తమిళనాట 'దళపతి' విజయ్ రాజకీయ బిగిల్

• ఆరు పార్టీలు.. ఐదు రోజుల హైడ్రామా.. 
• చివరకు ముఖ్యమంత్రిగా పట్టాభిషేకం

తమిళనాడు అసెంబ్లీ ఎన్నికల ఫలితాలు వెలువడిన తర్వాత గత ఐదు రోజులుగా కొనసాగుతున్న ఉత్కంఠకు ఎట్టకేలకు తెరపడింది. హంగ్ తీర్పుతో మొదలైన ఈ రాజకీయ సమరం.. డిలీట్ అయిన ట్వీట్లు, ఫోర్జరీ లేఖల ఆరోపణలు, చివరి నిమిషంలో రద్దయిన విమాన ప్రయాణాల మధ్య ఒక ఉత్కంఠభరిత సినిమా క్లైమాక్స్‌ను తలపించింది. ఏప్రిల్ 23న జరిగిన ఎన్నికల్లో విజయ్ నేతృత్వంలోని తమిళగ వెట్రి కళగం (TVK) 108 సీట్లతో అతిపెద్ద పార్టీగా అవతరించినప్పటికీ, ప్రభుత్వ ఏర్పాటుకు అవసరమైన 118 మార్కుకు 10 సీట్ల దూరంలో నిలిచింది. విజయ్ రెండు చోట్ల గెలవడంతో సభలో ఆయన ఓటు బలం 107కు పడిపోయింది, అంటే ఆయనకు మరో 11 మంది ఎమ్మెల్యేల మద్దతు అనివార్యమైంది. సరిగ్గా తన 'బిగిల్' సినిమాలో 11 మంది క్రీడాకారిణులను ఏకం చేసిన కోచ్ మైఖేల్ రాయప్పన్ తరహాలోనే, నిజ జీవితంలోనూ విజయ్ ఆ 11 మంది 'ప్లేయర్స్' కోసం అలుపెరగని పోరాటం చేయాల్సి వచ్చింది.

ప్రభుత్వ ఏర్పాటు కోసం సాగిన ఈ ఐదు రోజుల గందరగోళంలో తొలుత కాంగ్రెస్ (5 సీట్లు) మద్దతు ప్రకటించగా, సిపిఐ (2), సిపిఎం (2) పార్టీలు బయట నుండి మద్దతు ఇచ్చేందుకు అంగీకరించాయి. దీంతో బలం 116కు చేరినా మెజారిటీకి ఇంకా రెండు అడుగుల దూరంలోనే నిలిచింది. ఈ కీలక సమయంలో డీఎంకే కూటమిలో ఉన్న వీసీకే (VCK), ఐయూఎంఎల్ (IUML) పార్టీలను తనవైపు తిప్పుకోవడానికి విజయ్ తీవ్రంగా శ్రమించారు. ఒక దశలో వీసీకే నేత తిరుమావళవన్ విమర్శలు చేయడం, ఐయూఎంఎల్ నేతలు మద్దతు వార్తలను ఖండించడం, మరోవైపు టీటీవీ దినకరణ్ తన పార్టీ పేరిట ఫోర్జరీ లేఖలు సృష్టించారని ఆరోపించడం వంటి పరిణామాలతో రాజకీయం వేడెక్కింది. అయితే శనివారం సాయంత్రం 5 గంటల కల్లా వీసీకే మరియు ఐయూఎంఎల్ తమ మద్దతు లేఖలను అందజేయడంతో విజయ్ కూటమి బలం 120కి (విజయ్ ఓటుతో కలిపి 121) చేరి మెజారిటీ మార్కును దాటింది.

ఈ పరిణామాల మధ్య మరో ఉత్కంఠభరిత మలుపు చోటుచేసుకుంది. అప్పటికే కేరళ వెళ్లడానికి విమాన టికెట్ బుక్ చేసుకున్న గవర్నర్ ఆర్.వి. అర్లేకర్, రాజకీయ అనిశ్చితిని గమనించి చివరి నిమిషంలో తన ప్రయాణాన్ని రద్దు చేసుకున్నారు. శనివారం సాయంత్రం 6:30 గంటలకు రాజ్‌భవన్‌లో విజయ్ బృందంతో భేటీ అయిన గవర్నర్, 120 మంది ఎమ్మెల్యేల మద్దతు పత్రాలను పరిశీలించి సంతృప్తి వ్యక్తం చేశారు. గత మూడు రోజుల్లో మూడుసార్లు కలిసినా ఆహ్వానించని గవర్నర్, నాలుగో భేటీలో మెజారిటీ స్పష్టంగా ఉండటంతో ప్రభుత్వం ఏర్పాటుకు గ్రీన్ సిగ్నల్ ఇచ్చారు. దీంతో ఆదివారం ఉదయం 10:30 గంటలకు చెన్నైలోని జవహర్ లాల్ నెహ్రూ ఇండోర్ స్టేడియంలో విజయ్ ముఖ్యమంత్రిగా ప్రమాణ స్వీకారం చేయనున్నారు. మే 13న ఆయన అసెంబ్లీలో తన బలాన్ని నిరూపించుకోవాల్సి ఉంటుంది.