స్వేచ్ఛాయుత మీడియా ప్రశ్నలకు సమాధానం దాటవేసిన మోదీ

• నార్వే జర్నలిస్ట్ అడిగిన ప్రశ్నకు బదులివ్వకుండానే నడుచుకుంటూ వెళ్లిన ప్రధాని
• అంతర్జాతీయంగా చర్చనీయాంశమైన వైనం!

భారత ప్రధానమంత్రి నరేంద్ర మోదీకి  దేశీయ, అంతర్జాతీయ మీడియాకు మధ్య ఉన్న సంబంధాలు, ప్రెస్ పట్ల ఆయన ప్రభుత్వం అనుసరిస్తున్న వైఖరి మరోసారి అంతర్జాతీయంగా చర్చకు దారితీశాయి. ఐరోపా పర్యటనలో భాగంగా సోమవారం నార్వే రాజధాని ఓస్లోలో పర్యటించిన ప్రధాని మోదీ.. జాయింట్ ప్రెస్ కాన్ఫరెన్స్ ముగిసిన తర్వాత ఒక నార్వేజియన్ మహిళా జర్నలిస్ట్ అడిగిన ప్రశ్నకు సమాధానం ఇవ్వకుండానే అక్కడి నుండి ముందుకు సాగిపోయారు. ప్రధాని మోదీ తన ప్రసంగంలో భారతదేశాన్ని ప్రపంచంలోనే అతిపెద్ద ప్రజాస్వామ్య దేశంగా అభివర్ణించిన కొద్దిసేపటికే ఈ అనూహ్య పరిణామం చోటుచేసుకోవడం గమనార్హం.

ఓస్లోలో ప్రధాని నరేంద్ర మోదీ, నార్వే ప్రధాని జోనాస్ గహర్ స్టోర్ కలిసి తమ ఉమ్మడి పత్రికా ప్రకటనలను ముగించిన వెంటనే.. అక్కడే ఉన్న 'దగ్సావిసెన్' (Dagsavisen) పత్రికకు చెందిన సీనియర్ జర్నలిస్ట్, వ్యాఖ్యాత హెల్లే లింగ్ స్వెండ్సెన్ గట్టిగా ఒక ప్రశ్నను లేవనెత్తారు. "ప్రధానమంత్రి మోదీ గారూ.. ప్రపంచంలోనే అత్యంత స్వేచ్ఛాయుతమైన ప్రెస్ (మీడియా) అడుగుతున్న కొన్ని ప్రశ్నలకు మీరు ఎందుకు సమాధానాలు ఇవ్వడం లేదు?" అని ఆమె ప్రశ్నించారు. అయితే, ప్రధాని మోదీ ఆ ప్రశ్నకు స్పందించకుండా నార్వే ప్రధాని స్టోర్‌తో కలిసి ముందుకు నడిచి వెళ్లిపోయారు. అనంతరం నార్వే ప్రధాని స్టోర్ మాత్రం తిరిగి వెనక్కి వచ్చి జర్నలిస్టులకు ఇంటర్వ్యూలు ఇచ్చినట్లు ప్రముఖ భారతీయ పత్రిక ప్రతినిధి సుహాసిని హైదర్‌ వెల్లడించారు.

ఈ పరిణామంపై స్పందించిన నార్వే జర్నలిస్ట్ స్వెండ్సెన్.. తన ప్రశ్నకు మోదీ సమాధానం ఇస్తారని తాను ముందే ఆశించలేదని సామాజిక మాధ్యమ వేదిక 'ఎక్స్' (X) లో రాసుకొచ్చారు. "మనం ఏ దేశ అధికార శక్తులతోనైతే ద్వైపాక్షిక సహకారం అందిస్తున్నామో, వారిని ప్రశ్నించడం ఒక జర్నలిస్టుగా మా ప్రాథమిక బాధ్యత" అని ఆమె పేర్కొన్నారు. అంతర్జాతీయంగా 'రిపోర్టర్స్ వితౌట్ బోర్డర్స్' విడుదల చేసిన గ్లోబల్ ప్రెస్ ఫ్రీడమ్ ఇండెక్స్ (పత్రికా స్వేచ్ఛా సూచీ) లో నార్వే ప్రపంచంలోనే మొదటి స్థానంలో నిలవగా.. మొత్తం 180 దేశాల జాబితాలో భారతదేశం 157వ స్థానంలో ఉందని ఆమె ఈ సందర్భంగా గుర్తుచేశారు. దశాబ్ద కాల ప్రధాని పదవిలో మోదీ కేవలం రెండు సార్లు మాత్రమే (అది కూడా విదేశీ పర్యటనల్లో) ఓపెన్ ప్రెస్ కాన్ఫరెన్స్‌లలో జర్నలిస్టుల ప్రశ్నలకు నేరుగా సమాధానాలిచ్చారని, ఈ నేపథ్యంలో తాజా పరిణామం అంతర్జాతీయ మీడియా స్వేచ్ఛా వర్గాల్లో హాట్ టాపిక్‌గా మారింది.