (NDA) కూటమిలో భాగంగా ఉన్నారు. తమిళ రాజకీయాల్లో కరుణానిధి కుటుంబం వంటి బలమైన రాజకీయ శక్తులన్నీ ఒకే గొడుగు కింద (డీఎంకే) ఉన్న తరుణంలో, మార్టిన్ కుటుంబం ఇలా విభిన్న పార్టీల ద్వారా అధికారాన్ని దక్కించుకోవడం ఒక అరుదైన ఉదాహరణగా నిలిచింది.